ലക്ഷ്മി കൃഷ്ണമൂർത്തി

ഈ ലേഖനത്തിനു മിഴിവേകാൻ ചിത്രങ്ങൾ ചേർക്കുന്നത് നന്നായിരിക്കും. താങ്കളുടെ കൈവശം സ്വതന്ത്ര ചിത്രങ്ങൾ ഉണ്ടെങ്കിൽ ദയവായി അത് വിക്കിപീഡിയയിലേക്ക് അപ്‌ലോഡ് ചെയ്യുകയും ലേഖനത്തിൽ ചേർക്കുകയും ചെയ്യുക.

മലയാളചലച്ചിത്രരംഗത്ത് 1980-കളിൽ സജീവമായിരുന്ന ഒരു നടിയും ഡബ്ബിംഗ് കലാകാരിയുമായിരുന്നു ലക്ഷ്മി കൃഷ്ണമൂർത്തി. സിനിമാരംഗത്ത് ലക്ഷ്മി ചേച്ചി എന്ന പേരിൽ അറിയപ്പെട്ടിരുന്ന അവർ 1970-ൽ പുറത്തിറങ്ങിയ സംസ്കാര എന്ന കന്നഡ സിനിമയിലൂടെയാണ് ചലച്ചിത്രരംഗത്തെത്തിയത്. ആകാശവാണിയിലെ ആദ്യ മലയാളം വാർത്താവതാരികയുമാണവർ.

ലക്ഷ്മി കൃഷ്ണമൂർത്തി
ജനനം	ലക്ഷമിദേവി 1928 ചാലപ്പുറം, കോഴിക്കോട്
മരണം	2018 നവംബർ 10 ചെന്നൈ, തമിഴ്നാട്
ദേശീയത	ഭാരതം
തൊഴിൽ	അഭിനേത്രി, റേഡിയോ അനൗൺസർ, വാർത്താവതാരിക, ഡബ്ബിംഗ് കലാകാരി
അറിയപ്പെടുന്നത്	പഞ്ചാഗ്നി, പിറവി, വാസ്തുഹാര
ജീവിതപങ്കാളി(കൾ)	കൃഷ്ണമൂർത്തി
കുട്ടികൾ	2
മാതാപിതാക്ക(ൾ)	മുല്ലശ്ശേരി ഗോവിന്ദമേനോൻ, ചെങ്ങളത്ത് ദേവകിയമ്മ

ജീവിതരേഖ

1928-ൽ കോഴിക്കോട് ചാലപ്പുറത്ത് മുല്ലശ്ശേരി ഗോവിന്ദമേനോന്റേയും ചെങ്ങളത്ത് ദേവകിയമ്മയുടെയും മകളായി നാടകം, കഥകളി, നൃത്തം തുടങ്ങി കലാപാരമ്പര്യമുള്ള കുടുംബത്തിലായിരുന്നു ലക്ഷ്മിയുടെ ജനനം. മദ്രാസ് പ്രസിഡൻസ് കോളേജിൽ നിന്ന് ബിരുദം നേടിയ ശേഷം 1950-ൽ കോഴിക്കോട് ആകാശവാണിയിൽ ചേർന്ന് ആർട്ടിസ്റ്റ് കം അനൗൺസർ എന്നീ പദവികളിൽ പ്രവർത്തനമാരംഭിച്ചു. ഇക്കാലയളവിൽ തിക്കോടിയനോടൊപ്പം ചേർന്ന് അവതരിപ്പിച്ച ബാലരംഗവും ലക്ഷമി നാണിയമ്മയായി എത്തിയ നാട്ടിൻപുറവും ഏറെ ശ്രദ്ധ നേടിയിരുന്നു. ആകാശവാണിയിൽ തന്നെ ഉദ്യോഗസ്ഥനായ കൃഷ്ണമൂർത്തിയെ വിവാഹം ചെയ്തതിന് ശേഷം ഡൽഹി ആകാശവാണി നിലയത്തിൽ വാർത്താവതാരികയായി പ്രവർത്തിച്ചു. പിന്നീട് ചെന്നൈയിലും അമേരിക്കയിലും കുറച്ചുകാലം അദ്ധ്യാപികയായും ലക്ഷ്മി സേവനം ചെയ്തിരുന്നു.

