ഋതുവാകൽ അല്ലെങ്കിൽ പ്രായപൂർത്തിയാകുന്നത് ഒരു പെൺകുട്ടിയോ ആൺകുട്ടിയോ ലൈംഗിക പക്വത പ്രാപിക്കുന്ന സമയമാണ്. ശാരീരികവും മാനസികവുമായ മാറ്റങ്ങൾ, ദ്വിതീയ ലൈംഗിക സ്വഭാവസവിശേഷതകളുടെ വികസനം എന്നിവയ്ക്കൊപ്പം ഒരു കുട്ടിയിൽ നിന്ന് മുതിർന്നവരിലേക്കുള്ള പരിവർത്തനത്തെ ഇത് സൂചിപ്പിക്കുന്നു. പാരിസ്ഥിതികവും ജനിതകവുമായ ഘടകങ്ങൾ പ്രായപൂർത്തിയാകുന്നതിന് കാരണമാകുന്നു.

പ്രായപൂർത്തിയാകുബോൾ പെൺകുട്ടികളുടെയും ആൺകുട്ടികളുടെയും ശരീരത്തിന് സംഭവിക്കുന്ന മാറ്റം അവരെ സ്ത്രീയും പുരുഷനുമാക്കുന്നു.

പ്രായപൂർത്തിയായ ഒരു പെൺകുട്ടിക്ക് ഗർഭിണിയാകാനും പ്രസവിക്കാനും കഴിയുന്നു. ഒരു ആൺകുട്ടിയുടെ ശരീരം ബീജം ഉത്പാദിപ്പിക്കാൻ തുടങ്ങുകയും സ്ഖലനം സാധിക്കുകയും ചെയ്യുന്നു. ആൺകുട്ടികളുടെ ശബ്ദം കൂടുതൽ ആഴത്തിലാകുന്നതും പെൺകുട്ടികൾ സ്തനങ്ങൾ വളരുന്നതും ആർത്തവം ആരംഭിക്കുന്നതും പ്രായപൂർത്തിയാകുന്നത്തിന്റെ ബാഹ്യ ലക്ഷണങ്ങളാണ്. കേരളത്തിൽ പൊതുവെ പ്രായപൂർത്തിയാകുന്ന ഒരു പെൺകുട്ടിയെ ഋതുമതി എന്ന് വിളിക്കുന്നു.

ശരീരം പ്രായപൂർത്തിയാകുന്നത് എങ്ങനെ നിയന്ത്രിക്കുന്നു തിരുത്തുക

പ്രായപൂർത്തിയാകുന്നത് വിവിധ ഹോർമോണുകളുടെ പ്രവർത്തനത്താലാണ്. ഹൈപ്പോതലാമസ് ഗോണഡോട്രോപിൻ-റിലീസിംഗ് ഹോർമോൺ (ജി.എൻ.ആർ.എച്ച്) സ്രവിക്കുമ്പോൾ പ്രായപൂർത്തിയാകാൻ തുടങ്ങുന്നു. GnRH ഉത്തേജനം വഴി പിറ്റ്യൂട്ടറി ഗ്രന്ഥിയിൽ നിന്ന് ഫോളിക്കിൾ-സ്റ്റിമുലേറ്റിംഗ് ഹോർമോണും ല്യൂട്ടിനൈസിംഗ് ഹോർമോണും പുറത്തുവരുന്നു. ഫോളിക്കിൾ-സ്റ്റിമുലേറ്റിംഗ് ഹോർമോണും ല്യൂട്ടിനൈസിംഗ് ഹോർമോണും ലൈംഗിക ഹോർമോണുകൾ പുറത്തുവിടാൻ ലൈംഗികാവയവങ്ങളെ പ്രേരിപ്പിക്കുന്നു.

