വിക്കിപീഡിയ

ലൈംഗിക വിദ്യാഭ്യാസം

വിദ്യാഭ്യാസ പദ്ധതിയിലെ മനുഷ്യലൈംഗികതയുമായി (Sexuality) ബന്ധപ്പെട്ട ഭാഗത്തെയാണ് ശാസ്ത്രീയ ലൈംഗിക വിദ്യാഭ്യാസം (സെക്സ്‌ എഡ്യൂക്കേഷൻ) അഥവാ ലൈംഗികാരോഗ്യ വിദ്യാഭ്യാസം (Sexual Health Education) എന്നതുകൊണ്ട് ഉദ്ദേശിക്കുന്നത്. വാസ്തവത്തിൽ ഇതൊരു ആരോഗ്യ ബോധവൽക്കരണം അഥവാ ഹെൽത്ത്‌ എഡ്യൂക്കേഷൻ കൂടിയാണ്. ചിലയിടങ്ങളിൽ ലൈംഗിക- ജീവിത നൈപുണീ വിദ്യാഭ്യാസം (Sexuality & Life Skill Education) അല്ലെങ്കിൽ ബന്ധങ്ങളും, ലൈംഗികവും, ആരോഗ്യപരവുമായ വിദ്യാഭ്യാസം (Relationships, Sex and Health Education) എന്നറിയപ്പെടുന്നു. പ്രായത്തിന് അനുസരിച്ചു കുട്ടികൾക്ക് നിർബന്ധമായും ഇത്തരം അറിവുകൾ ശാസ്ത്രീയമായി നൽകേണ്ടതുണ്ട് എന്ന് വിദഗ്ദർ അഭിപ്രായപ്പെടുന്നു.

ലൈംഗികത, ബന്ധങ്ങൾ എന്നിവയെ പറ്റിയുള്ള ശാരീരിക, മാനസിക, ആരോഗ്യ, സാമൂഹിക, ധാരണപരമായ വശങ്ങളെ കുറിച്ച് കുട്ടികളെ പഠിപ്പിക്കുവാൻ, പാഠ്യ പദ്ധതിയുടെ ഭാഗമായി നൽകുന്ന ഒരു പരിശീലന പ്രക്രിയയാണ് സമഗ്ര ലൈംഗിക വിദ്യാഭ്യാസം. സ്‌കൂളുകളിൽ പോകുവാൻ സാധിക്കാത്ത കുട്ടികളെ ലക്ഷ്യംവച്ചുള്ള പ്രവർത്തനങ്ങളും ഇതിന്റെ ഭാഗമായി ഉണ്ട്. കുട്ടികൾക്ക് വേണ്ടിയുള്ള അന്താരാഷ്ട്ര സംഘടനയായ യൂണിസഫ് (UNICEF), ലോകാരോഗ്യ സംഘടന (WHO) തുടങ്ങിയവ ഇതിന്റെ പ്രാധാന്യത്തെ പറ്റിയും, ഉൾക്കൊള്ളിക്കേണ്ട വിഷയങ്ങളെ പറ്റിയും സമഗ്രമായി പ്രതിപാദിക്കുന്നുണ്ട്. ഇംഗ്ലണ്ടിലെ എല്ലാ സെക്കൻഡറി സ്കൂളുകളിലും ബന്ധങ്ങൾ (Relationship), ലൈംഗികത (Sexuality), ആരോഗ്യ വിദ്യാഭ്യാസം (Health education) എന്നിവ പഠിപ്പിക്കേണ്ടത് നിർബന്ധമാണ്, അതേസമയം 2020 സെപ്റ്റംബർ മുതൽ പ്രൈമറി സ്കൂളുകളിൽ ബന്ധ വിദ്യാഭ്യാസം (Relationship education) നിർബന്ധമാണ്. ചില രാജ്യങ്ങളിൽ കോളേജുകളിലും ഇത്തരം സംവിധാനങ്ങൾ ഏർപ്പെടുത്തിയിട്ടുണ്ട്.

കൗമാരക്കാർക്കും, പ്രായപൂർത്തി ആയവർക്കും ശാസ്ത്രീയമായ ലൈംഗികാരോഗ്യ വിദ്യാഭ്യാസം നൽകാതിരിക്കുന്നത് ഏറെ അപകടകരമായി വികസിത രാജ്യങ്ങൾ കരുതുന്നു. ഇത്തരം സാഹചര്യത്തിൽ ആളുകളിൽ ലൈംഗിക ബന്ധത്തിലൂടെ പകരുന്ന രോഗങ്ങളെയും, ഗർഭ നിരോധന മാർഗങ്ങളെയും, സുരക്ഷിതവും തൃപ്തികരവുമായ ലൈംഗികതയെ സംബന്ധിച്ച അറിവില്ലായ്മ കാരണം ആഗ്രഹിക്കാത്ത ഗർഭധാരണവും, എയ്‌ഡ്‌സ്‌ ഉൾപ്പെടെയുള്ള രോഗങ്ങൾ പകരുവാനും സാധ്യതയുണ്ട്. സ്ത്രീകളുടെയും കുട്ടികളുടെയും സുരക്ഷിത്വവുമായും ഇത് ബന്ധപെട്ടു കിടക്കുന്നു. ലൈംഗിക ബന്ധത്തിന് ആവശ്യമായ സമ്മതത്തെ പറ്റിയും (consent) പീഡന ശ്രമങ്ങളെ തിരിച്ചറിയേണ്ടതിനെ പറ്റിയും ലൈംഗികാരോഗ്യ വിദ്യാഭ്യാസത്തിലൂടെ ശാസ്ത്രീയമായ ബോധവൽക്കരണം നൽകേണ്ടതുണ്ട്. ഇത് പീഡന ശ്രമങ്ങളെ ചെറുക്കാൻ ആവശ്യമാണ്. [1][2][3][4][5].[6]

ലക്ഷ്യം

തിരുത്തുക

ബന്ധങ്ങളും ലൈംഗിക ആരോഗ്യവുമായും ബന്ധപ്പെട്ട ശാസ്ത്രീയമായ അറിവ് നൽകുന്നത് വഴി ശരിയായ മനോഭാവം ഉണ്ടാവുകയും, കഴിവുകൾ വർധിപ്പിക്കുകയും, അവരെ ശാക്തീകരിക്കുകയും ചെയ്യുക.

പരസ്പര ബഹുമാനത്തിൽ അധിഷ്ഠിതമായ, വ്യക്തിഗത, സാമൂഹിക ബന്ധങ്ങൾ സൃഷ്ടിക്കാനും, സുരക്ഷിതമായ ബന്ധങ്ങൾ തെരെഞ്ഞെടുക്കാനും, നല്ല കുടുംബം കെട്ടിപ്പെടുക്കാനും അവരെ സഹായിക്കുക.

തൻ്റേയും മറ്റുള്ളവരുടെയും അവകാശങ്ങൾ തിരിച്ചറിയാനും, അത് സംരക്ഷിക്കാനും അവരെ പ്രാപ്തരാക്കുക.

സുരക്ഷിതമല്ലാത്ത ലൈംഗികബന്ധം ഒഴിവാക്കാനും, സുരക്ഷിതമല്ലാത്ത ലൈംഗികബന്ധം വഴി പകരുന്ന രോഗങ്ങൾ വരാതെ സൂക്ഷിക്കാനും, ആഗ്രഹിക്കാത്ത ഗർഭധാരണം ഉണ്ടാകാതിരിക്കുവാനും, ലൈംഗിക പീഡനങ്ങളെ ചെറുക്കുവാനും അവരെ കഴിവുള്ളവരാക്കുക.

ജീവിതത്തിൽ എടുക്കുന്ന തീരുമാനങ്ങൾ നമ്മളെയും മറ്റുള്ളവരെയും എങ്ങനെ ബാധിക്കുമെന്ന് മനസിലാക്കാൻ സഹായിക്കുക.

