ബിഭൂതിഭൂഷൺ ബന്ദോപാധ്യായ്

(ബിഭൂതിഭൂഷൻ ബന്ദോപാധ്യായ എന്ന താളിൽ നിന്നും തിരിച്ചുവിട്ടതു പ്രകാരം)

പ്രശസ്തനായ ഒരു ബംഗാളി എഴുത്തുകാരനും നോവലിസ്റ്റുമാണ് ബിഭൂതിഭൂഷൺ ബന്ദോപാധ്യായ് (ബംഗാളി: বিভূতিভূষণ বন্দ্যোপাধ্যায়) (12സെപ്റ്റംബർ 1894-1നവംബർ 1950). ഇദ്ദേഹത്തിന്റെ ഏറ്റവും പ്രശസ്തമായ രചന പഥേർ പാഞ്ചാലി ആണ്. ഇതിന്റെ രണ്ടാംഭാഗമായ അപരാജിതോ അടക്കം ഒട്ടേറെ നോവലുകളും, ചെറുകഥകളും യാത്രാവിവരണങ്ങളും അദ്ദേഹം എഴുതിയിട്ടുണ്ട്.

ബിഭൂതിഭൂഷൺ ബന്ദോപാധ്യായ്
തൊഴിൽഎഴുത്തുകാരൻ, നോവലിസ്റ്റ്

ജീവിതരേഖ തിരുത്തുക

മഹാനന്ദ ബന്ദോപാധ്യയുടെയും പത്നി മൃണാളിനി ദേവിയുടെയും അഞ്ചു മക്കളിൽ മൂത്തയാളായിരുന്നു, ബിഭൂതിഭൂഷൺ. ഇന്ന് പശ്ചിമബംഗാളിൽ ഉൾപ്പെടുന്ന ഉത്തര 24 പർഗാനയിലെ ഗോപാൽനഗർ എന്ന സ്ഥലത്താണ് അദ്ദേഹം കുട്ടിക്കാലം ചെലവിട്ടത്. പിതാവ് സംസ്കൃതപണ്ഡിതനും കഥാകാലക്ഷേപക്കാരനുമായിരുന്നു. സ്കൂൾ വിദ്യാഭ്യാസം ഉത്തരപർഗാനയിലെ ബോന്ഗാവ് സ്കൂളിലെ പഠനത്തിനുശേഷം ബിഭൂതിഭൂഷൺ കൊൽക്കത്തയിലെ സുരേന്ദ്രനാഥ് കോളേജിൽ നിന്ന് ബി.എ. ബിരുദമെടുത്തു. തുടർന്നു പഠിക്കാനുളള സാമ്പത്തികശേഷി ഇല്ലാത്തതിനാൽ, ഹുഗ്ളിയിൽ അദ്ധ്യാപകവൃത്തിയിലേർപ്പെട്ടു. പിന്നീട് പലവിധ ജോലികളും നോക്കിയെങ്കിലും ഒടുവിൽ ഗോപാൽനഗറിലെ പ്രാഥമികവിദ്യാലയത്തിൽ മരണം വരെ അദ്ധ്യാപകനായിരുന്നു. 1920 -ലാണ് ബിഭൂതിഭൂഷൺ ഗൗരിയെ വിവാഹം ചെയ്തത്. പക്ഷെ ഒരു വർഷത്തിനകം പ്രസവത്തോടെ ഗൗരി മരണമടഞ്ഞു. ബിഭൂതിഭൂഷൺ ബന്ദോപാധ്യായയുടെ കൃതികളിലെ സ്ഥായിയായ വിഷാദഭാവത്തിന് ഇതാണ് കാരണമെന്ന് പറയപ്പെടുന്നു. ബിഭൂതിഭൂഷൺ ഒരു യാത്രാകുതുകിയായിരുന്നു. പക്ഷേ യാത്രകൾ ബംഗാൾ, ബീഹാർ, ആസ്സാം എന്നീ പ്രവിശ്യകളിൽ ഒതുങ്ങിനിന്നു. 1940-ൽ റൊമാ ചട്ടോപാദ്ധ്യയെ വിവാഹം കഴിച്ചു. പുത്രൻ താരാദാസിന്റെ ജനനം 1947-ലായിരുന്നു. 1950, നവംബർ ഒന്നിന് ഹൃദയാഘാതം മൂലം അമ്പത്തിയാറാമത്തെ വയസ്സിൽ ബിഭൂതിഭൂഷൺ മരണമടഞ്ഞു.[1],[2]