പ്രായപൂർത്തിയായ സ്ത്രീയും പുരുഷനും തമ്മിലുള്ള വ്യത്യാസങ്ങൾ തിരുത്തുക

ആൺകുട്ടികളും പെൺകുട്ടികളും പ്രായപൂർത്തിയാകുമ്പോൾ ലൈംഗിക അവയവങ്ങളിൾ മാറ്റങ്ങൾ സംഭവിക്കുന്നു. അവയെല്ലാം സാധാരണ മാറ്റങ്ങളാണ്. സാധാരണയായി 10-നും 14-നും ഇടയിൽ പ്രായമുള്ള പെൺകുട്ടികൾക്കും 12-നും 16-നും ഇടയിൽ ആൺകുട്ടികൾക്കും ലൈംഗിക പുനരുൽപാദനത്തിന് പക്വത കൈവരിക്കുന്നു. പ്രായപൂർത്തിയാകുമ്പോൾ ആൺകുട്ടികൾക്കും പെൺകുട്ടികൾക്കും സംഭവിക്കുന്ന മാറ്റങ്ങളിൽ ലൈംഗികാവയവങ്ങൾ വലുതായി വളരുകയും ശരീരത്തിൽ രോമങ്ങൾ പ്രത്യക്ഷപ്പെടുകയും ഉയരം കൂടുകയും ചെയ്യുന്നു. ഈ മാറ്റങ്ങളെ ദ്വിതീയ ലൈംഗിക സവിശേഷതകൾ എന്ന് വിളിക്കുന്നു.

പെൺകുട്ടികളിൽ തിരുത്തുക

പെൺകുട്ടികളിൽ പ്രായപൂർത്തിയാകുന്നതിന്റെ ആദ്യ ലക്ഷണം സാധാരണയായി സ്തനമുകുളങ്ങൾ വികസിക്കുന്നതാണ്. കൈയുടെ കീഴിലുള്ള (കക്ഷം) രോമങ്ങളും പ്യൂബിക് രോമങ്ങളും (സ്വകാര്യ ഭാഗങ്ങൾ) വളർച്ച, ഉയരത്തിൽ വർദ്ധനവ്, ചർമ്മം എണ്ണമയമുള്ളതായിത്തീരുകയും മുഖക്കുരു, ആർത്തവം (സാധാരണയായി അവസാനമായി സംഭവിക്കുന്നു) തുടങ്ങിയവ ആരംഭിക്കുന്നു. ഒരു പെൺകുട്ടിക്ക് ആദ്യത്തെ ആർത്തവം ലഭിക്കുന്നതിന് ഏകദേശം 6 മാസം മുതൽ 1 വർഷം വരെ യോനിയിൽ നിന്ന് വെളുത്തതും ശ്ലേഷ്മം പോലുള്ളതുമായ സ്രവങ്ങൾ കാണുകയും അനുഭവപ്പെടുകയും ചെയ്യും. ഇത് ശരീരവും ഹോർമോണുകളും മാറുന്നതിന്റെ മറ്റൊരു അടയാളമാണ്. ഡിസ്ചാർജ് യോനിയുടെ ആരോഗ്യം നിലനിർത്താൻ സഹായിക്കുന്നു. സാധാരണ യോനിയിൽ നിന്നുള്ള ഡിസ്ചാർജ് നിറമില്ലാത്ത കട്ടി കുറഞ്ഞതും ചെറുതായി ഒട്ടിപ്പിടിക്കുന്നതുമായിരിക്കും. സ്രവത്തിന്റെ നിറം വെള്ള അല്ലെങ്കിൽ ഓഫ്-വൈറ്റ് വരെ വ്യത്യാസപ്പെടാം. ഡിസ്ചാർജിന്റെ അളവ് ഒരു പെൺകുട്ടിയുടെ ആർത്തവചക്രത്തെ ആശ്രയിച്ചിരിക്കും. സാധാരണ ഡിസ്ചാർജിന് നേരിയ ഗന്ധം മാത്രമേ ഉണ്ടാകൂ. ഒരിക്കലും ചൊറിച്ചിലോ കത്തുന്നതോ ഉണ്ടാകരുത്. നിങ്ങൾ ചൊറിച്ചിൽ, ശക്തമായ ദുർഗന്ധം, അല്ലെങ്കിൽ നിറം മാറ്റം (തവിട്ട്, ചാര അല്ലെങ്കിൽ പച്ച പോലുള്ളവ) എന്നിവ ശ്രദ്ധയിൽപ്പെട്ടാൽ അത് യോനിയിലെ അണുബാധയുടെ ലക്ഷണമാകാം.

