ആന്റണി പടിയറ
സിറോ-മലബാർ സഭയുടെ രണ്ടാമത്തെ കർദ്ദിനാളും പ്രഥമ മേജർ ആർച്ച് ബിഷപ്പുമായിരുന്നു മാർ ആന്റണി പടിയറ (ഫെബ്രുവരി 11, 1921 — മാർച്ച് 23, 2000).
| ആന്റണി പടിയറ Antony Padiyara | |
|---|---|
| സിറോ-മലബാർ സഭയുടെ ആദ്യ മേജർ ആർച്ച്ബിഷപ് | |
 | |
| സ്ഥാനാരോഹണം | ഏപ്രിൽ 23, 1985 |
| മുൻഗാമി | ജോസഫ് പാറേക്കാട്ടിൽ |
| പിൻഗാമി | വർക്കി വിതയത്തിൽ |
| വൈദിക പട്ടത്വം | ഡിസംബർ 19, 1945 |
| മെത്രാഭിഷേകം | ജൂലൈ 3, 1955 |
| കർദ്ദിനാൾ സ്ഥാനം | ജൂൺ 28, 1988 |
| മറ്റുള്ളവ | ഊട്ടി രൂപതാ മെത്രാൻ (1955-1970) ചങ്ങനാശേരി ആർച്ച് ബിഷപ്പ് (1970-1985) |
| വ്യക്തി വിവരങ്ങൾ | |
| ജനനം | ഫെബ്രുവരി 11, 1921 മണിമല, കേരളം, ഇന്ത്യ |
| മരണം | മാർച്ച് 23, 2000 (പ്രായം 79) കാക്കനാട്, എറണാകുളം, ഇന്ത്യ |
| വിഭാഗം | സിറോ മലബാർ കത്തോലിക്കാ സഭ |
ജീവിതരേഖ
തിരുത്തുകകോട്ടയം ജില്ലയിലെ മണിമലയിൽ പടിയറ കുരുവിള ആന്റണിയുടെയും അന്നമ്മയുടെയും അഞ്ചാമത്തെ മകനായി 1921 ഫെബ്രുവരി പതിനൊന്നിന് ജനിച്ച ആന്റണി പടിയറയുടെ ആദ്യനാമം പി.കെ.ആന്റണി എന്നായിരുന്നു.[1] മണിമല ഗവൺമെന്റ് സ്കൂൾ, സെന്റ് ജോർജ്ജ് മിഡിൽ സ്കൂൾ, ചങ്ങനാശേരി എസ്.ബി ഹൈസ്കൂൾ എന്നിവിടങ്ങളിൽ നിന്നായി സ്കൂൾ വിദ്യാഭ്യാസം പൂർത്തിയാക്കി. ബാംഗ്ലൂർ സെന്റ് പീറ്റേഴ്സ് റീജിയണൽ സെമിനാരിയിലെ വിദ്യാഭ്യാസത്തെത്തുടർന്ന് 1945 ഡിസംബർ 19 -ന് കോയമ്പത്തൂർ രൂപതയിൽ നിന്ന് വൈദികപട്ടം നേടിയ അദ്ദേഹം തമിഴ്നാട്ടിലെ ഊട്ടിയിലും കർണ്ണാടകയിലെ കൊള്ളീഗലിലും അത്മീയ-പ്രബോധനവൃത്തികളിലേർപ്പെട്ടു.[2] 1952 മുതൽ 1955 വരെയുള്ള കാലയളവിൽ അദ്ദേഹം മൈനർ സെമിനാരിയിലെ റെക്ടറായും തുടർന്ന് ബാംഗ്ലൂർ സെന്റ് പീറ്റേഴ്സ് റീജിയണൽ സെമിനാരിയിലെ പ്രഫസറായും സേവനം അനുഷ്ടിച്ചു.[3]
1955 ജൂലൈ 3-ന് മെത്രാനായി തെരഞ്ഞെടുക്കപ്പെട്ട മാർ ആന്റണി പടിയറ 1955 ഒക്ടോബർ 16-ന് സ്ഥാനാരോഹിതനായി.[2] തന്റെ 34-ആമത്തെ വയസ്സിൽ ഊട്ടി രൂപതയുടെ മെത്രാനായി ചാർജ്ജെടുത്ത അദ്ദേഹം ഇന്ത്യയിലെ കത്തോലിക്കാ സഭയുടെ ചരിത്രത്തിലെ ഏറ്റവും പ്രായം കുറഞ്ഞ ബിഷപ്പായിരുന്നു.[4] 1970 ജൂൺ 14-ന് ചങ്ങനാശേരി അതിരൂപതയിലും 1985 ഏപ്രിൽ 23-ന് എറണാകുളം-അങ്കമാലി അതിരൂപത അതിരൂപതയിലും ആർച്ചുബിഷപ്പ് സ്ഥാനത്തേക്ക് അദ്ദേഹം നിയോഗിക്കപ്പെട്ടു.
