എം.ഡി. രാമനാഥൻ

പ്രസിദ്ധനായ ഒരു കർണ്ണാടകസംഗീതജ്ഞനായിരുന്നു എം.ഡി.ആർ എന്ന ചുരുക്കപ്പേരിലറിയപ്പെട്ടിരുന്ന മഞ്ഞപ്ര ദേവേശഭാഗവതർ രാമനാഥൻ. പാലക്കാട് ജില്ലയിലെ മഞ്ഞപ്ര എന്ന സ്ഥലത്ത് ദേവേശഭാഗവതരുടെയും സീതാലക്ഷ്മിയമ്മാളുടെയും മകനായി 1923 മെയ് 20-നാണ് രാമനാഥൻ ജനിച്ചത്. അദ്ദേഹത്തിന്റെ പിതാവ് ദേവേശ ഭാഗവതർ കർണ്ണാടകസംഗീതത്തിൽ അവഗാഹമുള്ളയാളും ഗായകനുമായിരുന്നു. പാലക്കാട് വിക്ടോറിയാ കോളേജിൽ നിന്നും ഭൗതികശാസ്ത്രത്തിൽ ബിരുദം നേടിയ രാമനാഥൻ സംഗീതത്തിൽ പഠനം നടത്തുന്നതിനു വേണ്ടി മദ്രാസ്സിലേയ്ക്കു താമസം മാറുകയാണ് ചെയ്തത്.

എം.ഡി. രാമനാഥൻ
എം.ഡി. രാമനാഥൻ
ജനനം	മഞ്ഞപ്ര ദേവേശ ഭാഗവതർ രാമനാഥൻ 1923 മേയ് 20 മഞ്ഞപ്ര, പാലക്കാട് ജില്ല
മരണം	ഏപ്രിൽ 27, 1984(1984-04-27) (പ്രായം 60) ചെന്നൈ, തമിഴ്നാട്
ദേശീയത	ഇന്ത്യ
അറിയപ്പെടുന്നത്	കർണ്ണാടക സംഗീതഞ്ജൻ

സംഗീതപഠനം

ഈ കാലയളവിൽ തന്നെയാണ് രുഗ്മിണീ ദേവി അരുണ്ഡേൽ കലാക്ഷേത്രയിൽ സംഗീതശിരോമണി കോഴ്സ് തുടങ്ങുന്നത്. 1944-ൽ ആരംഭിച്ച ആദ്യബാച്ചിൽ പ്രവേശനം കിട്ടിയത് രാമനാഥനു മാത്രമായിരുന്നു. അല്പകാലത്തിനുള്ളിൽ തന്നെ പ്രസിദ്ധ സംഗീതജ്ഞനായിരുന്ന ടൈഗർ വരദാചാരിയുടെ പ്രിയപ്പെട്ട ശിഷ്യനുമായിത്തീർന്നു രാമനാഥൻ. ഈ ഗുരുശിഷ്യബന്ധം 1950-ൽ ടൈഗർ അന്തരിയ്ക്കുന്നതുവരെ തുടർന്നു. പിൽക്കാലത്ത് കലാക്ഷേത്രയിൽ സംഗീതത്തിന്റെ പ്രൊഫസ്സറായും പിന്നീട് ആ സ്ഥാപനത്തിന്റെ തലവനായും എം.ഡി.ആർ. ചുമതല വഹിച്ചു.

രാമനാഥന്റെ ആലാപനശൈലി

തികച്ചും വ്യത്യസ്തമായ ഒരു ആലാപനശൈലിയ്ക്ക് ഉടമയായിരുന്നു എം.ഡി.ആർ. അദ്ദേഹത്തിന്റെ ശാരീരം ഒരുപോലെ ആഴമുള്ളതും ഗാംഭീര്യമാർന്നതും ആയിരുന്നു. ഗുരുവിനെപ്പോലെ അതിവിളംബിതശൈലി പിന്തുടർന്ന എം.ഡി.ആർ. രാഗങ്ങളുടെ ഭാവതീവ്രത ഒട്ടുംതന്നെ ചോർന്നുപോകാതെ ആസ്വാദകർക്ക് അനുഭവേദ്യമാക്കുകയുണ്ടായി. ശഹാന, ശ്രീ, ആനന്ദഭൈരവി, രീതിഗൗള, യദുകുല കാംബോജി, ഹംസധ്വനി ഇവയെല്ലാം എം.ഡി.ആറിന്റെ പ്രിയപ്പെട്ട രാഗങ്ങളിൽ ചിലതായിരുന്നു.