അങ്ങനെ സന്തുഷ്ടമായ ഒരു വ്യക്തി ജീവിതവും സാമൂഹിക ബന്ധങ്ങളും സുരക്ഷിതവും സന്തോഷകരവുമായ ജീവിതവും ഉറപ്പാക്കുക[7][8].

പ്രത്യേകതകൾ

തിരുത്തുക

ലൈംഗികതയെ സംബന്ധിച്ച് എന്തെങ്കിലുമൊക്കെ കുട്ടികൾക്ക് പറഞ്ഞു നൽകുന്നതല്ല സമഗ്ര ലൈംഗികത വിദ്യാഭ്യാസ പദ്ധതി.

ശാസ്ത്രീയമായിരിക്കണം: ശാസ്ത്രീയമായി കൃത്യമായ കാര്യങ്ങൾ വേണം പഠിപ്പിക്കുവാൻ.

സമഗ്രമായിരിക്കണം- കേവലം ലൈംഗിക അവയവങ്ങളെ കുറിച്ചും ലൈംഗിക പ്രക്രിയയെ കുറിച്ചും മാത്രം പഠിപ്പിച്ചാൽ പോരാ, മറിച്ചു ബന്ധങ്ങളെപ്പറ്റിയും ലൈംഗികതയുടെ എല്ലാ വശങ്ങളും, ലൈംഗികബന്ധത്തിനുള്ള സമ്മതം, സുരക്ഷിതമല്ലാത്ത ലൈംഗിക ബന്ധത്തിലൂടെ പകരുന്ന രോഗാണുബാധകളും, പ്രതിരോധ രീതികളും, ഗർഭനിരോധന മാർഗങ്ങളും, ആർത്തവം, ആർത്തവവിരാമം തുടങ്ങിയവ അതിൽ ഉൾപ്പെടണം.

പ്രായത്തിനും ബൗദ്ധിക വളർച്ചക്കും അനുസരിച്ചാവണം- ഓരോ പ്രായത്തിലുള്ളവർക്കും മനസിലാക്കാൻ സാധിക്കുന്ന വിവരങ്ങൾ വേണം ഉൾപ്പെടുത്താൻ. ചെറുപ്രായത്തിൽ തുടങ്ങി വളർച്ചക്ക് അനുസരിച്ചു വർദ്ധനവ് വരുത്തണം.

പാഠ്യപദ്ധതിയുടെ ഭാഗമാവണം- വർഷം ഒന്നോ രണ്ടോ മണിക്കൂർ മാറ്റിവെച്ചാൽ പോരാ, പാഠ്യപദ്ധതിയുടെ ഭാഗമായി വേണം ഇത് നടപ്പിലാക്കാൻ .

മനുഷ്യ അവകാശങ്ങൾക്കു പ്രാധാന്യം നൽകുന്ന രീതിയിൽ ആവണം.

ലിംഗസമത്വം ഉറപ്പാക്കുന്നത് ആയിരിക്കണം. സ്ത്രീകളുടെയും ലിംഗലൈംഗിക ന്യൂനപക്ഷങ്ങളുടെയും തുല്യമായി ഉൾക്കൊള്ളുന്നതായിരിക്കണം.

സാമൂഹിക പ്രശ്നങ്ങളെ കണക്കിൽ എടുക്കണം

കുട്ടികളുടെ അറിവിലും കാഴ്ചപ്പാടിലും മാറ്റം വരുത്താൻ സാധിക്കുന്നതാവണം[9][10].

പല രീതിയിൽ ഇത് ചെയ്യാവുന്നതാണ്. അവ താഴെ കൊടുക്കുന്നു.

(1) കൗമാരപ്രായക്കാരായ സ്കൂൾ/ കോളേജ് വിദ്യാർഥികൾക്കായുള്ള ശാസ്ത്രീയമായി ബന്ധങ്ങളെയും ലൈംഗികാരോഗ്യത്തെയും പറ്റിയുള്ള സമഗ്ര ആരോഗ്യ വിദ്യാഭ്യാസം. ഗർഭ നിരോധന മാർഗങ്ങൾ, ലൈംഗിക പീഡനം, പീഡന ശ്രമങ്ങളെ തിരിച്ചറിയാനുള്ള നല്ലതും ചീത്തയുമായ സ്പർശനം, ലൈംഗിക ബന്ധത്തിനുള്ള സമ്മതം, പോക്സോ ഉൾപ്പടെയുള്ള നിയമങ്ങൾ, സ്ത്രീ സുരക്ഷാ നിയമങ്ങൾ എന്നിവയെപ്പറ്റിയുള്ള ബോധവൽക്കരണവും ഇതിൽ ഉൾപ്പെടുന്നു.

(2) അവിവാഹിതർക്കായി വിവാഹപൂർവ കൗൺസിലിംഗ്, വിവാഹം കഴിഞ്ഞവർക്കായി പോസ്റ്റ്‌ മാര്യേജ് കൗൺസിലിംഗ്, കുടുംബാസൂത്രണ/ ഗർഭനിരോധന മാർഗങ്ങൾ, ദമ്പതികൾക്കുള്ള കൗൺസിലിംഗ്, ജൻഡർ ബോധവൽക്കരണം, ലിംഗ- ലൈംഗികന്യൂനപക്ഷങ്ങളെ പറ്റിയുള്ള ബോധവൽക്കരണം (LGBTIA+), ലിംഗ സമത്വം തുടങ്ങിയവ.

(3) എച്ച് ഐ വി-എയ്ഡ്സ് /എസ് റ്റി ഡി ബോധവത്കരണം. ഇതിൽ രോഗികളുമായുള്ള സുരക്ഷിതമല്ലാത്ത ലൈംഗികബന്ധം വഴി പകരുന്ന HIV അല്ലെങ്കിൽ എയ്ഡ്സ്, HPV അണുബാധ, ഗർഭാശയമുഖ കാൻസർ, ഹെർപ്പിസ്, ഗൊണേറിയ, സിഫിലിസ്, പെൽവിക്ക് ഇൻഫെക്ഷൻ, ചിലതരം ഹെപ്പറ്റെറ്റിസ് എന്നിവ ഉൾപ്പെടുന്നു.

എപ്പോഴാണ് ആരംഭിക്കേണ്ടത്?

തിരുത്തുക

എത്ര നേരത്തേ തുടങ്ങാനാവുമോ അത്രയും നല്ലത്. ആധുനിക കാലത്ത് അറിവുകൾ ഒരാളിലേക്കെത്തുന്നത് ആർക്കും തടയാനാവില്ല. വിവരങ്ങളുടെ കുത്തൊഴുക്കിൽ ഏതാണ് ശരി ഏതാണ് തെറ്റ് എന്ന് തിരിച്ചറിയാതെ പകച്ച് നിൽക്കുകയാണ് നമ്മളിന്ന്. ഇവിടെയാണ് തെറ്റായ വിവരങ്ങളെത്തുന്നതിലും മുൻപേ ശരിയായ വിവരങ്ങൾ - വിദഗ്ധരിൽ നിന്നും - ശരിയായ രീതിയിലെത്തിക്കേണ്ടത്. കുട്ടിക്കാലം മുതലേ അതത് പ്രായത്തിനനുസരിച്ചുള്ള ലൈംഗികതാ വിദ്യാഭ്യാസവും ആരംഭിക്കണം. അത് കൗമാരത്തിലും യൗവ്വനത്തിലും മാത്രമല്ല പിന്നീടങ്ങോട്ടും തുടരുകയും വേണം. കാരണം, മനുഷ്യൻ ഓരോ ദിവസവും മാറിക്കൊണ്ടിരിക്കുകയാണ്. ഓരോ കാലഘട്ടത്തിലും മനുഷ്യനും മനുഷ്യബന്ധങ്ങളും നേരിടുന്ന പ്രശ്നങ്ങളനുസരിച്ച് ലൈംഗികതാ വിദ്യാഭ്യാസം സംവദിക്കുന്ന വിഷയങ്ങളും മാറേണ്ടത് അനിവാര്യമാണ്[11][12].

