പി. ജയചന്ദ്രൻ
ഈ ലേഖനം അടുത്തിടെ മരണമടഞ്ഞ വ്യക്തിയെക്കുറിച്ചാണ്. മരണമടഞ്ഞ സാഹചര്യം, അനുബന്ധസംഭവങ്ങൾ തുടങ്ങിയവ, കൂടുതൽ വിവരങ്ങൾ കിട്ടുന്ന മുറക്ക് മാറിക്കൊണ്ടിരിക്കാം. ഇതിൽ പ്രതിപാദിക്കുന്ന വ്യക്തിയുടെ മരണശേഷം ഈ ലേഖനത്തിൽ നശീകരണപ്രവർത്തനങ്ങൾ നടക്കുന്നതായി ശ്രദ്ധയിൽപ്പെട്ടിട്ടുണ്ടെങ്കിൽ ദയവായി കാര്യനിർവാഹകരെ അറിയിക്കുക. |
മികച്ച ഗായകനുള്ള ദേശീയ, സംസ്ഥാന അവാർഡുകൾ നേടിയിട്ടുള്ള ഒരു മലയാളി പിന്നണിഗായകനും നടനുമായിരുന്നു പാലിയത്ത് ജയചന്ദ്രൻകുട്ടൻ എന്ന പി. ജയചന്ദ്രൻ. (3 മാർച്ച് 1944 – 9 ജനുവരി 2025)[1] മലയാളം, തമിഴ്, കന്നഡ, തെലുഗു, ഹിന്ദി എന്നീ ഭാഷകളിലായി 16000ലധികം ഗാനങ്ങൾ അദ്ദേഹം ആലപിച്ചിട്ടുണ്ട്. ജി. ദേവരാജൻ, എം. എസ്. ബാബുരാജ്, വി. ദക്ഷിണാമൂർത്തി, കെ. രാഘവൻ, എം. കെ. അർജുനൻ, എം. എസ്. വിശ്വനാഥൻ, ഇളയരാജ, കോടി, ശ്യാം, എ. ആർ. റഹ്മാൻ, എം. എം. കീരവാണി, വിദ്യാസാഗർ, എം. ജയചന്ദ്രൻ തുടങ്ങിയ ഇന്ത്യൻ സംഗീത രംഗത്തെ ഇതിഹാസ സംഗീതജ്ഞരുമായി അദ്ദേഹം സഹകരിച്ചു പ്രവർത്തിച്ചു.[2] ദക്ഷിണേന്ത്യയിലെ മികച്ച ഭാവഗായകനായി അദ്ദേഹം അറിയപ്പെടുന്നു.[3] 1965ൽ കുഞ്ഞാലി മരയ്ക്കാർ എന്ന ചിത്രത്തിനു വേണ്ടി പി. ഭാസ്കരൻ രചിച്ച ‘ഒരു മുല്ലപ്പൂമാലയുമായ്’ എന്ന ഗാനമാലപിച്ചെങ്കിലും ആദ്യം പുറത്തു വന്നത് കളിത്തോഴൻ എന്ന ചിത്രത്തിനു വേണ്ടി പാടിയ-എക്കാലവും മലയാളികൾ മലയാളികൾ ഇഷ്ടപ്പെടുന്ന - മഞ്ഞലയിൽ മുങ്ങിത്തോർത്തി; ധനു മാസ ചന്ദ്രിക വന്നു എന്നു തുടങ്ങുന്ന ഗാനമാണ്. മികച്ച പിന്നണി ഗായകനുള്ള ദേശീയ ചലച്ചിത്ര പുരസ്കാരം ഒരു തവണയും സംസ്ഥാന ചലച്ചിത്ര പുരസ്കാരം അഞ്ചു തവണയും നാലു തവണ തമിഴ്നാട് സംസ്ഥാന അവാർഡുകളും അദ്ദേഹം നേടിയിട്ടുണ്ട്. ഏതാനും സിനിമകളിലും അദ്ദേഹം അഭിനയിച്ചിട്ടുണ്ട്. 2020-ൽ, മലയാള സിനിമയ്ക്ക് നൽകിയ മികച്ച സംഭാവനകളുടെ പേരിൽ മലയാള സിനിമയിലെ അത്യോന്നത പുരസ്കാരമായ ജെ. സി. ഡാനിയേൽ അവാർഡ് അദ്ദേഹത്തിന് തേടിയെത്തി. 2025 ജനുവരി 9 ന് ജയചന്ദ്രൻ അന്തരിച്ചു.[4][5]
പി. ജയചന്ദ്രൻ | |
|---|---|
 പി. ജയചന്ദ്രൻ കൊല്ലത്തു നടന്ന ഒരു ഗാനമേളയിൽ | |
| പശ്ചാത്തല വിവരങ്ങൾ | |
| ജന്മനാമം | പി. ജയചന്ദ്രൻ |
| ജനനം | മാർച്ച് 3, 1944 രവിപുരം, കൊച്ചി |