1988 ജൂൺ 28-ന് ജോൺ പോൾ രണ്ടാമൻ മാർപ്പാപ്പ അദ്ദേഹത്തെ കർദ്ദിനാൾ സ്ഥാനത്തേക്ക് ഉയർത്തി.[2] 1992-ൽ സീറോ-മലബാർ സഭക്ക് മേജർ ആർക്കി-എപ്പിസ്കോപ്പൽ പദവി ലഭിച്ചപ്പോൾ സഭയുടെ പ്രഥമ മേജർ ആർച്ച് ബിഷപ്പ് സ്ഥാനം അലങ്കരിക്കുവാനുള്ള നിയോഗം മാർ ആന്റണി പടിയറക്ക് ലഭിച്ചു.[5] ആരോഗ്യപരമായ കാരണങ്ങളാൽ 1996 നവംബർ 11-ന് അദ്ദേഹം സ്ഥാനത്യാഗം ചെയ്തു. എറണാകുളം ജില്ലയിലെ കാക്കനാട്ട് അദ്ദേഹം തന്നെ സ്ഥാപിച്ച പ്രകൃതി ചികിത്സാ കേന്ദ്രത്തിൽ വിശ്രമജീവിതം നയിച്ചു വരികെ 2000 മാർച്ച് 23-ന് അദ്ദേഹം അന്തരിച്ചു.[1] മാർച്ച് 24-ന് എറണാകുളം സെന്റ് മേരീസ് കത്തീഡ്രൽ ബസിലിക്കയിൽ മാർ പടിയറയെ അടക്കം ചെയ്തു.
ബഹുമതികൾ
തിരുത്തുക1998-ൽ പത്മശ്രീ പുരസ്കാരം നൽകി രാഷ്ട്രം അദ്ദേഹത്തെ ആദരിച്ചിട്ടുണ്ട്.[1]
പുറത്തേക്കുള്ള കണ്ണികൾ
തിരുത്തുകഅവലംബം
തിരുത്തുക- ↑ 1.0 1.1 1.2 "കർദിനാൾ മാർ ആൻറണി പടിയറയുടെ ജന്മശതാബ്ദി; ദീപ്തസ്മരണയിൽ സീറോ മലബാർ സഭ". Retrieved 2023-08-20.
- ↑ 2.0 2.1 2.2 Sathyadeepam (2020-03-18). "മർമ്മരം പോലൊരു മഹാനുഭാവൻ കാർഡിനൽ ആൻറണി പടിയറ". Retrieved 2023-08-20.
- ↑ "വിശുദ്ധ റോമാസഭയിലെ കർദ്ദിനാളുമാരുടെ ജീവചരിത്രസമാഹാരം". Archived from the original on 2013-12-31. Retrieved 2011-04-02.
- ↑ കർദ്ദിനാൾ പടിയറ അന്തരിച്ചു, ദ ഹിന്ദു വാർത്ത, മാർച്ച് 24, 2000 [പ്രവർത്തിക്കാത്ത കണ്ണി]
- ↑ "സമന്വയത്തിന്റെ ദീപ്ത ജീവിതം". Retrieved 2023-08-20.