പ്രായവും പരിശീലനവും

തിരുത്തുക

ഓരോ പ്രായത്തിനും ബൗദ്ധിക വളർച്ചക്കും അനുസരിച്ചു വേണ്ട അറിവുകളാണ് നൽകുക. ഇതിനായി കുട്ടികളെ പ്രായത്തിന്റെ അടിസ്ഥാനത്തിൽ നാലായി തിരിച്ചിട്ടുണ്ട്. 5-8 വരെ, 9-12വരെ, 12-15 വരെ, 15-18 വരെ. 5 വയസിനു താഴെയുള്ള കുട്ടികൾക്കും അവർക്കു മനസിലാകുന്ന ഭാഷയിൽ പല കാര്യങ്ങളും പറഞ്ഞുകൊടുക്കാൻ പറ്റും[13].

കൂട്ടുകാരിൽ നിന്നും കിട്ടുന്ന അറിവ് പോരേ?

തിരുത്തുക

മാതാപിതാക്കൾ, ബന്ധുക്കൾ, കൂട്ടുകാർ എന്നിവർ എല്ലാവരും ലൈംഗിക വിദ്യാഭ്യാസത്തിന്റെ പ്രധാനഭാഗങ്ങൾ തന്നെയാണ്. പക്ഷേ, അതിവേഗം മാറുന്ന വിവര വിസ്ഫോടനത്തിന്റെ യുഗത്തിൽ ഇവർക്ക് മാത്രമായി എപ്പോഴും ശരിയായ അറിവ് ശരിയായ സമയത്ത് നൽകാനായെന്ന് വരില്ല. വ്യത്യസ്ത സംസ്ക്കാരങ്ങളുള്ള മനുഷ്യരോട് ഇടപെടേണ്ട സാഹചര്യങ്ങൾ, അതിവേഗ വിവരവിനിമയം, പ്രായപൂർത്തി ആയവർക്ക് വേണ്ടിയുള്ള ചിത്രങ്ങൾ, ലൈംഗിക രോഗങ്ങൾ, ഗർഭച്ഛിദ്രം, വന്ധ്യത, ഗർഭനിരോധനമാർഗങ്ങൾ, ലൈംഗികാതിക്രമങ്ങൾ, ലൈംഗികതയോടുള്ള മാറുന്ന സമീപനം, മാറിവരുന്ന ലൈംഗിക സ്വഭാവങ്ങൾ ഇങ്ങനെയുള്ള ഒരുപാട് സങ്കീർണമായ കാര്യങ്ങൾ മൂലം ലൈംഗികതാ വിദ്യാഭ്യാസം ഒരു വിദഗ്ധന്റെ സഹായം ആവശ്യമുള്ള മേഖലയാണ്. പോരാത്തതിന് മാതാപിതാക്കൾ പലർക്കും ശാസ്ത്രീയമായ ലൈംഗികതാ വിദ്യാഭ്യാസം ലഭിച്ചിട്ടുമില്ല. അവർക്കറിയാവുന്ന വിവരങ്ങൾ മടികൂടാതെ കാര്യക്ഷമമായി കുട്ടികളുമായി പങ്കുവക്കാനും പലർക്കുമാവുന്നുമില്ല. അധ്യാപകർ, ആരോഗ്യ പ്രവർത്തകർ, ഡോക്ടർമാർ, പ്രത്യേക പരിശീലനം സിദ്ധിച്ച വ്യക്തികൾ, സംഘടനകൾ, മനഃശാസ്ത്രജ്ഞർ തുടങ്ങിയവർക്ക് ഇത്തരം വിദ്യാഭ്യാസം നൽകുവാൻ സാധിക്കും[14][15].

വിമർശനങ്ങൾ

തിരുത്തുക

1. ലൈംഗികതാ വിദ്യാഭ്യാസം ലഭിച്ചാൽ കുട്ടികൾ നേരത്തേ ലൈംഗിക പ്രവർത്തനങ്ങളിലേർപ്പെടും.

ശാസ്ത്രീയ ലൈംഗികതാ വിദ്യാഭ്യാസം ലഭിക്കുന്നത് വഴി ലൈംഗിക ബന്ധത്തിലേർപ്പെടുന്ന കുറഞ്ഞപ്രായം ദേശീയ ശരാശരിയേക്കാൾ മാറുന്നില്ലെന്നാണ് ഫിൻലൻഡിലേയും എസ്റ്റോണിയയിലേയും മറ്റ് ലോക രാജ്യങ്ങളിലേയും പഠനങ്ങൾ പറയുന്നത്. മാത്രവുമല്ല കൂടുതൽ ഉത്തരവാദിത്വമുള്ള ലൈംഗിക ബന്ധങ്ങൾ ഉണ്ടാവുകയും ചെയ്യുന്നു.

2. കുട്ടികളുടെ 'നിഷ്കളങ്കത്വം' ഇല്ലാതാവുന്നു.

ശരിയായ അറിവ് ഒരു കുട്ടിയുടേയും 'നിഷ്കളങ്കത്വം' ഇല്ലാതാക്കില്ല. എന്ന് മാത്രവുമല്ല, മനുഷ്യ ബന്ധങ്ങളെക്കുറിച്ച് വ്യക്തമായി അറിയുന്ന ഒരു കുഞ്ഞിന് അവരോട് ശരിയല്ലാത്ത രീതിയിൽ പെരുമാറുന്നവരെ മനസ്സിലാക്കാനാവും. അപകടകരമായ സാഹചര്യങ്ങളും തിരിച്ചറിയാനാകും. അത്തരം സാഹചര്യങ്ങളെ എങ്ങിനെ കൈകാര്യം ചെയ്യണമെന്നും അവർ പഠിച്ചിട്ടുണ്ടാകും.

3. ലൈംഗികതാ വിദ്യഭ്യാസം ഞങ്ങളുടെ സംസ്ക്കാരത്തിനും മതത്തിനും ചേരാത്തതാണ്.

ലൈംഗികതാ വിദ്യാഭ്യാസം ഓരോ രാജ്യത്തേയും മത-സാംസ്ക്കാരിക യാഥാർത്ഥ്യങ്ങൾക്കനുസരിച്ച് ശാസ്ത്ര തത്വങ്ങൾ വളച്ചൊടിക്കാതെ അവതരണത്തിൽ മാറ്റങ്ങളുണ്ടാക്കി നടപ്പിലാക്കാവുന്നതാണ്.

4. ലൈംഗികതാ വിദ്യഭ്യാസത്തിന് മറ്റ് വിഷയങ്ങളേക്കാൾ കുറവ് പ്രാധാന്യം കൊടുത്താൽ മതി.

മറ്റു വിഷയങ്ങളുടെ അത്ര തന്നെയോ അതിലും കൂടുതലോ പ്രാധാന്യം ലൈംഗികതാ വിദ്യാഭ്യാസത്തിനുണ്ട്. മറ്റ് വിഷയങ്ങൾ അറിവിനെക്കുറിച്ച് സംസാരിക്കുമ്പോൾ ഈ വിഷയം നിങ്ങളുടെ ജീവിതത്തെക്കുറിച്ചും ബന്ധങ്ങളെക്കുറിച്ചുമൊക്കെയാണ് സംസാരിക്കുന്നത്. തന്നെതന്നെയും മറ്റുള്ളവരെയും ബഹുമാനത്തോടെ കാണുന്നതും എല്ലാ അർത്ഥത്തിലും ആരോഗ്യകരമായ മനുഷ്യബന്ധങ്ങൾ ഉണ്ടായിവരുന്നതും ഒരു സമൂഹത്തിന്റെ നിലനിൽപ്പിന് എത്ര അനിവാര്യമാണെന്നത് നമുക്ക് ചിന്തിക്കാവുന്നതല്ലേയുള്ളൂ.