| മരണം | ജനുവരി 9, 2025 (പ്രായം 80) തൃശൂർ, കേരളം, ഇന്ത്യ |
| തൊഴിൽ(കൾ) | ഗായകൻ |
| ഉപകരണ(ങ്ങൾ) | ഗായകൻ |
| വർഷങ്ങളായി സജീവം | 1965–2025 |
ആദ്യകാലജീവിതം
തിരുത്തുക1944 മാർച്ച് 3 ന് എറണാകുളം ജില്ലയിലെ കൊച്ചിയ്ക്കു സമീപം രവിപുരത്ത് ഭദ്രാലയത്തിലാണ് ജയചന്ദ്രൻ ജനിച്ചത്. അദ്ദേഹത്തിന്റെ കുടുംബം പിന്നീട് തൃശൂർ ജില്ലയിലെ ഇരിങ്ങാലക്കുടയിലേക്ക് താമസം മാറ്റി.[6] കൊച്ചി രാജകുടുംബത്തിലെ അംഗവും സംഗീതജ്ഞനായിരുന്ന രവിവർമ്മ കൊച്ചനിയൻ തമ്പുരന്റേയും പാലിയത്ത് സുഭദ്രക്കുഞ്ഞമ്മയുടേയും അഞ്ച് മക്കളിൽ മൂന്നാമനായിരുന്നു അദ്ദേഹം.[7] പരേതനായ സുധാകരൻ (1940-1989), പരേതയായ സരസിജ (1942-2018), കൃഷ്ണകുമാർ (ജനനം: 1946), ജയന്തി (ജനനം: 1950) എന്നിവരാണ് സഹോദരങ്ങൾ.
ചേന്ദമംഗലത്തെ പാലിയം സ്കൂൾ, ആലുവ സെന്റ് മേരീസ് ഹൈസ്കൂൾ, ഇരിങ്ങാലക്കുടയിലെ നാഷനൽ ഹൈസ്കൂൾ എന്നിവിടങ്ങളിലായിരുന്നു അദ്ദേഹത്തിന്റെ സ്കൂൾ വിദ്യാഭ്യാസം. ഇരിങ്ങാലക്കുടയിലെ നാഷണൽ ഹൈസ്കൂളിലെ വിദ്യാർത്ഥിയായിരുന്നപ്പോൾ ജയചന്ദ്രൻ സംസ്ഥാന സ്കൂൾ യുവജനോത്സവത്തിൽ മൃദംഗം വായിച്ചതിനും ലളിത സംഗീതത്തിനും നിരവധി സമ്മാനങ്ങൾ നേടിയിട്ടുണ്ട്.[8] പിന്നീട്ഇരിങ്ങാലക്കുടയിലെ ക്രൈസ്റ്റ് കോളേജിൽ നിന്ന് സുവോളിയിൽ ബിരുദം നേടി.[9]
1973 മെയ് മാസത്തിൽ തൃശൂർ സ്വദേശിയായ ലളിതയെ അദ്ദേഹം വിവാഹം കഴിച്ചു. അവർക്ക് ലക്ഷ്മി എന്ന മകളും ദിനനാഥ് എന്ന പുത്രനുമാണുള്ളത്. പുത്രൻ ഏതാനും സിനിമകളിൽ ഗാനങ്ങൾ ആലപിച്ചിട്ടുണ്ട്.[10]
ഔദ്യോഗികജീവിതം
തിരുത്തുകഇരിങ്ങാലക്കുടയിലെ ക്രൈസ്റ്റ് കോളേജിൽ നിന്ന് ബിരുദം നേടിയ ശേഷം 1966-ൽ ചെന്നൈയിലെ പ്യാരി കമ്പനിയിൽ കെമിസ്റ്റായി ജോലി ചെയ്തിരുന്നു. ഇരിങ്ങാലക്കുടയിലെ നാഷണൽ ഹൈസ്കൂളിലെ ഒരു വിദ്യാർത്ഥിയായിരുന്ന അദ്ദേഹം അക്കാലത്ത് സംസ്ഥാന സ്കൂൾ യുവജനോത്സവത്തിൽ മൃദംഗ വായന, ലൈറ്റ് മ്യൂസിക് എന്നിവയിൽ നിരവധി സമ്മാനങ്ങൾ നേടിയിരുന്നു. 1958 ൽ നടന്ന ആദ്യ സംസ്ഥാന യുവജനമേളയിൽ പങ്കെടുക്കവേ ജയചന്ദ്രൻ തന്റെ സമകാലികനായ യേശുദാസിനെ കണ്ടുമുട്ടുകയും മികച്ച ക്ലാസിക്കൽ ഗായകനുള്ള പുരസ്കാരം യേശുദാസ് നേടിയപ്പോൾ അതേ വർഷം മികച്ച മൃദംഗവിദ്വാനുള്ള അവാർഡ് നേടുകയും ചെയ്തിരുന്നു.