ഏതാണ്ട് 300 ലധികം സംഗീതകൃതികൾ തെലുങ്ക്, സംസ്കൃതം, തമിഴ് എന്നീ ഭാഷകളിലായി എം.ഡി.ആർ.രചിച്ചിട്ടുണ്ട്. തന്റെ ഗുരുനാഥനായ വരദാചാരിയോടുള്ള ബഹുമാനാർത്ഥം തന്റെ കൃതികളിൽ വരദദാസ എന്ന മുദ്ര അദ്ദേഹം ചേർക്കുകയുണ്ടായി.

അദ്ദേഹത്തിന്റെ ചില രചനകൾ താഴെ ചേർക്കുന്നു.

കൃതി	രാഗം	താളം	Language
ആനൈമുഖത്തോനേ	മണിരംഗ്	മിശ്രചാപ്പ്	തമിഴ്
അപരാധമുള്ളേലനു	ഗൗരിമനോഹരി	ആദി	തെലുങ്ക്
ഭജ ഭജ മനുജാ	ബിഹാഗ്	ആദി	സംസ്കൃതം
ഭാരതേശനുതേ	ആരഭി	മിശ്രചാപ്പ്	സംസ്കൃതം
ബൃന്ദാവനലോക	കല്യാണി	ആദി	തെലുങ്ക്
ബ്രോചുദകു സമയമിദേ	ബേഗഡ	രൂപകം	തെലുങ്ക്
ദണ്ഡപാണി	രാമപ്രിയ	രൂപകം	തെലുങ്ക്
ദാരി നീവാളേ	ബേഗഡ	രൂപകം	തെലുങ്ക്
ധർമ്മവതി	ധർമ്മവതി	രൂപകം	തെലുങ്ക്
ദുർഗ്ഗാദേവീ	ശ്രീ	ആദി	സംസ്കൃതം
എന്ദുകി ചപലമു	പൂർവ്വികല്യാണി	ആദി	തെലുങ്ക്
എന്ന കുറ്റ്രം ചെയ്തിടേനോ	ഹുസേനി	ആദി	തമിഴ്
ഗജവദനം	ഹംസധ്വനി	രൂപകം	സംസ്കൃതം
ഗുരുചരണം	കാനഡ	ആദി	സംസ്കൃതം
ഗുരുവരം ഭജ മാനസ	ധന്യാസി	രൂപകം	സംസ്കൃതം
ഹരിയും ഹരനും	അഠാണ	രൂപകം	തമിഴ്
സാഗര ശയനവിഭോ	ബാഗേശ്രീ	ആദി	സംസ്കൃതം
തില്ലാന	കാപ്പി	രൂപകം	സംസ്കൃതം
ത്യാഗരാജഗുരും	കേദാരം	രൂപകം	സംസ്കൃതം
വിഘ്നരാജാ നന്നു	ശ്രീരഞ്ജിനി	ആദി	തെലുങ്ക്

ബഹുമതികൾ

എം.ഡി.ആറിനു 1974-ൽ പദ്മശ്രീ പുരസ്ക്കാരവും, 1975-ൽ സംഗീത നാടക അക്കാദമി അവാർഡും ലഭിയ്ക്കുകയുണ്ടായി. എന്നാൽ 1983-84 ലെ സംഗീതകലാനിധി പുരസ്ക്കാരത്തിനു പരിഗണിച്ചിരുന്നെങ്കിലും പരിഗണനയ്ക്കിടയിൽ തന്നെ അദ്ദേഹം മരിച്ചതിനാൽ അത് അദ്ദേഹത്തിനു നല്കുകയുണ്ടായില്ല.

മരണം

ദീർഘകാലമായുണ്ടായിരുന്ന അസുഖത്തെത്തുടർന്ന്, 1984 ഏപ്രിൽ 27-ന് എം.ഡി.ആർ അന്തരിച്ചു. മരണസമയത്ത് 61 വയസ്സായിരുന്നു അദ്ദേഹത്തിന്. ഭാര്യയും ഒരു മകനും അടങ്ങുന്നതായിരുന്നു അദ്ദേഹത്തിന്റെ കുടുംബം.

പുറംകണ്ണികൾ

• Website of M.D.Ramanathan Archived 2018-09-17 at the Wayback Machine.
• MDR, Mythical Music Maker Archived 2021-02-10 at the Wayback Machine.
• Growing in stature