5. കുട്ടികൾ ലൈംഗികതയെപ്പറ്റി സംസാരിക്കും. അത്തരം മാധ്യമങ്ങളിലേക്ക് ആകർഷിക്കപ്പെടും.

ആര് പറഞ്ഞ് കൊടുത്താലും ഇല്ലെങ്കിലും കുട്ടികൾ ഇതേപ്പറ്റി സംസാരിക്കുകയും തെറ്റായ ധാരാളം അറിവുകൾ സുഹൃത്ത് വലയത്തിൽ നിന്നും മാധ്യമങ്ങളിൽ നിന്നും അവർക്ക് ലഭിക്കുകയും ചെയ്യുന്നുണ്ട്. അതുകൊണ്ടാണ് ശരിയായ അറിവുകൾ ഇത്രത്തോളം അനിവാര്യമാവുന്നത്. പ്രായത്തിനനുസരിച്ചാണ് ഈ അറിവുകൾ പങ്കുവക്കുക. ഉദ്ദാഹരണത്തിന് 4 മുതൽ 6 വയസ്സുവരെയുള്ള കുട്ടികളോട് സൗഹൃദം, മനുഷ്യവികാരങ്ങൾ, ശരീരഭാഗങ്ങൾ, മനുഷ്യബന്ധങ്ങൾ ഇങ്ങനെ പറഞ്ഞ് തുടങ്ങി ഈ അടിത്തറക്ക് മുകളിലാണ് പ്രായമാകുന്നതിനനുസരിച്ച് ശരീരത്തിലെ മാറ്റങ്ങളെപ്പറ്റിയും ലൈംഗികതയെപ്പറ്റിയും പറഞ്ഞുകൊടുക്കുന്നത്. മാറ്റങ്ങൾ ഒറ്റയടിക്ക് സംഭവിക്കുകയല്ല ഒരുപാട് വർഷങ്ങളെടുത്ത് പതിയെയുണ്ടാവുന്നതാണ്.

കപട സാദാചാരബോധവും, മതങ്ങളുടെയും സാമൂഹിക വ്യവസ്ഥതയുടെയും സ്വാധീനവും മൂലം ഇന്നും പല രാജ്യങ്ങളിലും കുട്ടികൾക്ക് ശാസ്ത്രീയമായ ലൈംഗികത വിദ്യാഭ്യാസം ലഭിക്കുന്നില്ല. പക്ഷേ എല്ലാവരും‌ മാറി ചിന്തിക്കേണ്ട സമയമായിരിക്കുന്നു. നമ്മുടെ അധികാരികളുടെയും സമൂഹത്തെയും നമ്മൾ ബോധവൽക്കരിക്കേണ്ടതുണ്ട്[16][17].

എന്തൊക്കെ ഉൾപ്പെടുന്നു

തിരുത്തുക

ഇതിൽ 8 ആശയങ്ങളാണ് പ്രധാനമായും ചർച്ച ചെയ്യുക

*മാനുഷിക ബന്ധങ്ങൾ.

*ലൈംഗികത- ആരോഗ്യം, മൂല്യങ്ങൾ, അവകാശങ്ങൾ.

*ലിംഗഭേദം (ജെന്റർ) എന്താണെന്ന് മനസിലാക്കുക.

*ലൈംഗിക അതിക്രമങ്ങൾ, ബലാത്സംഗം, ചൂഷണം, സുരക്ഷ, നിയമ ബോധവൽക്കരണം.

*മനുഷ്യ ശരീരവും അതിന്റെ വളർച്ചയും പരിണാമവും. ഉദാ: ലിംഗം, യോനി, ഗർഭപാത്രം, വൃഷണം തുടങ്ങിയ ജനനേന്ദ്രിയങ്ങൾ, ആർത്തവം, ആർത്തവവിരാമം തുടങ്ങിയവ.

*ലൈംഗിക- പ്രത്യുല്പാദന ആരോഗ്യം, കുടുംബാസൂത്രണം, ഗർഭ നിരോധന മാർഗങ്ങൾ പ്രത്യേകിച്ച് കോണ്ടം, ഗർഭം, ഗർഭകാലവും പോഷകാഹാരവും, പ്രസവം, ഗർഭഛിദ്രം, ലൈംഗികബന്ധത്തിലൂടെ പകരുന്ന രോഗങ്ങൾ, എയ്‌ഡ്‌സ്‌ തുടങ്ങിയവ

*ലൈംഗികവും പ്രത്യുൽപാദനപരവുമായ ആരോഗ്യത്തിനും ക്ഷേമത്തിനും വേണ്ട നൈപുണ്യങ്ങൾ

*ലൈംഗികത, ലൈംഗികപരമായ പെരുമാറ്റങ്ങൾ

ഈ ഓരോ വിഷയത്തിലുമുള്ള പരിശീനലനം വഴിയായി കുട്ടികളുടെ അറിവ് വർധിപ്പിക്കുക, അതുവഴി അവരുടെ അവബോധത്തിലും അതുപോലെ കഴിവുകളിലും അങ്ങനെ അവരുടെ പെരുമാറ്റത്തിലും മാറ്റം കൊണ്ടുവരിക. ഇതാണ് സമഗ്ര ലൈംഗികതാ വിദ്യാഭ്യാസ പദ്ധതിവഴി ലക്ഷ്യമിടുന്നത്.

മറ്റൊരു തരത്തിൽ ലൈംഗികവും പ്രത്യുത്പാദനപരവുമായ ആരോഗ്യവും അവകാശങ്ങളും (Sexual and Reproductive Health & Rights ), ലൈംഗിക ചായ്‌വ് (Sexual Orientation), ലൈംഗിക രോഗങ്ങളും (STDs) പ്രധിരോധ മാർഗങ്ങളും, പ്രണയം, സ്ത്രീകളുടെയും കൗമാരക്കാരുടെയും പ്രശ്നങ്ങൾ, ലൈംഗികന്യൂനപക്ഷങ്ങളുടെ പ്രത്യേകതകളും അവകാശങ്ങളും (LGBTIA Rights), സുരക്ഷിത ലൈംഗികബന്ധം (Safe Sex), ഗർഭനിരോധന മാർഗങ്ങൾ, ലൈംഗിക സംയമനം, ബന്ധങ്ങൾ, ലൈംഗികബന്ധത്തിനുള്ള സമ്മതം (Consent), ലൈംഗിക-മാനസിക പ്രശ്നങ്ങൾ, ലൈംഗിക കുറ്റകൃത്യങ്ങളും അവയെ ചെറുക്കാനുള്ള മാർഗങ്ങളും നിയമവും, ലിംഗനീതി, അലൈംഗികത (Asexuality), ബന്ധങ്ങൾ തുടങ്ങിയ മനുഷ്യ ലൈംഗികതയുമായി ബന്ധപ്പെട്ട അനവധി പ്രശ്നങ്ങൾ ഈ വിഭാഗത്തിന്റെ പരിധിയിൽ വരുന്നു ( At secondary school relationships and sex education covers content on a wider range of key topics including consent, sexual exploitation, online abuse, grooming, coercion, harassment, rape, domestic abuse, forced marriage, honour-based violence and FGM, and how these can affect current and future relationships).[18] [19][20]