ഒരു തവണ മികച്ച പിന്നണി ഗായകനുള്ള ദേശീയ പുരസ്കാരം നേടിയ ജയചന്ദ്രന് അഞ്ചുതവണ മികച്ച പിന്നണി ഗായകനുള്ള കേരള സംസ്ഥാന അവാർഡുകളും നാലു തവണ തമിഴ്നാട് സംസ്ഥാന അവാർഡുകളും നേടിയിട്ടുണ്ട്. അദ്ദേഹത്തിന്റെ ഗാനങ്ങൾ മലയാളം, തമിഴ്, കന്നഡ, തെലുങ്ക്, ഹിന്ദി ഭാഷകളിൽ റെക്കോർഡ് ചെയ്യപ്പെട്ടിരിക്കുന്നു.
1966 ൽ കുഞ്ഞാലിമരയ്ക്കാർ എന്ന സിനിമയ്ക്കുവേണ്ടി പി. ഭാസ്കരൻ-ചിദംബരനാഥ് ടീമിന്റെ ഗാനമാണ് ആദ്യമായി പാടിയതെങ്കിലും കളിത്തോഴൻ എന്ന ചിത്രത്തിലെ മഞ്ഞലയിൽ മുങ്ങിത്തോർത്തി എന്നു തുടങ്ങുന്ന ഗാനമായിരുന്നു ആദ്യം പുറത്തുവന്നത്.
1967 ൽ പി. വേണു സംവിധാനം ചെയ്ത ഉദ്യോഗസ്ഥ എന്ന ചിത്രത്തിനുവേണ്ടി എം.എസ്. ബാബുരാജ് സംഗീതം നൽകിയ "അനുരാഗ ഗാനം പോലെ" എന്ന പ്രശസ്ത ഗാനം അദ്ദേഹം ആലപിച്ചു. പിന്നീട് പി. വേണുവും ജയചന്ദ്രനും ചേർന്ന് "നിൻമണിയറയിലെ" (സി. ഐ. ഡി. നസീർ, 1971), "മലയാള ഭാഷതൻ മാദക ഭംഗി" (പ്രേതങ്ങളുടെ താഴ്വര, 1973) തുടങ്ങിയ കൂടുതൽ ഹിറ്റുകൾ മലയാള സിനിമയ്ക്ക സമ്മാനിച്ചു. പണിതീരാത്ത വീട് എന്ന ചിത്രത്തിനുവേണ്ടി ആലപിച്ച "നീലഗിരിയുടെ സഖികളേ, ജ്വാലാ മുഖികളേ” എന്ന ഗാനത്തിന് 1972 ലെ മികച്ച പിന്നണി ഗായകനുള്ള കേരള സംസ്ഥാന ചലച്ചിത്ര അവാർഡ് ആദ്യമായി ജയചന്ദ്രന് ലഭിച്ചു. എം എസ് വിശ്വനാഥനായിരുന്നു പ്രസ്തുത ചിത്രത്തിന്റെ സംഗീതം നിർവ്വഹിച്ചത്. എം.എസ്.വിശ്വനാഥനാണ് അദ്ദേഹത്തെ തമിഴിൽ അവതരിപ്പിക്കുന്നത്. 1973 ൽ പുറത്തിറങ്ങിയ 'മണിപ്പയൽ' എന്ന സിനിമയിലെ 'തങ്കച്ചിമിഴ് പോൽ...' ആയിരുന്നു ജയചന്ദ്രന്റെ ആദ്യ തമിഴ്ഗാനം.[11] എം. ബി. ശ്രീനിവാസൻ സംഗീതം നൽകിയ ബന്ധനം എന്ന ചിത്രത്തിലെ "രാഗം ശ്രീരാഗം" എന്ന ഗാനത്തിലൂടെ 1978 ൽ അദ്ദേഹത്തിന് മറ്റൊരു കേരള സംസ്ഥാന അവാർഡ് ലഭിച്ചു. 