കുറുവത്ത് ശ്രീരുധിരമാല ഭഗവതി ക്ഷേത്രം

തൃശ്ശൂർ ജില്ലയിലെ തൃശ്ശൂർ കോർപ്പറേഷനിൽ ഉൾപ്പെട്ട പൂത്തോൾ ഡിവിഷനിലെ പോട്ടയിൽ ലെയിനിൽ സ്ഥിതി ചെയ്യുന്ന ക്ഷേത്രമാണ്, കുറുവത്ത് ശ്രീരുധിരമാല ഭഗവതി ക്ഷേത്രം. പണ്ട്, സ്ത്രീകൾ ശാന്തിക്കാരായിരുന്ന കേരളത്തിലെ ക്ഷേത്രങ്ങളിലൊന്നാണ് ഇത്.

ഐതിഹ്യം

ഈ ക്ഷേത്രത്തിന് ഒന്നര നൂറ്റാണ്ടോളം പഴക്കമുണ്ട്. തൃശ്ശൂർ ജില്ലയിലെ അന്തിക്കാടിനടുത്തുള്ള പുത്തൻപീടിക വടക്കുംമുറിയിൽ സ്ഥിതി ചെയ്യുന്ന നൂറ്റാണ്ടോളം പഴക്കമുള്ള കുറുവത്ത് തറവാട്ടുക്ഷേത്രത്തിൻറെ ഒരു ശാഖയാണ് ഇത്. ഒരു ഈഴവ ക്ഷേത്രമായ ഈ ക്ഷേത്രത്തിലെ പരദേവത കുറുവത്ത് തമ്പുരാട്ടി അമ്മയാണ്.

ഷൊർണൂർ- കൊച്ചി റെയിൽ പാതയുടെ പണി പത്തൊമ്പതാം നൂറ്റാണ്ടിൽ, എടക്കുന്നി വാരിയത്തുക്കാരുടെ ഭൂമിയായിരുന്ന ഇന്നത്തെ പൂത്തോൾ പ്രദേശത്തുണ്ടായിരുന്ന ബ്രിട്ടീഷ് എഞ്ചിനിയർമാർക്ക് കള്ള് ചെത്തികൊടുക്കാൻ വന്നവരായിരുന്നു ഈ ക്ഷേത്രത്തിൻറെ മുൻഗാമികൾ. പുത്തൻപീടികയിലെ കുറുവത്ത് തറവാട്ടിലെ അംഗങ്ങളായിരുന്ന കിട്ടുവും ഭാര്യ പൊന്നിയും അവരുടെ മക്കളുമായിരുന്നു അവർ. പില്ക്കാത്ത്, അവർ ഇവിടെ സ്ഥിരതാമസമാക്കുകയും അവരുടെ കുടുംബദേവതയെ ഇവിടെ കുടിവെയ്ക്കുകയും ചെയ്തു. അക്കാലത്ത്, കുടുംബത്തിലെ സ്ത്രീകളും ഈ അമ്പലത്തിൽ പൂജകൾ ചെയ്തിരുന്നു. ഉദയനാപുരം വിനോദ് ശാന്തിയാണ് ക്ഷേത്രത്തിലെ മേൽശാന്തി.

ഉപദേവതകൾ

വിഷ്ണുമായ, കരിങ്കുട്ടി, ബ്രഹ്മരക്ഷസ് എന്നിവരാണ് ഇവിടത്തെ പ്രധാന ഉപദേവതകൾ. രാമൻ മുത്തപ്പൻ, പാണൻ മുത്തപ്പൻ, മൂത്തകൈമൾ എന്നീ തറവാട്ടുകാർന്നവന്മാരെയും നാഗരാജാവ്, നാഗയക്ഷി കരിനാഗം എന്നീ നാഗദൈവങ്ങളെയും ഇവിടെ ആരാധിച്ചുവരുന്നു.

ഉത്സവങ്ങൾ

മേടമാസത്തിലെ മകയിരം നാളിലെ പ്രതിഷ്ഠാദിനമഹോത്സവവും കുംഭത്തിലെ തോറ്റം പാട്ടുമാണ് ഇവിടത്തെ പ്രധാന ആഘോഷങ്ങൾ. തോറ്റം പാട്ടിനോടനുബന്ധിച്ച് കളമെഴുത്തും പാട്ടും നടത്താറുണ്ട്.

പുറത്തേക്കുള്ള കണ്ണികൾ

• കുറുവത്ത് ക്ഷേത്രത്തിൽ തോറ്റംപാട്ട് ഉത്സവം Mathrubhumi