ലൈംഗിക വിദ്യാഭ്യാസത്തിന്റെ പ്രാധാന്യം

തിരുത്തുക

അനാവശ്യ ഗർഭധാരണവും എയിഡ്സ്, ഹെർപ്പിസ്, ഹെപ്പറ്റൈറ്റിസ് ബി തുടങ്ങിയ ലൈംഗിക രോഗങ്ങളുടെ വ്യാപനം തടയാനും, ശരിയായ കുടുംബാസൂത്രണ മാർഗങ്ങൾ തിരഞ്ഞെടുക്കാനും ജനസംഖ്യ നിയന്ത്രിക്കാനും ബന്ധങ്ങളും ലൈംഗികാരോഗ്യത്തെയും പറ്റിയുള്ള വിദ്യാഭ്യാസം സഹായകരമായി കണക്കാക്കപ്പെടുന്നു. പ്രായത്തിന് യോജിച്ച രീതിയിൽ ശാസ്ത്രീയമായ ലൈംഗിക വിദ്യാഭ്യാസം നൽകുന്നത് വഴി കുട്ടികൾക്ക് ലൈംഗിക ചൂഷണങ്ങളെ തിരിച്ചറിയുവാനും, കൗമാരക്കാരിൽ ശാരീരികവും മാനസികവുമായ മാറ്റങ്ങളെ മനസ്സിലാക്കുവാനും, സഹായകരമാണ് എന്ന് വിദഗ്ദ്ധർ അഭിപ്രായപ്പെടുന്നു. ലിംഗസമത്വത്തിൽ ഊന്നിയ ശാസ്ത്രീയ ബോധവൽക്കരണത്താൽ ബലാത്സംഗം മുതലായ കുറ്റകൃത്യങ്ങളും, ദാമ്പത്യകലഹങ്ങളും, ബാലപീഡനങ്ങളും ഒരു പരിധിവരെ നിയന്ത്രിക്കാൻ സഹായിക്കും എന്ന് പഠനങ്ങൾ ചൂണ്ടികാട്ടുന്നു. ദമ്പതികൾക്ക് ശാസ്ത്രീയമായ ലൈംഗിക വിദ്യാഭ്യാസം കൊടുക്കുക വഴി സന്തോഷകരമായ ലൈംഗിക ജീവിതം നയിക്കാൻ സാധിക്കുന്നു. ഇത് തൃപ്തികരമായ ദാമ്പത്യ ജീവിതത്തിന് ഒരു പ്രധാന ഘടകമാണ്. വിവാഹപൂർവ കൗൺസിലിംഗ്, വിവാഹ ശേഷമുള്ള കൗൺസിലിംഗ് തുടങ്ങിയവ ഇതിന് ഉദാഹരണമാണ്. [21][22][23].

ലൈംഗിക ബന്ധത്തിനുള്ള സമ്മതം

തിരുത്തുക

ഏതൊരു ലൈംഗികമായ ഇടപെടലിലും പങ്കാളിയുടെ അനുമതി (Sexual Consent) വളരെ പ്രധാനമാണ്. ഇത് ലൈംഗികബന്ധത്തിനുള്ള സമ്മതം എന്നറിയപ്പെടുന്നു. അത് ബലം പ്രയോഗിച്ചോ നിർബന്ധിച്ചോ അധികാരം ഉപയോഗിച്ചോ പ്രലോഭിപ്പിച്ചോ നേടിയെടുക്കേണ്ട ഒന്നല്ല. ലൈംഗിക ബന്ധത്തിൽ ഏർപ്പെടുന്നതിനിടെ പങ്കാളികളിൽ ആരെങ്കിലും ഇത് തുടരുന്നതിൽ താൽപര്യമില്ലെന്ന് പറഞ്ഞാൽ അത് മുഖവിലയ്‌ക്കെടുക്കണം. വ്യക്തികളുടെ മനസ് എപ്പോൾ വേണമെങ്കിൽ മാറാം. അതിനെ അംഗീകരിക്കാൻ ഓരോരുത്തരും ബാധ്യസ്ഥാണ്. ലൈംഗികബന്ധം തുടരുന്നതിൽ താൽപര്യമില്ലെന്ന് പറഞ്ഞാൽ പങ്കാളികൾ പരസ്പരം ഇത് മനസിലാക്കണം. പങ്കാളിയുടെ ശരീരഭാഷ ശ്രദ്ധിക്കേണ്ടത് അത്യാവശ്യമാണ്. ലൈംഗിക ബന്ധത്തിനിടെ പങ്കാളിക്ക് ഏതെങ്കിലും തരത്തിൽ ബുദ്ധിമുട്ട് തോന്നുന്നതായി ശരീരഭാഷയിൽ നിന്ന് മനസിലായാൽ അവിടെ നിർത്തുക. അതിനുശേഷം, അവരോട് സംസാരിക്കുക. എന്താണ് പ്രശ്‌നമെന്ന് തിരക്കുക. അൽപ്പ സമയം ഇടവേളയെടുക്കണമെന്ന് പങ്കാളി ആവശ്യപ്പെടുകയാണെങ്കിൽ അത് അംഗീകരിക്കുക. വിവിധ പൊസിഷനുകൾ ചെയ്യുമ്പോൾ അത് നിങ്ങളുടെ പങ്കാളിക്ക് കൂടി തൃപ്തി നൽകുന്നതാണോ എന്ന് ചോദിക്കണം. സ്വന്തം താൽപര്യത്തിനനുസരിച്ച് പൊസിഷനുകൾ പരീക്ഷിക്കുന്നത് തെറ്റാണ്.

കുട്ടികളുമായി മുതിർന്ന വ്യക്തികൾ നടത്തുന്ന ലൈംഗികബന്ധം അഥവാ പിഡോഫിലിയ (Pedophilia), ഉഭയ സമ്മതത്തോടെയല്ലാതെയുള്ള പീഡനവും ബലാത്സംഗത്തിന്റെ പരിധിയിൽ പെടുന്ന ഒന്നാണ്. പല രാജ്യങ്ങളിലും ഇവ കടുത്ത കുറ്റകൃത്യങ്ങളാണ്. ലൈംഗികബന്ധത്തിന് വ്യക്തിയുടെ സമ്മതം അതി പ്രധാനമാണ്. ഗർഭനിരോധന മാർഗങ്ങൾ ഉപയോഗിക്കാൻ ഉദ്ദേശിക്കുന്നുണ്ടെങ്കിൽ അത്, വദനസുരതം പോലെയുള്ള വിവിധ രീതികൾ എന്നിവയെല്ലാം പങ്കാളിയുമായി കൃത്യമായ ധാരണയിൽ എത്തേണ്ടത് ആവശ്യമാണ്. മുതിർന്ന വ്യക്തി കുട്ടികളുമായി നടത്തുന്ന ലൈംഗികബന്ധം ചൂഷണമാണെന്നും, ഇതവർക്ക് ശാരീരിക മാനസിക ബുദ്ധിമുട്ടുകൾ ഉണ്ടാക്കുമെന്നും, കുട്ടികളുടെ സമ്മതം മൂല്യവത്തല്ലെന്നും വിദഗ്ദ്ധർ ചൂണ്ടിക്കാട്ടുന്നു. അതിനാൽ തന്നെ 'പെടോഫിലിയ' എന്ന മനസ്സികാവസ്ഥയുള്ളവർ നടത്തുന്ന ബാലലൈംഗികപീഡനം കുറ്റകൃത്യമാണ്. പ്രായപൂർത്തിയാകാത്ത പെൺകുട്ടികൾ ഗർഭിണി ആകുന്നത് അമ്മയുടെയും കുഞ്ഞിന്റെയും ആരോഗ്യത്തെ അതീവ ഗുരുതരമായി ബാധിക്കാറുണ്ട്. വർധിച്ച മാതൃശിശുമരണനിരക്ക് കൗമാര ഗർഭധാരണത്തിന്റെ ഒരു പ്രധാന ദൂഷ്യഫലമാണെന്ന് ലോകാരോഗ്യ സംഘടന വ്യക്തമാക്കുന്നു. പ്രശ്നങ്ങൾ ഒഴിവാക്കാൻ പല വികസിത രാജ്യങ്ങളിലും പ്രായത്തിന് അനുസരിച്ചു ശാസ്ത്രീയമായ ലൈംഗികാരോഗ്യ വിദ്യാഭ്യാസം സ്കൂൾതലം മുതൽക്കേ നൽകി വരുന്നുണ്ട്.