ആൺകുട്ടികളിൽ തിരുത്തുക

ആൺകുട്ടികളിൽ വൃഷണങ്ങളും ലിംഗവും വലുതാകുന്നതോടെയാണ് സാധാരണയായി പ്രായപൂർത്തിയാകുന്നത് തുടങ്ങുന്നത്. പ്യൂബിക് ഏരിയയിലും (സ്വകാര്യ ഭാഗങ്ങൾ) കക്ഷങ്ങളിലും രോമ വളർച്ച ആരംഭിക്കുന്നു. പേശികൾ വളർച്ച, ആഴത്തിലുള്ള ശബ്ദം, മുഖത്തെ രോമങ്ങൾ, ശരീരത്തിലെ രോമവളർച്ച, വിയർപ്പ്, ശരീര ദുർഗന്ധം തുടങ്ങിയവ ആരംഭിക്കുന്നു. പ്രായപൂർത്തിയാകുമ്പോൾ ആൺകുട്ടികൾക്ക് ഉദ്ധാരണം ആരംഭിക്കും. (ലിംഗം രക്തം കൊണ്ട് നിറയുകയും കഠിനമാവുകയും ചെയ്യുന്നു). ആൺകുട്ടികൾ ലൈംഗിക കാര്യങ്ങളെക്കുറിച്ച് ചിന്തിക്കുമ്പോഴും അല്ലെങ്കിൽ ചിലപ്പോൾ ഒരു കാരണവുമില്ലാതെ ചിന്തിക്കുമ്പോഴോ ഉദ്ധാരണം സംഭവിക്കുന്നു. ബീജം അടങ്ങിയ ദ്രാവകമാണ് ശുക്ലം. സ്ഖലനം നടക്കുമ്പോൾ ലിംഗത്തിൽ നിന്ന് ബീജം പുറത്തുവരുന്നു. ഉറങ്ങുമ്പോൾ ലിംഗം ഉദ്ധരിക്കുകയും സ്ഖലനം സംഭവിക്കുകയും ചെയ്യുന്നതിനെ സ്വപ്ന സ്കലനം എന്ന് പറയുന്നു. ഇത് സാധാരണമായ ഒരു പ്രക്രിയയാണ്. ഉണരുമ്പോൾ അടിവസ്ത്രമോ കിടക്കയോ അല്പം നനഞ്ഞിരിക്കാം. അതുകൊണ്ടാണ് അവയെ വെറ്റ് ഡ്രീംസ് (നനഞ്ഞ സ്വപ്നങ്ങൾ) എന്ന് വിളിക്കുന്നത്.

വൈകാരിക മാറ്റങ്ങൾ തിരുത്തുക

പ്രായപൂർത്തിയാകുമ്പോൾ ആൺകുട്ടികളുടെയും പെൺകുട്ടികളുടെയും ശരീരത്തിൽ വലിയ അളവിലുള്ള ഹോർമോണുകൾ അവരുടെ വികാരങ്ങളെയും ബാധിക്കുന്നു. ചെറുപ്പക്കാർ പരസ്പരം ആകർഷിക്കപ്പെടാൻ തുടങ്ങുന്നു. ലൈംഗിക താല്പര്യങ്ങൾ ഉണ്ടാകുന്നു. മറ്റുള്ളവർ തങ്ങളെക്കുറിച്ച് എന്താണ് ചിന്തിക്കുന്നതെന്ന് പലപ്പോഴും ആശങ്കാകുലരാകുന്നു. മയക്കുമരുന്നോ അമിതമായ മദ്യപാനമോ പുകവലിയോ പോലുള്ള അപകടകരമായ കാര്യങ്ങൾ ചെയ്യാനുള്ള പ്രേരണയും അവർക്ക് അനുഭവപ്പെടാം. അവർ ചിലപ്പോൾ കൂടുതൽ സ്വാതന്ത്ര്യം ആഗ്രഹിക്കുന്നു. അവരുടെ മാതാപിതാക്കൾ അവരെ കാര്യങ്ങൾ ചെയ്യാൻ അനുവദിക്കാത്തപ്പോൾ ദേഷ്യപ്പെടാം. കൗമാരക്കാരുടെ മസ്തിഷ്കം വളരുന്ന സമയമായതിനാൽ അവർ പക്വത പ്രാപിക്കുന്നതിന് കുറച്ച് സമയമെടുത്തേക്കാം.

"https://ml.wikipedia.org/w/index.php?title=പ്രായപൂർത്തിയാകൽ&oldid=3867066" എന്ന താളിൽനിന്ന് ശേഖരിച്ചത്