ചലച്ചിത്രജീവിതം

നിരവധി നാടകങ്ങളിൽ അഭിനയിച്ച ലക്ഷ്മി 1970-ൽ പുറത്തിറങ്ങിയ പട്ടാഭിരാമ റെഡ്ഡിയുടെ സംസ്കാര എന്ന കന്നഡ സിനിമയിലൂടെയാണ് ചലചിത്രരംഗത്തെത്തിയത്. ഗിരീഷ് കർണാട്, സ്നേഹലത റെഡ്ഡി തുടങ്ങിയവർ അഭിനയിച്ച ഈ ചിത്രം മികച്ച സിനിമയ്ക്കുള്ള ദേശീയ ചലച്ചിത്ര പുരസ്‌കാരം നേടിയിരുന്നു.

1986-ൽ എം.ടി.യുടെ രചനയിലുള്ള പഞ്ചാഗ്നി എന്ന സിനിമയിൽ ഗീതയുടെ അമ്മയായുള്ള വേഷം ചെയ്താണ് അവർ മലയാളചലച്ചിത്രരംഗത്ത് അരങ്ങേറ്റം കുറിക്കുന്നത്. എം.ടി.യുടെ തന്നെ നാലുകെട്ട് എന്ന നോവലിനെ ആധാരമാക്കി ദൂരദർശൻ സംപ്രേഷണം ചെയ്തിരുന്ന ടെലിസീരിയലിലെ കഥാപാത്രം ശ്രദ്ധിക്കപ്പെട്ടിരുന്നു. സീരിയൽ രംഗത്തെ പ്രമുഖനായ മധുമോഹന്റെ മലയാളം സീരിയലുകളിലെ സ്ഥിര സാന്നിധ്യമായിരുന്നു ലക്ഷ്മി. ഷാജി എൻ കരുൺ, ഹരിഹരൻ, ജി. അരവിന്ദൻ, ടി. വി. ചന്ദ്രൻ, മണിരത്നം, സിബി മലയിൽ തുടങ്ങി നിരവധി പ്രശസ്ത സംവിധായകരുടേതായി ഇരുപതോളം സിനിമകളിൽ അവർ അഭിനയിച്ചിട്ടുണ്ട്.

മരണം

2018 നവംബർ 10-ന് വാർദ്ധക്യസഹജമായ അസുഖങ്ങളെത്തുടർന്ന് ചെന്നൈയിലെ സ്വകാര്യ ആശുപത്രിയിൽ വെച്ച് ലക്ഷ്മി അന്തരിച്ചു.

പ്രധാന ചലച്ചിത്രങ്ങൾ

No.	വർഷം	സിനിമ	ഭാഷ	സംവിധാനം	പ്രത്യേകത
1	1970	സംസ്കാര	കന്നഡ	പട്ടാഭിരാമ റെഡ്ഡി	ആദ്യ ചലച്ചിത്രം
2	1986	പഞ്ചാഗ്നി	മലയാളം	ഹരിഹരൻ	ആദ്യ മലയാളചലച്ചിത്രം
3	1988	പിറവി	മലയാളം	ഷാജി എൻ കരുൺ
4	1991	വാസ്തുഹാര	മലയാളം	ജി. അരവിന്ദൻ
5	1993	പൊന്തൻമാട	മലയാളം	ടി. വി. ചന്ദ്രൻ
6	1996	ഈ പുഴയും കടന്ന്	മലയാളം	കമൽ
7	2002	കന്നത്തിൽ മുത്തമിട്ടാൽ	തമിഴ്	മണിരത്നം
8	2007	ബിഫോർ ദ റെയിൻസ്	ഇംഗ്ലീഷ്	സന്തോഷ് ശിവൻ
9	2009	കേശു	മലയാളം	ശിവൻ	അവസാനമായി അഭിനയിച്ച ചലച്ചിത്രം

പുറത്തേയ്ക്കുള്ള കണ്ണികൾ

• ഇന്റർനെറ്റ് മൂവി ഡാറ്റാബേസിൽ നിന്ന് ലക്ഷ്മി കൃഷ്ണമൂർത്തി
• മലയാളം മൂവി ഡാറ്റാബേസിൽ നിന്ന്