വിദേശ രാജ്യങ്ങളിൽ

തിരുത്തുക

പല വികസിത രാജ്യങ്ങളിൽ നേരിട്ടും ഓൺലൈൻ വഴിയും മികച്ച രീതിയിൽ ബന്ധങ്ങളെയും ലൈംഗികാരോഗ്യത്തെയും പറ്റി വിദ്യാഭ്യാസവും ബോധവൽക്കരണവും നടപ്പാക്കിയിട്ടുണ്ട്. പ്രായത്തിന് യോജിച്ച രീതിയിൽ ഘട്ടഘട്ടമായാണ് ഇത് നടപ്പിലാക്കുന്നത്. അധ്യാപകരെ കൂടാതെ സെക്സ് തെറാപ്പിസ്റ്റ്, സെക്സോളജിസ്റ്റ്, സ്കൂൾ ഹെൽത്ത്‌ നഴ്‌സ്‌, സ്കൂൾ കൗൺസിലർ, ഡോക്ടർമാർ, മറ്റ് ആരോഗ്യപ്രവർത്തകർ എന്നിവരും ഇതിൽ പങ്കാളികളാകുന്നു. യൂറോപ്യൻ രാജ്യങ്ങളിൽ ബന്ധങ്ങളും ആരോഗ്യലൈംഗിക വിദ്യാഭ്യാസവും എന്ന ശാസ്ത്രീയമായ വിദ്യാഭ്യാസ പദ്ധതി നിലവിലുണ്ട്. ഇത് അവിടങ്ങളിൽ കൗമാര ഗർഭധാരണം, ലൈംഗികബന്ധത്തിലൂടെ പകരുന്ന രോഗാണുബാധകൾ, ലൈംഗിക അതിക്രമങ്ങൾ, പീഡനങ്ങൾ എന്നിവയുടെ തോത് കുറയാൻ ഇടയാക്കിയിട്ടുണ്ട്; മാത്രമല്ല ലൈംഗിക അതിക്രമങ്ങളോ മറ്റോ ഉണ്ടായാൽ ഇവ ചെറുക്കുവാനും അധികൃതരെ അറിയിക്കാനും ഇതവരെ പ്രാപ്തരാക്കുന്നു. അമേരിക്കൻ ഐക്യനാടുകൾ പോലെയുള്ള ചില മുൻനിര രാജ്യങ്ങളിൽ ഇത് പഠിക്കണോ വേണ്ടയോ എന്ന് കുട്ടിക്കോ രക്ഷിതാവിനോ തീരുമാനിക്കാം. ഇതിൽ പങ്കെടുക്കാൻ എല്ലാവരെയും അവർ നിർബന്ധിക്കുന്നില്ല. അതിനാൽ ഇത്തരം വിദ്യാഭ്യാസത്തിനു അവിടെ എതിർപ്പു കുറവാണ് അല്ലെങ്കിൽ എതിർപ്പിനെ മറികടക്കാൻ സാധിച്ചു എന്ന് പറയാം. നിരവധി യൂറോപ്യൻ രാജ്യങ്ങളിലെ പഠനങ്ങൾ തെളിയിക്കുന്നത് രാജ്യവ്യാപകമായി ലൈംഗികതാ വിദ്യാഭ്യാസം നടപ്പിലാക്കുന്നത് വഴി കൗമാര ഗർഭധാരണനിരക്കും, ഗർഭച്ഛിദ്രനിരക്കും, ലൈംഗിക രോഗനിരക്കും, എയ്ഡ്സ് അണുബാധയും 15-24 വയസ്സിനുള്ളിലുള്ളവരിൽ കുറക്കാനാകുന്നുവെന്നാണ്. ജീവിതത്തിലെയും ബന്ധങ്ങളിലെയും പ്രശ്നങ്ങൾ നേരിടാനുള്ള കഴിവും ആത്മവിശ്വാസവും കൂടുകയും ചെയ്യുന്നു. അങ്ങിനെ കൂടുതൽ അർത്ഥവത്തായ മനുഷ്യബന്ധങ്ങളുണ്ടാകുന്നു. ലിംഗസമത്വം വഴി കഷ്ടപ്പെടുന്ന ലൈംഗിക ന്യൂനപക്ഷങ്ങളേയും സ്ത്രീകളേയും കൂടുതൽ ശക്തിപ്പെടുത്താനും സമൂഹം തയ്യാറാക്കി വച്ചിരിക്കുന്ന ആൺബോധങ്ങൾ തൃപ്തിപ്പെടുത്തലല്ല ജീവിതമെന്ന് ആൺകുട്ടികളെ പഠിപ്പിക്കാനും ലൈംഗിക വിദ്യാഭ്യാസം വഴി സാധിക്കും. പരസ്പരം സ്നേഹിക്കുന്നതിനുപുറമേ പരസ്പര ബഹുമാനമുള്ള (Consensual) മനുഷ്യ ബന്ധങ്ങളുണ്ടായിവരും [24][25][26][27][28][29].

മുതിർന്നവർക്കും വേണം ലൈംഗിക വിദ്യാഭ്യാസം

തിരുത്തുക

കുട്ടികൾക്ക് മാത്രമല്ല മുതിർന്നവർക്കും ബന്ധങ്ങളെയും ലൈംഗികാരോഗ്യത്തെയും പറ്റിയുള്ള വിദ്യാഭ്യാസം ഏറെ അത്യാവശ്യമാണ്. വികസിത രാജ്യങ്ങളിൽ വിദഗ്ദർ നൽകുന്ന ഇത്തരം വിദ്യാഭ്യാസം ആരോഗ്യ മേഖല മുഖേനയും, സാമൂഹിക നീതി വകുപ്പ് മുഖാന്തിരവും, വനിതാ ശിശു ക്ഷേമ വകുപ്പ് മുഖാന്തിരവും നടപ്പിലാക്കി വരുന്നുണ്ട്. ആരോഗ്യകരവും തൃപ്തികരവുമായ ലൈംഗിക ജീവിതം നയിക്കേണ്ടതിന്റെ പ്രാധാന്യം, പ്രായമാകുമ്പോൾ ശരീരത്തിൽ ഉണ്ടാകുന്ന മാറ്റങ്ങൾ, പീഡന ശ്രമങ്ങളെ തിരിച്ചറിയാനുള്ള ബോധവൽക്കരണം, സുരക്ഷിതമല്ലാത്ത ലൈംഗിക ബന്ധത്തിലൂടെ പകരുന്ന രോഗങ്ങളുടെ പകർച്ച തടയാനുള്ള അറിവുകൾ, ഗർഭനിരോധന മാർഗങ്ങൾ, ബന്ധങ്ങളിലെ സുരക്ഷിതത്വം തുടങ്ങിയവ ഇതിൽ ഉൾപ്പെടുന്നു. കോളേജുകൾ, സർക്കാർ-സ്വകാര്യ സ്ഥാപനങ്ങൾ, സാമൂഹിക കേന്ദ്രങ്ങൾ, വ്യവസായ സ്ഥാപനങ്ങൾ, ആശുപത്രികൾ, ആരോഗ്യ കേന്ദ്രങ്ങൾ തുടങ്ങിയവ ഇതിൽ ഉൾപ്പെടുന്നു. നമ്മുടെ നാട്ടിൽ നടക്കാറുള്ള പ്രീ മാര്യേജ് കൗൺസിലിംഗ്, പോസ്റ്റ്‌ മാര്യേജ് കൗൺസിലിംഗ് തുടങ്ങിയവ ഇതിന്റെ ഭാഗമാണെന്ന് പറയാം.[30][31]