1985 ൽ ജി. ദേവരാജൻ സംഗീതം നൽകിയ ശ്രീ നാരായണ ഗുരു എന്ന ചിത്രത്തിലെ "ശിവശങ്കര സർവ്വ ശരണ്യ വിഭോ" എന്ന ഗാനത്തിന് മികച്ച പിന്നണി ഗായകനുള്ള ദേശീയ ചലച്ചിത്ര പുരസ്കാരം ലഭിച്ചു. നിറം എന്ന ചിത്രത്തിലെ "പ്രായം നമ്മിൽ" എന്ന ഗാനം 1998 ൽ മികച്ച ഗായകനുള്ള മൂന്നാമത്തെ കേരള സംസ്ഥാന പുരസ്കാരത്തിന് അദ്ദേഹത്തെ അർഹനാക്കിയിരുന്നു. 1975 ൽ ആർ.കെ ശേഖറിന്റെ സംഗീത സംവിധാനത്തിൽ, അക്കാലത്ത് കേവലം 9 വയസ് പ്രായമുണ്ടായിരുന്ന ദിലീപ് ശേഖർ (ഇപ്പോൾ എ. ആർ റഹ്മാൻ) ആദ്യമായി ചിട്ടപ്പെടുത്തിയ പെൺപട എന്ന മലയാള സിനിമയ്ക്കുവേണ്ടിയുള്ള "വെള്ളിത്തേൻ കിണ്ണം പോൽ" എന്ന ഗാനം അദ്ദേഹം ആലപിച്ചിരുന്നു.[12]
ജയചന്ദ്രൻ സംഗീതസംവിധായകൻ ഇളയരാജയുമായി അടുത്തു സഹകരിച്ചു പ്രവർത്തിക്കുകയും "‘രാസാത്തി ഒന്നെ കാണാതെ നെഞ്ച് കാത്താടി പോലാട്ത്...", "കാത്തിരുന്തു കാത്തിരുന്തു" (1984 ൽ പുറത്തിറങ്ങിയ വൈദേഹി കാത്തിരുന്താൾ),[13] "മയങ്കിനേൻ സൊല്ല തയങ്കിനേൻ" (1985 ൽ പുറത്തിറങ്ങിയ നാനേ രാജ നാനേ മന്തിരിയിൽ നിന്ന്), "വാഴ്കയേ വേഷം" (1979 ൽ പുറത്തിറങ്ങിയ “ആറിലിരുന്തു അറുപതു വരൈ” എന്ന ചിത്രത്തിലെ), "പൂവാ എടുത്തു ഒരു" (1986 ൽ പുറത്തിറങ്ങിയ അമ്മൻ കോവിൽ കിഴക്കാലെ), "താലാട്ടുതേ വാനം" (1981 ൽ പുറത്തിറങ്ങിയ കടൽ മീൻകൾ) എന്നിവയുൾപ്പെടെ തമിഴ് ഭാഷയിൽ നിരവധി ജനപ്രിയ ഹിറ്റുകൾ സൃഷ്ടിക്കുകയും ചെയ്തിരുന്നു. 1994 ൽ എ. ആർ. റഹ്മാൻ സംഗീതം നൽകിയ കിഴക്കു ചീമയിലെ എന്ന ചിത്രത്തിലെ ഗാനം ആലപിച്ചതിന്റെ പേരിൽ മികച്ച ഗായകനുള്ള തമിഴ്നാട് സംസ്ഥാന ചലച്ചിത്ര അവാർഡ് ലഭിച്ചു. തമിഴ് ചലച്ചിത്ര സംഗീതത്തിന് നൽകിയ സംഭാവനകൾക്കുള്ള അംഗീകാരമെന്ന നിലയിൽ 1997 ൽ തമിഴ്നാട് സർക്കാരിന്റെ കലൈമാമണി അവാർഡിന് അർഹനായി.
