മാള

മാള എന്ന നടനെക്കുറിച്ചറിയാൻ, ദയവായി മാള അരവിന്ദൻ കാണുക.

കേരളത്തിലെ തൃശ്ശൂർ ജില്ലയിലെ മാള ഗ്രാമപഞ്ചായത്തിന്റെ ആസ്ഥാനമാണ് മാള. തൃശ്ശൂർ പട്ടണത്തിൽ നിന്നും ഏകദേശം 35 കി. മി ദൂരത്തിലും, കൊച്ചി നഗരത്തിൽ നിന്നും ഏകദേശം 50 കി. മി ദൂരത്തിലും, ചാലക്കുടി പട്ടണത്തിൽ നിന്നും ഏകദേശം 13.5 കി. മി ദൂരത്തിലുമാണ് മാള സ്ഥിതി ചെയ്യുന്നത്. തൃശ്ശൂർ ജില്ലയിലെ വളരെ വാണിജ്യ പ്രാധാന്യമുള്ള ഒരു ഗ്രാമമാണ് മാള. കേരളത്തിന്റെ മുൻ മുഖ്യമന്ത്രി ആയിരുന്ന കെ. കരുണാകരൻ മാള നിയമസഭാമണ്ഡലത്തെ പലപ്പോഴായി പ്രതിനിധീകരിച്ചിട്ടുണ്ട്. പ്രശസ്തനായ മലയാള ചലച്ചിത്ര താരം മാള അരവിന്ദനും, ചലച്ചിത്രഗാന രചയിതാവും ഗസൽ എഴുത്തുകാരനുമായ പ്രദീപ് അഷ്ടമിച്ചിറയും ഇവിടത്തുകാരാണ്.

ചരിത്രം

പുരാതനമായ ജൂതക്കല്ലറകളിൽ ഒന്ന്

മാള ജൂത സിനഗോഗ് ഇവിടുത്തെ പ്രധാന ഐതിഹ്യപ്രാധാന്യമുള്ള സ്ഥലമാണ്. മാള പോലീസ് സ്റ്റേഷന് സമീപമാണ് ഇത് സ്ഥിതി ചെയ്യുന്നത്. മാള എന്ന വാക്ക് ഹീബ്രു വാക്കായ മാൽ-ആഗ എന്ന വാക്കിൽ നിന്ന് ഉരുത്തിരിഞ്ഞു വന്നതാണെന്നാണ് ഐതിഹ്യം. അഭയാർത്ഥികളുടെ സങ്കേതം' എന്നാണ് ഈ വാക്കിനർഥം^[1].

പ്രധാന ആകർഷണ കേന്ദ്രങ്ങൾ

മാള ഫെറോന പള്ളി

ഐരാണിക്കുളം മഹാദേവ ക്ഷേത്രം.

പരശുരാമൻ പ്രതിഷ്ഠ നടത്തിയ മണൽ ശിവലിംഗം ഉള്ള,ഏകദേശം 4000 വർഷത്തിനു മേൽ പഴക്കമുള്ള മഹാക്ഷേത്രം.108 ശിവാലയങ്ങളിൽ ഒന്ന്.ലോകത്തിലെ ഏറ്റവും വലുതും 32 അംശങ്ങളോട് കൂടിയതുമായ വലിയ ബലിക്കല്ല് ഒരു പ്രധാന ആകർഷണം ആണ്. അതുപോലെ തന്നെ പ്രധാന ശ്രീകോവിൽ രണ്ട് നിലയുള്ള വട്ടശ്രീകോവിലാണ്. അതും കേരളത്തിൽ ആദ്യം. ഏകദേശം 5.5 ഏക്കർ ക്ഷേത്ര ഭൂമിയിൽ തെക്കേടത്തപ്പൻ, വടക്കേടത്തപ്പൻ എന്ന പേരിൽ രണ്ടു വലിയ ശ്രീകോവിലുകളുണ്ട്. അതിപുരാതനമായ ഈ ക്ഷേത്രം ഇപ്പോൾ കൊച്ചിൻ ദേവസ്വം ബോർഡിന്റെ കീഴിൽ ആണുള്ളത്.

അമ്പഴക്കാട് ഫെറോന പള്ളി
മാളകടവ് - ജലമാർഗ്ഗം വഴി മാളയിലേക്ക് എത്തിച്ചേരാവുന്ന വഴി. പ്രധാന ബോട്ട് ജെട്ടി.
ജൂത സ്മാരകം - ജൂതന്മാരുടെ സ്മാരകം.
പാമ്പുമ്മേക്കാട്ട് മന - കേരളത്തിലെ പ്രശസ്തമായ സർപ്പാരാധനാ കേന്ദ്രമായ ഇവിടെയാണ്‌.
മൊഹമ്മദിൻ ജുമാ മസ്ജിദ്
മാള ഫൊറോന പള്ളി

വിദ്യാഭ്യാസം

തൃശ്ശൂർ ജില്ലയുടെ വിദ്യാഭ്യാസ വളർച്ചക്കും, കേരളത്തിന്റെ തന്നെ വിദ്യാഭ്യാസത്തിനു സംഭാവന നൽകുന്ന ഒരു പാട് വിദ്യാഭ്യാസ സ്ഥാപനങ്ങൾ മാളയും അടുത്ത പ്രദേശങ്ങളും കേന്ദ്രീകരിച്ച് സ്ഥിതി ചെയ്യുന്നുണ്ട്.