കൃതികൾ തിരുത്തുക

1921 -ലാണ് ആദ്യകഥയായ ഉപേക്ഷിക അക്കാലത്തെ ഒരു മികച്ച ബംഗാളിമാസികയായ പ്രവാസിയിൽ പ്രസിദ്ധീകരിച്ചത്. എന്നാൽ അദ്ദേഹത്തിന്റെ രചനകൾ കാര്യമായി ശ്രദ്ധിക്കപ്പെട്ടുതുടങ്ങിയത് പഥേർ പാഞ്ചാലിയുടെ പ്രസിദ്ധീകരണത്തോടെ ആണ്. ഇതോടെ ബംഗാളിസാഹിത്യത്തിൽ ബിഭൂതിഭൂഷൺ സ്ഥിരപ്രതിഷ്ഠ നേടിയെടുത്തു. 1950-ൽ പ്രസിദ്ധീകരിച്ച ഇച്ഛാമതി എന്ന നോവലിന് രബീന്ദ്ര പുരസ്കാരം ലഭിക്കുകയുണ്ടായി. കഥകളിൽ ഏറെയും ഗ്രാമാന്തരീക്ഷത്തെ പശ്ചാത്തലമാക്കിയുളളവയാണ്. രചനകൾ ഇതരഭാഷകളിലേക്ക് പരിഭാഷ ചെയ്യപ്പെട്ടിട്ടുണ്ട്. പല കഥകളും ചലച്ചിത്രങ്ങളായി രൂപാന്തരപ്പെട്ടിട്ടുണ്ട്.

നോവലുകൾ തിരുത്തുക

കഥാസംഗ്രഹങ്ങൾ തിരുത്തുക

  • മേഘമല്ലാർ (1932)
  • മോരീഫൂൽ (1932)
  • യാത്രാബാദൽ (1934)
  • ജന്മ ഓ മൃത്യു (1935)
  • കിന്നൊർ ദൽ (1938)
  • ബേനിഗീർ ഫൂൽബാരി (1941)
  • നവാഗത് (1944)
  • താൽനവമി(1944)
  • ഉപൽഖണ്ഡ് (1945)
  • വിധു മാസ്ററർ (1945)
  • ക്ഷണഭംഗുർ (1945)
  • അസാധാരൺ (1946)
  • മുഖോഷ് ഒ മുഖശ്രീ (1947)
  • ആചാര്യ കൃപാലിനി കോളനി (1948)
  • ജ്യോതിരിംഗൻ (1949))
  • കുശൽ പഹാഡി (1950)
  • രൂപ് ഹലൂദ് (1951)
  • അനുസന്ധാൻ (മരണാനന്തരം)
  • ഛായാഛൊബി (മരണാനന്തരം)
  • സുലോചന (മരണാനന്തരം)

ബാലസാഹിത്യം തിരുത്തുക

യാത്രാവിവരണങ്ങൾ , ഡയറിക്കുറിപ്പുകൾ തിരുത്തുക

  • അഭിയാന്ത്രിക് (1940)
  • സ്മൃതീർ രേഖാ (1941)
  • തൃണാങ്കുർ 1943)
  • ഊർമിമുഖർ (1944)
  • ബനേ പഹാഡേ(1945)
  • ഉത്കർണ് (1946)
  • ഹേ അരണ്യ കൊഥാ കൌ (1948)

ചലചിത്രാവിഷ്കാരങ്ങൾ തിരുത്തുക

ബിഭൂതിഭൂഷൺ ബന്ദോപാധ്യായയുടെ പല കൃതികളും വെളളിത്തിരയിലേക്ക് പകർത്തപ്പെട്ടിട്ടുണ്ട്.

  • പഥേർ പാഞ്ചാലി (1955, തിരക്കഥ, സംവിധാനം സത്യജിത് റേ)
  • അപരാജിതോ'(1956,തിരക്കഥ, സംവിധാനം സത്യജിത് റേ) )
  • അപുർ സൻസാർ (1959,തിരക്കഥ, സംവിധാനം സത്യജിത് റേ )
  • ബക്സാ ബദൽ (1970, തിരക്കഥ, സംഗീതം സത്യജിത് റേ, സംവിധാനം നിത്യാനന്ദ് ദത്ത)
  • നിഷിപദ്മ (1970, തിരക്കഥ, സംവിധാനം അരബിന്ദ് മുഖർജി),(1972,ഹിന്ദിയിൽ അമർപ്രേം)
  • നിമന്ത്രൺ (1971,തിരക്കഥ, സംവിധാനം തരുൺ മജുംദാർ )
  • അശനി സങ്കേത് (1973,തിരക്കഥ, സംവിധാനം സത്യജിത് റേ )
  • ഫൂലേശ്വരി(1974,തിരക്കഥ, സംവിധാനം തരുൺ മജുംദാർ )
  • ആലോ (2003,തിരക്കഥ, സംവിധാനം തരുൺ മജുംദാർ )

ഇതും കാണുക തിരുത്തുക

അവലംബം തിരുത്തുക

  1. Sunilkumar Chaṭṭopādhyāẏa (1994). Bibhutibhushan Bandopadhyaya Makers of Indian Literature. New Delhi,India: Sahitya Akademi. ISBN 9788172015787. {{cite book}}: line feed character in |title= at position 29 (help)
  2. ബിഭൂതിഭൂഷൺ ബന്ദോപാധ്യായ

പുറത്തേക്കുള്ള കണ്ണികൾ തിരുത്തുക