2001 ന്റെ തുടക്കത്തിൽ ജയചന്ദ്രന് ‘സ്വരലയ കൈരളി യേശുദാസ് അവാർഡ്’ നൽകി ആദരിക്കുകയും ഈ പുരസ്കാരം ലഭിച്ച ആദ്യ ഗായകനാകുകയും ചെയ്തു. 30 വർഷക്കാലയളവിലെ ഗായകരിൽ നിന്നും ഗാനരചയിതാക്കളിൽ നിന്നുമുള്ള മികച്ച വ്യക്തിയെ തിരഞ്ഞെടുക്കുക എന്നതാണ് ഈ പുരസ്കാരത്തിനു പിന്നിലെ ലക്ഷ്യം. എംഎസ്ഐ ഇൻഫർമേഷൻ ഡാറ്റാബേസ് അനുസരിച്ച് മലയാള സിനിമകൾക്കായി ഏകദേശം ആയിരത്തോളം ഗാനങ്ങൾ അദ്ദേഹം ആലപിച്ചിട്ടുണ്ട്.
2008 ൽ എ. ആർ. റഹ്മാൻ സംഗീതം നൽകിയ “ADA ... എ വേ ഓഫ് ലൈഫ്” എന്ന ചിത്രത്തിനായി അൽക യാഗ്നിക്കിനൊപ്പം പാടിക്കൊണ്ട് ജയചന്ദ്രൻ ആദ്യമായി ഹിന്ദി ഗാനരംഗത്തേയ്ക്കും പ്രവേശനം നടത്തി.
മലയാള സിനിമയിലെ സമഗ്ര സംഭാവനയ്ക്കുള്ള 2020ലെ ജെ. സി ഡാനിയേൽ അവാർഡ് നൽകി കേരള സർക്കാർ അദ്ദേഹത്തെ ആദരിച്ചു. അദ്ദേഹത്തിന്റെ ആത്മകഥ ‘ഏകാന്ത പഥികൻ ഞാൻ’ എന്ന പേരിൽ പ്രസിദ്ധീകരിച്ചിട്ടുണ്ട്.
ആലപിച്ച ഗാനങ്ങൾ
തിരുത്തുക(Selected Discography)
- പൊടിമീശ മുളക്കണ കാലം...
- വാൾമുന കണ്ണിലെ...
- എൻ്റെ ജനലരികിലിന്ന്...
- ഞാനൊരു മലയാളി...
- ശാരദാംബരം ചാരുചന്ദ്രികാ...
- മലർവാക കൊമ്പത്ത്...
- ഓലഞ്ഞാലി കുരുവി...
- ഇല്ലാത്താലം കൈമാറുമ്പോൾ...
- പാട്ടിൽ ഈ പാട്ടിൽ...
- പ്രേമിക്കുമ്പോൾ നീയും ഞാനും...
- കഥയമമ കഥയമമ...
- കണ്ടനാൾ മുതൽ...
- ശരറാന്തൽ മിന്നിനിൽക്കും...
- പൊന്നുണ്ണി ഞാൻ...
- പൊട്ട് തൊട്ട സുന്ദരി...
- വെൺമുകിലേതൊ കാറ്റിൽ...
- നേരിനഴക് നേർവഴിയഴക്...
- ഇതളൂർന്ന് വീണ...
- തങ്കമനസ് അമ്മമനസ്...
- പുന്നെല്ലിൽ കതിരോലത്തുമ്പത്ത്...
- ആരാരും കാണാതെ ആരോമൽ തൈമുല്ല...
- കണ്ണ് നട്ട് കാത്തിരുന്നിട്ടും...
- പൂക്കുന്നിതാ മുല്ല...
- കല്ലായിക്കടവത്ത്....
- കേരനിരകളാടും...
- ആരു പറഞ്ഞു...
- പുഴ പാടുമീ പാട്ടിൽ...
- ചെണ്ടക്കൊരു കോലുണ്ടെടാ...
- നീ മണിമുകിലാടകൾ...
- നീയൊരു പുഴയായ്...
- ആലിലക്കാവിലെ തെന്നലെ...
- ആലിലത്താലിയുമായ്...
- അഴകെ കൺമണിയേ...
- തിങ്കൾ നിലാവിൽ...
- വാവാവോ വാവെ ...
- സ്വയംവര ചന്ദ്രികെ...
