ഉമ്മു സൽമ

ഉമ്മു സൽമ (Arabic: أم سلمة‎) എന്നറിയപ്പെടുന്ന ഹിന്ദ് ബിൻ‌ത് അബി ഉമയ്യ (Arabic: هند بنت أبي أمية‎ ; english: Umm Salama Hind bint Abi Umayya ) ഇസ്‌ലാമിക പ്രവാചകനായ മുഹമ്മദിന്റെ 12 ഭാര്യമാരിൽ ഒരാളാണ്. അവരുടെ ജീവിതകാലം ക്രിസ്തുവർഷം 580 മുതൽ 680 വരെ ആയിരുന്നു. നബിയുടെ ഭാര്യമാരിൽ ഏറ്റവും അവസാനം മരണപ്പെടുന്നത് ഉമ്മു സൽമയാണ്. അവരെ ആദ്യം വിവാഹം കഴിച്ചിരുന്നത് സ്വഹാബിയായ അബ്ദുല്ല ഇബ്ൻ അബ്ദുൽ അസദ് ആയിരുന്നു. ഉമ്മു സൽമയെപ്പോലെ ആദ്യം ഇസ്‌ലാം സ്വീകരിച്ചവരിൽ ഒരാളായ അബ്ദുല്ല ഉഹ്ദ് യുദ്ധത്തിലേറ്റ മുറിവിനെത്തുടർന്ന് മരണമടയുമ്പോൾ അവർക്ക് നാല് ചെറിയ കുട്ടികളാണ് ഉണ്ടായിരുന്നത്. മദീനയിൽ മറ്റ് ബന്ധുക്കളൊന്നും ഇല്ലാതിരുന്ന അവരെ ആ അവസരത്തിൽ സഹായിച്ചത് അൻസാറുകളും മുഹാജിറുകളും ആയിരുന്നു. ഉമ്മു സൽമയുടെ ഇദ്ദാകാലം അവസാനിച്ചപ്പോൾ അബൂബക്കറും ഉമറും അവരെ വിവാഹം ചെയ്യാൻ തയ്യാറായെങ്കിലും അവർ ആ ആലോചനകൾ നിരസിക്കുകയാണുണ്ടായത്. പിന്നീട് നബി അവരെ വിവാഹം ചെയ്യാൻ തയ്യാറാവുകയും അവർ അത് അംഗീകരിക്കുകയും ചെയ്തു.