കമുകറ പുരുഷോത്തമൻ
മലയാളസിനിമയിലെ പ്രശസ്തനായ ഒരു പിന്നണിഗായകനായിരുന്നു കമുകറ പുരുഷോത്തമൻ (1930 - 1995).
കമുകറ പുരുഷോത്തമൻ | |
|---|---|
 | |
| ജനനം | 1930 ഡിസംബർ 4 |
| മരണം | മേയ് 25, 1995 (പ്രായം 64) |
| ദേശീയത | ഇന്ത്യൻ |
| തൊഴിൽ | ചലച്ചിത്രപിന്നണിഗായകൻ |
ജീവിതരേഖ
തിരുത്തുകകമുകറ പരമേശ്വരക്കുറുപ്പിന്റെയും ലക്ഷ്മിക്കുട്ടി മാരസ്യാരുടെയും മകനായി കന്യാകുമാരി ജില്ലയിലെ തിരുവട്ടാറിൽ 1930 ഡിസംബർ 4-ന് ജനിച്ചു. ശാസ്ത്രീയസംഗീതത്തിലും നാടൻ പാട്ടിലും നല്ല പ്രാവീണ്യമുണ്ടായിരുന്ന മാതാപിതാക്കൾ വളരെ ചെറിയ പ്രായംമുതൽ തന്നെ പുരുഷോത്തമനെയും സഹോദരി ലീലയെയും ശസ്ത്രീയ സംഗീതം പരിശീലിപ്പിച്ചിരുന്നു. 13-ആം വയസിൽ തിരുവട്ടാറിലെ ആദികേശവ ക്ഷേത്രത്തിൽ വച്ചായിരുന്നു അരങ്ങേറ്റം. 15-ആം വയസിൽ അന്നത്തെ തിരുവിതാംകൂർ പ്രക്ഷേപണ നിലയത്തിൽ കർണാടക സംഗീതം ആലപിച്ചുകൊണ്ട് തന്റെ സംഗീത ജീവിതത്തിനു തുടക്കം കുറിച്ചു. കർണാടക സംഗീതത്തിലായിരുന്നു കൂടുതൽ താൽപ്പര്യമെങ്കിലും 1950-ൽ ആകാശവാണി രൂപീകരിക്കപ്പെട്ടപ്പോൾ അനേകം ലളിതഗാനങ്ങൾ നിലയത്തിനു വേണ്ടി ആലപിച്ചു. 1953-ൽ പൊൻകതിർ എന്ന ചിത്രത്തിനു വേണ്ടി നലുവരി കവിത ആലപിച്ചുകൊണ്ടായിരുന്നു അദ്ദേഹം സിനീമരംഗത്തേക്കു പ്രവേശിച്ചത്. ആ വരികൾ താഴെ കൊടുക്കുന്നു.[1]
| “ | ആശങ്കാതിമിരം പടർന്നൊരിടിമേഘം പോയ്മറഞ്ഞംബരേ അശാചന്ദ്രനുയർന്നു മന്നിടമതിൽ വീശുന്നിതാ പൊൻകതിർ |
” |
അതിനുശേഷം അനശ്വരങ്ങളായ അനേകം പാട്ടുകൾ അദ്ദേഹം മലയാളഗാന ശാഖയ്ക്കു സംഭാവന ചെയ്തിട്ടുണ്ട്.[2][3] തിരുനയിനാർകുറിച്ചി-ബ്രദർ ലക്ഷ്മണൻ ടീമിന്റെ ഗാനങ്ങളാണ് അദ്ദേഹം കൂടുതൽ ആലപിച്ചത്.
പ്രസിദ്ധമായ ഗാനങ്ങൾ
തിരുത്തുക| ക്രമനംബർ | ചിത്രം | വർഷം | ഗാനങ്ങൾ |
|---|---|---|---|
| 1 | ഹരിശ്ചന്ദ്ര | 1955 | ആരുണ്ട് ചൊല്ലാൻ, ആത്മവിദ്യലയമേ |
| 2 | ജയിൽപ്പുള്ളി | 1957 | സംഗീതമീ ജീവിതം, വെള്ളിനിലാവത്ത് |
| 3 | മറിയക്കുട്ടി | 1958 | മയമീ ലോകം മായുമീ ശോകം |
| 4 | രണ്ടിടങ്ങഴി | 1958 | നാളെയാണു കല്യാണം, തുമ്പപ്പൂ പെയ്യണ പൂനിലാവേ |
| 5 | ഭക്തകുചേല | 1961 | ഈശ്വരചിന്തയിതൊന്നേ, നാളെ നാളെയെന്നായിട്ടു |
| 6 | ഭാർഗവീനിലയം | 1964 | ഏകാന്തതയുടെ അപാര തീരം |
| 7 | തറവാട്ടമ്മ | 1966 | മറ്റൊരു സീതയെ കാട്ടിലേക്കയക്കുന്നു |
| 8 | ലേഡീ ഡോക്ടർ | 1967 | മധുരിക്കും ഓർമകളേ |
| 9 | അദ്ധ്യാപിക | 1968 | മന്നിടം പഴയൊരു മൺവിളക്കാണതിൽ |
| 10 | കിളിവാതിൽ | 1993 | കാശേ നീയാണു ദൈവം |
തുടങ്ങി അനവധി അനശ്വര ഗാനങ്ങൾ മലയാളത്തിനു സംഭാവന നൽകിയ ഈ ഗായകൻ അവസാനമായി പാടിയത് യൂസഫ് അലി എഴുതി മോഹൻ സിതാര സംഗീതം നൽകിയ കാശേ നീയാണു ദൈവം എന്ന ഗാനമാണ്. 1995 മേയ് 26-ന് തിരുവനന്തപുരത്തേയ്ക്കുള്ള ഒരു കാർ യാത്രയ്ക്കിടയിൽ ഹൃദയസ്തംഭനത്തെത്തുടർന്ന് അദ്ദേഹം അന്തരിച്ചു. രമണിയാണ് ഭാര്യ. നാലുമക്കളുണ്ട്.
അവലംബം
തിരുത്തുക- ↑ മലയളസംഗീതം.ഇൻഫോയിൽ നിന്ന് പ്രൊഫൈൽ കമുകറ പുരുഷോത്തമൻ
- ↑ ദേവരാഗം.കോമിൽ നിന്ന് Archived 2014-04-20 at the Wayback Machine. കമുകറ പുരുഷോത്തമൻ ഹിറ്റ്
- ↑ രാഗാ.കോമിൽ നിന്ന് എവെർ ഗ്രീൻ ഹിറ്റ് ഓഫ് കമുകറ
പുറത്തേക്കുള്ള കണ്ണികൾ
തിരുത്തുക- ഇന്റർനെറ്റ് മൂവി ഡേറ്റാ ബേസിൽ നിന്ന് കമുകറ പുരുഷോത്തമൻ