- വട്ടയില പന്തലിട്ട്...
- ഒന്ന് തൊടാൻ ഉള്ളിൽ...
- വിരൽ തൊട്ടാൽ വിരിയുന്ന...
- ആരും ആരും കാണാതെ...
- തേരിറങ്ങും മുകിലെ...
- എന്തേ ഇന്നും വന്നീല...
- മുറ്റത്തെ മുല്ലത്തെ...
- അറിയാതെ അറിയാതെ...
- മറന്നിട്ടുമെന്തിനോ...
- പൊന്നുഷസെന്നും...
- പൊൻ കസവ് ഞൊറിയും...
- കണ്ണിൽ കാശിത്തുമ്പകൾ...
- പൂവേ പൂവേ പാലപ്പൂവെ...
- ദേവരാഗമെ മേലേ...
- പ്രായം നമ്മിൽ മോഹം നൽകി...
- കളഹംസം നീന്തും രാവിൽ...
- ശിശിരകാല മേഘ മിഥുന...
- വെള്ളാരം കിളികൾ വലം വച്ച് പറക്കും...
- പുലരി പൂക്കളാൽ...
- ആവണിപ്പൂവിൻ വെൺമണിത്താലത്തിൽ...
- മധുമാസം മണ്ണിൻ്റെ...
- കേവല മർത്യ ഭാഷ...
- വാർമേഘ വർണ്ണൻ്റെ മാറിൽ...
- പാലാഴിപ്പൂമങ്കേ...
- അലഞൊറി ചൂടും ഒരു കടലോരം...
- പൂ വിരിഞ്ഞില്ല പൂവിൽ തേനുറഞ്ഞില്ല...
- സമയരഥങ്ങളിൽ ഞങ്ങൾ...
- വടക്കുംനാഥന് സുപ്രഭാതം...
മരണം
തിരുത്തുക2025 ജനുവരി 9 ന് ജയചന്ദ്രൻ അന്തരിച്ചു. വ്യാഴാഴ്ച തൃശൂർ അമല ആശുപത്രിയിൽ വച്ചായിരുന്നു അന്ത്യം. അർബുദ രോഗബാധിതനായിരുന്ന അദ്ദേഹം തൃശൂർ അമല ആശുപത്രിയിൽ ചികിത്സയിലായിരുന്നു.[15] 2025 ജനുവരി 11 ന് വടക്കൻ പറവൂരിലെ ചേന്ദമംഗലത്തുള്ള അദ്ദേഹത്തിന്റെ തറവാട്ടുവീട്ടിൽ പൂർണ്ണ സംസ്ഥാന ബഹുമതികളോടെ അദ്ദേഹത്തെ സംസ്കരിച്ചു.[16]
അഭിനയരംഗം
തിരുത്തുക1979 ൽ പുറത്തിറങ്ങി, മധു നായകനായി അഭിനയിച്ച കൃഷ്ണപ്പരുന്ത് എന്ന സിനിമയിലെ ഒരു പ്രധാന വേഷം അവതരിപ്പിച്ചത് ജയചന്ദ്രനായിരുന്നു. ലേഖയുടെ മരണം ഒരു ഫ്ളാഷ് ബാക്ക്, നഖക്ഷതങ്ങൾ,[17] ട്രിവാൻഡ്രം ലോഡ്ജ്[18] തുടങ്ങിയ ചിത്രങ്ങളിലും അദ്ദേഹം വേഷമിട്ടു.
പുരസ്കാരങ്ങൾ
തിരുത്തുകദേശീയ അവാർഡ്
തിരുത്തുക- മികച്ച ഗായകനുള്ള ദേശീയപുരസ്കാരം- 1986-ൽ ശ്രീനാരായണ ഗുരു എന്ന സിനിമയിലെ ശിവശങ്കര സര്വ്വ ശരണ്യവിഭോ എന്ന ഗാനത്തിന്.
സംസ്ഥാന പുരസ്കാരങ്ങൾ
തിരുത്തുകമികച്ച ഗായകനുള്ള കേരളസംസ്ഥാന പുരസ്കാരം
- 1972-ൽ പണിതീരാത്ത വീട് എന്ന സിനിമയിലെ സുപ്രഭാതം എന്ന ഗാനത്തിന്.
- 1978-ൽ ബന്ധനം എന്ന സിനിമയിലെ രാഗം ശ്രീരാഗം എന്ന ഗാനത്തിന്.