ഓൺലൈൻ ലൈംഗികാരോഗ്യ വിദ്യാഭ്യാസം

തിരുത്തുക

ആധുനിക വിവര സാങ്കേതിക വിദ്യയുടെ സഹായത്തോടെ ബന്ധങ്ങളെയും, ലൈംഗികതയെ പറ്റിയും, ആരോഗ്യത്തെ പറ്റിയും സമഗ്രമായ ബോധവൽക്കരണം നടത്തുന്നതിനെയാണ് 'ഓൺലൈൻ ലൈംഗികവും ആരോഗ്യപരമായ വിദ്യാഭ്യാസം അഥവാ ഓൺലൈൻ സെക്സ് ആൻഡ് ഹെൽത്ത്‌ എഡ്യൂക്കേഷൻ' എന്നറിയപ്പെടുന്നത്. വിദൂരത്തിൽ ഇരുന്നുകൊണ്ട് ധാരാളം ആളുകൾക്ക് എളുപ്പത്തിൽ ബോധവൽക്കരണം നടത്തുവാൻ ഓൺലൈൻ മാർഗം വഴി സാധിക്കും എന്നത് ഈ സംവിധാനത്തിന്റെ ഗുണമേന്മയാണ്. ഇത് താരതമ്യേനെ ചിലവ് കുറഞ്ഞതും, സമയലാഭം ഉള്ളതും, സുതാര്യവും ആണ് എന്നതാണ് പ്രത്യേകത. ഭാവിയിൽ ഓൺലൈൻ വിദ്യാഭ്യാസ രീതി കൂടുതലായി ഉടലെടുക്കുവാൻ സാധ്യതയുണ്ട്. കുട്ടികൾക്കും, കൗമാരക്കാർക്കും, ചിലപ്പോൾ മുതിർന്നവർക്കും വേണ്ടി വളരെ വേഗത്തിൽ ലൈംഗിക വിദ്യാഭ്യാസം നൽകുവാൻ സാധിക്കും. പല വിദേശ രാജ്യങ്ങളിലും ഈ രീതി കാണാകുന്നതാണ്. ഇന്ന്‌ പല സർക്കാരുകളും, വിദഗ്ദരും, ഡോക്ടർമാരും, മനഃശാസ്ത്രജ്ഞരും, ആരോഗ്യ പ്രവർത്തകരും, ആശുപത്രികളും, സംഘടനകളും, സ്കൂളുകളും, കോളേജുകളും, സ്ഥാപനങ്ങളും മറ്റും ഇത്തരത്തിൽ വിദ്യാഭ്യാസവും കോഴ്സുകളും മറ്റും നൽകി വരുന്നുണ്ട്. ശാസ്ത്രീയമായ വിവരം നൽകുന്ന പല അപ്പുകളും, വെബ്സൈറ്റുകളും ഇത്തരം സേവനം നൽകി വരുന്നുണ്ട്. സോഷ്യൽ മീഡിയ വഴിയും ഇത്തരം ബോധവൽക്കരണം നടക്കാറുണ്ട്. പല രാജ്യങ്ങളിലും സർക്കാർ സംവിധാനങ്ങളുടെ ഭാഗമായ ആരോഗ്യവകുപ്പ്, വനിതാ വികസന വകുപ്പ്, സാമൂഹിക നീതി വകുപ്പ്, കുട്ടികളുടെ വകുപ്പ്, വിദ്യാഭ്യാസ വകുപ്പ് പോലെയുള്ള സേവന ദാതാക്കൾ ഓൺലൈൻ ആയി അവരുടെ വെബ്സൈറ്റുകൾ വഴിയും അല്ലാതെയും ലൈംഗികതയും ബന്ധങ്ങളുമായും ബന്ധപ്പെട്ട് ശാസ്ത്രീയമായ ബോധവൽക്കരണം നടത്തി വരുന്നുണ്ട്[32][33][34][35].

ആർക്കൊക്കെ ഇത്തരം വിദ്യാഭ്യാസം നൽകാം

തിരുത്തുക

ഈ വിഷയത്തിൽ വിദഗ്ദ പരിശീലനം സിദ്ധിച്ച സെക്സോളജിസ്റ്റ്, സെക്സ് തെറാപ്പിസ്റ്റ് തുടങ്ങിയ ലൈംഗികാരോഗ്യ വിദഗ്ദർ ഇന്ത്യയിൽ പൊതുവേ കുറവാണ്. ശാസ്ത്രീയ പരിശീലനം ലഭിച്ച ഡോക്ടർമാർ, മാനസികാരോഗ്യ വിദഗ്ദർ, നഴ്സുമാർ, ഹെൽത്ത്‌ ഇൻസ്‌പെക്ടർമാർ, ഫാർമസിസ്റ്റുമാർ, പബ്ലിക് ഹെൽത്ത്‌ പ്രൊഫഷണൽസ്, സോഷ്യൽ വർക്കർമാർ തുടങ്ങിയ ആരോഗ്യ പ്രവർത്തകർ, അദ്ധ്യാപകർ തുടങ്ങിയവർ ബന്ധങ്ങളെയും ലൈംഗികാരോഗ്യത്തെയും പറ്റിയുള്ള വിദ്യാഭ്യാസം ഓൺലൈൻ ആയോ, നേരിട്ടോ, സമൂഹ മാധ്യമങ്ങൾ വഴിയോ നൽകി വരുന്നുണ്ട്. ഇന്ത്യയിൽ സർക്കാർ- സ്വകാര്യ ആശുപത്രികൾ, ആരോഗ്യ വകുപ്പ്, വിദ്യാഭ്യാസ വകുപ്പ്, സാമൂഹിക നീതി വകുപ്പ്, വനിതാ ശിശു ക്ഷേമ വകുപ്പ്, ആഭ്യന്തര വകുപ്പ് തുടങ്ങിയ സർക്കാർ വകുപ്പുകൾ, സന്നദ്ധ സംഘടനകൾ, സ്കൂളുകൾ, കോളേജുകൾ, മറ്റ് സ്ഥാപനങ്ങൾ തുടങ്ങിയവ ഇത്തരം വിദ്യാഭ്യാസം നൽകുന്നുണ്ടെങ്കിലും പൊതുവേ വളരെ കുറവാണ്. ഇന്ന് ധാരാളം കോഴ്സുകളും ഈ മേഖലയിൽ ലഭ്യമാണ്. വിദേശ സർവകലാശാലകൾ ഈ മേഖലയിൽ മികച്ച കോഴ്സുകൾ നൽകി വരുന്നുണ്ട്.[36][37]

ശാസ്ത്രീയ ലൈംഗിക വിദ്യാഭ്യാസം പകരുന്ന മലയാളം പുസ്തകങ്ങൾ

തിരുത്തുക

ശാസ്ത്രീയ ലൈംഗിക വിദ്യാഭ്യാസം നൽകുന്ന ധാരാളം പുസ്തകങ്ങൾ മലയാള ഭാഷയിൽ രചിക്കപ്പെട്ടിട്ടുണ്ട്. മുരളി തുമ്മാരുകുടി, നീരജ ജാനകി എന്നിവർ രചിച്ച ‘സെക്സ് 21 സമ്മതം, സംയോഗം, സന്തോഷം’ അത്തരത്തിൽ ഒന്നാണ്. ഇരുപത്തൊന്നാം നൂറ്റാണ്ടിലെ ലൈംഗികതയെപ്പറ്റിയുള്ള നവീന കാഴ്ചപ്പാടുകൾ അവതരിപ്പിക്കുന്ന പുസ്തകം. പങ്കാളിയുമായി തുറന്നു സംസാരിക്കേണ്ടതിന്റെ ആവശ്യകത, പരസ്പരബഹുമാനവും വിശ്വാസവും, പരസ്പര സമ്മതം എന്നിവയാണ് ലൈംഗികതയുടെ അടിത്തറയെന്നുമുള്ള കാഴ്ചപ്പാടുകളോടൊപ്പം ലൈംഗികത ആനന്ദിക്കാനും ആസ്വദിക്കാനുമുള്ളതാണെന്നുള്ള ചിന്ത പകരുന്നതോടൊപ്പം ലൈംഗികതയെ തുറന്ന മനസ്സോടെ പരമ്പരാഗത രീതികൾക്കപ്പുറം എപ്രകാരം സമീപിക്കാമെന്നും ഈ പുസ്തകം തുറന്നു കാട്ടുന്നു. ഡോക്ടർ ഷിംന അസീസ്, അഞ്ജു ഹബീബ് എന്നിവർ എഴുതിയ ‘തൊട്ടിലിലെ വാവയെ തോട്ടീന്നു കിട്ടിയതോ’ തുടങ്ങിയവ ശാസ്ത്രീയ ലൈംഗിക വിദ്യാഭ്യാസം പകരുന്ന മലയാള ഭാഷയിൽ പ്രസിദ്ധീകരിച്ച ഗ്രന്ഥങ്ങളാണ്.[38][39]

