ആൻഡ്രോപോസ്

മദ്യവയസ്സിൽ അല്ലെങ്കിൽ വാർദ്ധക്യത്തിൽ പുരുഷന്മാരിൽ പുരുഷ ഹോർമോണായ ടെസ്റ്റോസ്റ്റിറോൺ (Testosterone) അഥവാ ആൻഡ്രജൻ (Androgen) അളവ് കുറയുന്നതിനെ വിവരിക്കാൻ ഉപയോഗിക്കുന്ന പദമാണ് ആൻഡ്രോപോസ് (Andropause). 'പുരുഷ ആർത്തവവിരാമം' എന്നും ഇതറിയപ്പെടാറുണ്ട്. 40 അല്ലെങ്കിൽ 50, 55 വയസ് പിന്നിട്ട പുരുഷന്മാരിലാണ് ഈ അവസ്ഥ ഏറ്റവും കൂടുതൽ കാണപ്പെടുന്നത്. വ്യായാമക്കുറവ്, അനാരോഗ്യകരമായ ഭക്ഷണം, പുകവലി, അതിമദ്യാസക്തി, മാനസിക സമ്മർദം, ചില അസുഖങ്ങൾ എന്നിവ വേഗം തന്നെ ഇതിലേക്ക് നയിക്കുന്ന ഘടകങ്ങളാണ്. സ്ത്രീകളിൽ, താരതമ്യേന കുറഞ്ഞ കാലയളവിൽ അണ്ഡോത്പാദനം അവസാനിക്കുകയും ഈസ്ട്രജൻ ഹോർമോൺ ഉത്പാദനം കുറയുകയും ചെയ്യുന്നു. ഇത് ആർത്തവവിരാമം എന്നറിയപ്പെടുന്നു. പുരുഷന്മാരിൽ, ടെസ്റ്റോസ്റ്റിറോണിന്റെയും മറ്റ് ഹോർമോണുകളുടെയും ഉത്പാദനം വർഷങ്ങളോളം കുറയുന്നു. 'ആൻഡ്രോജന്റെ കുറവ്, വൈകിയുണ്ടാകുന്ന ഹൈപ്പോഗൊനാഡിസം, ടെസ്റ്റോസ്റ്റിറോൺ കുറവ്' എന്നീ പദങ്ങൾ ഒരേ ലക്ഷണങ്ങളെയാണ് സൂചിപ്പിക്കുന്നത്. ക്ഷീണം, ഉറക്കമില്ലായ്മ, മൂഡ് വ്യത്യാസം, ലൈംഗിക താല്പര്യക്കുറവ്, ലിംഗത്തിന്റെ ഉദ്ധാരണക്കുറവ്, ചുരുങ്ങിയ ലിംഗം എന്നിവയും മറ്റും ലക്ഷണങ്ങളിൽ ഉൾപ്പെടാം. പ്രത്യുൽപാദനക്ഷമതയെയും ബാധിച്ചേക്കാം. വിഷാദരോഗം, കോപം, പേശികളുടെ അളവ് കുറയുക, ശരീരഭാരം കൂടുക, ശാരീരിക രോമവളർച്ച കുറയുക എന്നിവ പുരുഷ ആർത്തവവിരാമത്തിന്റെ ലക്ഷണങ്ങളിൽ ഉൾപ്പെടാം. എന്നിരുന്നാലും, ഈ ലക്ഷണങ്ങൾ എല്ലാവർക്കും അനുഭവപ്പെടില്ല. ഏറിയും കുറഞ്ഞും വ്യത്യാസമുണ്ടാകാം. കൃത്യമായ വ്യായാമം, പോഷക സമൃദ്ധമായ ആഹാരം, പുകവലി, മദ്യപാനം തുടങ്ങിയ ലഹരികൾ ഒഴിവാക്കൽ, മാനസിക സമ്മർദ്ദം ഒഴിവാക്കി ഉല്ലാസ വേളകൾ കണ്ടെത്തുക, ശരിയായ ചികിത്സ തുടങ്ങിയവ ആൻഡ്രോപോസ് എന്ന അവസ്ഥ ഉണ്ടാകാതിരിക്കുവാനോ ചെറുക്കുവാനോ വളരെയധികം സഹായിക്കും. .