- 2000-ൽ നിറം എന്ന സിനിമയിലെ പ്രായം നമ്മിൽ മോഹം നൽകി എന്ന ഗാനത്തിന്.
- 2004-ൽ തിളക്കം എന്ന സിനിമയിലെ നീയൊരു പുഴയായ് എന്ന ഗാനത്തിന്.
- 2015-ൽ ഞാനൊരു മലയാളി.., മലർവാകക്കൊമ്പത്തെ.. ശാരദാംബരം..... ( എന്നു നിന്റെ മൊയ്തീൻ ) എന്നീ ഗാനങ്ങൾക്കും ജിലേബി, എന്നും എപ്പോഴും എന്നീ സിനിമയിലെ ഗാനങ്ങൾക്കും[19]
- ജെ.സി. ഡാനിയേൽ പുരസ്കാരം (2021)
മികച്ച ഗായകനുള്ള തമിഴ്നാട് സംസ്ഥാന പുരസ്കാരം
- 1994-ൽ കിഴക്ക് ശീമയിലെ എന്ന സിനിമയിലെ കട്ടാഴം കാട്ട്വഴി എന്ന ഗാനത്തിന്.
മറ്റ് പുരസ്കാരങ്ങൾ
തിരുത്തുക- 1997-ൽ 30 വർഷങ്ങൾ തമിഴ് സംഗീത ലോകത്ത് പ്രവർത്തിച്ചതിന് തമിഴ്നാട് ഗവർമെന്റിന്റെ കലൈ മാമണി പുരസ്കാരം
പുറത്തേക്കുള്ള കണ്ണികൾ
തിരുത്തുക- ↑ "Legendary singer P Jayachandran passes away at 80". onmanorama.com. Retrieved 9 January 2025.
- ↑ Pradeep, K. (4 June 2011). "Evergreen voice". The Hindu.
- ↑ "J.C. Daniel Award for P. Jayachandran". The Hindu. 13 December 2021.
- ↑ Daily, Keralakaumudi. "Legendary playback singer P Jayachandran passes away at 80". Keralakaumudi Daily (in ഇംഗ്ലീഷ്). Retrieved 2025-01-09.
- ↑ "Music Icon P Jayachandran Dies at 80". www.deccanchronicle.com (in ഇംഗ്ലീഷ്). deccanchronicle. 9 January 2025.
- ↑ "Archived copy". Archived from the original on 19 ഡിസംബർ 2013. Retrieved 19 ഡിസംബർ 2013.
{{cite web}}: CS1 maint: archived copy as title (link) - ↑ "family". www.jayachandransite.com. Retrieved 2020-05-22.
- ↑ Daily, Keralakaumudi. "P Jayachandran celebrating his birthday today; gifted singer with youthful voice even in his 80s". Keralakaumudi Daily (in ഇംഗ്ലീഷ്).
- ↑ "Legendary singer P Jayachandran passes away at 80" (in ഇംഗ്ലീഷ്).
- ↑ http://www.jayachandransite.com/html/famfra.html
- ↑ "നന്ദി, ആ 36 പാട്ടുകൾക്ക്!".
- ↑ "First song of the legendary composer A.R.Rahman". 29 November 2007.
- ↑ "രാസാത്തി ഒന്നെ കാണാതെ നെഞ്ചം..."
- ↑ https://ml.msidb.org/songs.php?singers=P%20Jayachandran&tag=Search&limit=1090&page_num=42
- ↑ "പാട്ടിന്റെ പൗർണമിച്ചന്ദ്രൻ അസ്തമിച്ചു; സംസ്കാരം നാളെ ചേന്ദമംഗലത്ത്; തൃശൂരിൽ പൊതുദർശനം".
- ↑ "Singer P. Jayachandran cremated with State honours in Chendamangalam" (in Indian English). The Hindu. 11 January 2025. Archived from the original on 12 January 2025. Retrieved 12 January 2025.
- ↑ Cast photos Google
- ↑ "trivandrum lodge Malayalam movie cast - Google Search". www.google.com. Retrieved 2021-06-10.
- ↑ "'ഒഴിവു ദിവത്തെ കളി' മികച്ച ചിത്രം; ദുൽഖർ നടൻ, പാർവ്വതി നടി..." മാതൃഭൂമി. Archived from the original on 2016-03-01. Retrieved 2016 മാർച്ച് 1.
{{cite news}}: Check date values in:|accessdate=(help)