വരാഹപുരാണം

18 പുരാണങ്ങളിൽ വച്ച് പന്ത്രണ്ടാമത്തെ പുരാണമായ വരാഹപുരാണം വിഷ്ണുവിന്റെ അവതാരമായ വരാഹമൂർത്തി ആഖ്യാതാവാകുന്ന തരത്തിലാണ് സൂതപൗരാണികൻ മുനിമാരോട് വിവരിക്കുന്നത് .

ശ്ളോകസംഖ്യയും പുരാണഘടനയും

നാരദീയ പുരാണത്തിൽ ഈ പുരാണത്തെപ്പറ്റി വ്യക്തമായ ഒരു വിവരണമുണ്ട് . ഈ പുരാണത്തിനു പൂർവ്വം , ഉത്തരം എന്നിങ്ങനെ രണ്ടു ഭാഗങ്ങളുണ്ട് . ഈ പുരാണത്തിനു ഇപ്പോൾ ലഭ്യമായ മൂലത്തിൽ 218 അദ്ധ്യായങ്ങളും 10000 ശ്ളോകങ്ങളുമുണ്ട് .

ഈ പുരാണത്തിനു നാല് ഭാഗങ്ങളുണ്ട് .

• ഒന്നാം ഭാഗം - അദ്ധ്യായങ്ങൾ 1 മുതൽ 112 വരെ .

• രണ്ടാം ഭാഗം - അദ്ധ്യായങ്ങൾ 113 മുതൽ 192 വരെ .

• മൂന്നാം ഭാഗം - അദ്ധ്യായങ്ങൾ 193 മുതൽ 213 വരെ .

• നാലാം ഭാഗം - അദ്ധ്യായങ്ങൾ 214 മുതൽ 218 വരെ .

ആഖ്യാനവും കാലഘട്ടവും

സൂത പൗരാണികനായ രോമഹർഷണൻ നൈമിശാരണ്യത്തിലെ മുനിമാർക്ക് ഉപദേശിക്കുന്ന രീതിയിലാണ് ഇതിന്റെ ആഖ്യാനം . തുടക്കം വൈഷ്ണവമാണെങ്കിലും അന്ത്യം ശൈവമായാണ് ഇതിന്റെ ആഖ്യാന പ്രത്യേകത . എട്ടാം നൂറ്റാണ്ടിനും പത്താം നൂറ്റാണ്ടിനും ഇടയിലാണ് ഇതിന്റെ കാലഘട്ടം .