അവലംബം

തിരുത്തുക
  1. ↑ "Relationships and sex education (RSE) and health education". www.gov.uk › government.[പ്രവർത്തിക്കാത്ത കണ്ണി]
  2. ↑ "What is Sex Education? | Sex Ed Definition and QA". www.plannedparenthood.org.[പ്രവർത്തിക്കാത്ത കണ്ണി]
  3. ↑ "Sex education | UNICEF East Asia and Pacific". www.unicef.org.[പ്രവർത്തിക്കാത്ത കണ്ണി]
  4. ↑ "Comprehensive sexuality education: A foundation for life". en.unesco.org.[പ്രവർത്തിക്കാത്ത കണ്ണി]
  5. ↑ "International technical guidance on sexuality education". www.unwomen.org.[പ്രവർത്തിക്കാത്ത കണ്ണി]
  6. ↑ "YOUTH AND COMPREHENSIVE SEXUALITY EDUCATION". www.un.org.
  7. ↑ "Introduction to requirements". www.gov.uk.[പ്രവർത്തിക്കാത്ത കണ്ണി]
  8. ↑ "Comprehensive sexuality education". www.who.int.
  9. ↑ "International technical guidance on sexuality education". www.who.int.[പ്രവർത്തിക്കാത്ത കണ്ണി]
  10. ↑ "What do children and young people learn". educationhub.blog.gov.uk.[പ്രവർത്തിക്കാത്ത കണ്ണി]
  11. ↑ "The State of Sex Ed in the U.S. - Columbia Public Health". www.publichealth.columbia.edu.[പ്രവർത്തിക്കാത്ത കണ്ണി]
  12. ↑ "Plan your relationships, sex and health curriculum". www.gov.uk.[പ്രവർത്തിക്കാത്ത കണ്ണി]
  13. ↑ "Promoting healthy relationships in schools | NSPCC Learning". learning.nspcc.org.uk.[പ്രവർത്തിക്കാത്ത കണ്ണി]
  14. ↑ "Comprehensive sexuality education - World Health Organization". www.who.int.[പ്രവർത്തിക്കാത്ത കണ്ണി]
  15. ↑ "Sex education". en.wikipedia.org.
  16. ↑ "Sexuality Education Against Indian Culture?". feminisminindia.com.[പ്രവർത്തിക്കാത്ത കണ്ണി]
  17. ↑ [On the Lack of Comprehensive Sexuality Education in India "On the Lack of Comprehensive Sexuality Education in India"]. www.sexualrightsinitiative.org. {{cite web}}: Check |url= value (help)
  18. ↑ "www.plannedparenthood.org › what-sex-educationWhat is Sex Education? | Sex Ed Definition and QA". www.plannedparenthood.org.
  19. ↑ "Relationships and Sex Education (RSE) (Secondary)". www.gov.uk.[പ്രവർത്തിക്കാത്ത കണ്ണി]
  20. ↑ "ആർക്കൈവ് പകർപ്പ്". Archived from the original on 2013-09-06. Retrieved 2013-10-18.
  21. ↑ "sex education - തിരയുക". Retrieved 2022-05-19.
  22. ↑ "sex education - തിരയുക". Retrieved 2022-05-19.
  23. ↑ Mutaqin, Muhammad Azhari (2021-07-25). "PERAN SERIAL NETFLIX SEX EDUCATION SEBAGAI PEMBELAJARAN REMAJA JENJANG SMA DI INDONESIA". Retrieved 2022-05-19.
  24. ↑ "sex education - തിരയുക". Retrieved 2022-05-19.
  25. ↑ "sex education switzerland - തിരയുക". Retrieved 2022-05-19.
  26. ↑ "sex education usa - തിരയുക". Retrieved 2022-05-19.
  27. ↑ "sex education uk - തിരയുക". Retrieved 2022-05-19.
  28. ↑ "sex education newzealand - തിരയുക". Retrieved 2022-05-19.
  29. ↑ https://www.bing.com/ck/a?!&&p=ae2db5cf77c8032e02deb89aa961fa03e4e5e637f8627a1994bb695819ce96d8JmltdHM9MTY1Mjk4Njg0MSZpZ3VpZD01NDc2ZGQ4Yy0yNGY0LTRhMGUtYjUyYS05MTcyMmU4MmJhZDAmaW5zaWQ9NTQxNw&ptn=3&fclid=fa6d1e14-d7a5-11ec-966f-c3f6ab397784&u=a1aHR0cHM6Ly90aGwuZmkvZW4vd2ViL21pZ3JhdGlvbi1hbmQtY3VsdHVyYWwtZGl2ZXJzaXR5L2ltbWlncmFudHMtaGVhbHRoLWFuZC13ZWxsYmVpbmcvc2V4dWFsLWFuZC1yZXByb2R1Y3RpdmUtaGVhbHRoLW9mLWltbWlncmFudHMvY3VsdHVyYWxseS1zZW5zaXRpdmUtc2V4dWFsaXR5LWVkdWNhdGlvbiM6fjp0ZXh0PUluJTIwRmlubGFuZCUyQyUyMHNleHVhbGl0eSUyMGVkdWNhdGlvbiUyMGlzJTIwcGFydCUyMG9mJTIwdGhlLGlzJTIwYXBwcm9wcmlhdGUlMjBmb3IlMjBhbGwlMjBjaGlsZHJlbiUyMGFuZCUyMHlvdW5nJTIwcGVvcGxlLg&ntb=1. Retrieved 2022-05-19. {{cite web}}: Missing or empty |title= (help)
  30. ↑ "Comprehensive sexuality education - World Health Organization". www.who.int.[പ്രവർത്തിക്കാത്ത കണ്ണി]
  31. ↑ "www.thelancet.com". www.thelancet.com.
  32. ↑ "Digital Tools for Sex Educators | Sex Education Tools". www.plannedparenthood.org.[പ്രവർത്തിക്കാത്ത കണ്ണി]
  33. ↑ "Bite-Sized Online Sex Education Courses for Teachers". sparked.net.[പ്രവർത്തിക്കാത്ത കണ്ണി]
  34. ↑ "The Future of Sex Ed Is the Internet | WIRED". www.wired.com.[പ്രവർത്തിക്കാത്ത കണ്ണി]
  35. ↑ "Sex Education that Goes Beyond Sex". www.gse.harvard.edu.[പ്രവർത്തിക്കാത്ത കണ്ണി]
  36. ↑ "Comprehensive Sex Education in India". doingsociology.org.[പ്രവർത്തിക്കാത്ത കണ്ണി]
  37. ↑ "Knowledge Attitude and Perception of Sex Education". www.ncbi.nlm.nih.gov.[പ്രവർത്തിക്കാത്ത കണ്ണി]
  38. ↑ "സെക്സ് 21: സമ്മതം, സംയോഗം, സന്തോഷം". www.goodreads.com.[പ്രവർത്തിക്കാത്ത കണ്ണി]
  39. ↑ "Thottilile Vavaye Thotteennu Kittiyatha". bookcarry.com.[പ്രവർത്തിക്കാത്ത കണ്ണി]
"https://ml.wikipedia.org/w/index.php?title=ലൈംഗിക_വിദ്യാഭ്യാസം&oldid=4112950" എന്ന താളിൽനിന്ന് ശേഖരിച്ചത്