കാട്ടുഴുന്ന്

ഫാബേസീ കുടുംബത്തിൽപ്പെട്ടതും, ചുറ്റിപ്പിണഞ്ഞ് നിലം പറ്റി, വർഷത്തിൽ എല്ലാസമയത്തും വളരുന്നതുമായ ഒരു സസ്യമാണ് കാട്ടുഴുന്ന്. തണ്ടുകൾക്ക് 30 സെ മി മുതൽ മൂന്ന് മീറ്റർ വരെ നീളമുണ്ടാകും. തണ്ടുകൾക്കും ഇലകൾക്കും വെളുത്ത നിറത്തിൽ മൃദുവായ മുള്ളുകളുടെ ആവരണമുണ്ട്. ഇലകൾ വൃത്താകൃതിയിലോ ദീർഘവൃത്താകൃതിയിലോ ദിർഘചതുരാകൃതിയിലോ 1 - 8 സെ മി നീളത്തിലും,0.5 - 5 സെ മി വീതിയിലും കാണപ്പെടുന്നു. പൂക്കൾക്ക് വെള്ള, പിങ്ക്; കായ്കൾക്ക് കടുത്ത തവിട്ടു മുതൽ ഇളം ചുവപ്പു വരെ നിറങ്ങൾ. 70 മുതൽ 200 ദിവസങ്ങൾ കൊണ്ട് പുഷ്പിക്കുന്നു. പകൽ ദൈർഘ്യം കുറയുമ്പോൾ ഈ സസ്യം പുഷ്പിച്ചു തുടങ്ങുന്നു.

Teramnus labialis (L. f.)
കാട്ടുഴുന്ന്
ശാസ്ത്രീയ വർഗ്ഗീകരണം
കിങ്ഡം:	Plantae
Division:	Magnoliophyta
Family:	Fabaceae(alt. Leguminosae)
Synonyms
teramnus (Cuba); blue wiss (USA); mashparni, mashoni, kattuzhunninveru (India); rabbit vine, horse vine (Barbados) (Glycine labialis L. f.)

വിതരണം

ആഫ്രിക്കൻ ഭൂഖണ്ഡമാകെ‍, ഏഷ്യയിലെ ഉഷ്ണ മേഖലകൾ, കരീബിയൻ ദ്വീപു സമൂഹങ്ങൾ എന്നിവിടങ്ങളിൽ വളരുന്നു.

രസാദി ഗുണങ്ങൾ

രസം :മധുരം, തിക്തം

ഗുണം :ലഘു, സ്നിഗ്ധം

വീര്യം :ശീതം

വിപാകം :മധുരം

ഔഷധയോഗ്യ ഭാഗം

വേര്, സമൂലം

ഉപയോഗങ്ങൾ

ചില ഗോത്ര വർഗ്ഗക്കാർ ഇതിന്റെ കുരു ഒരു ഭക്ഷണ പദാർത്ഥമായും, ഇൻഡ്യയിൽ ആയുർവ്വേദ ഔഷധങ്ങളിലെ ചേരുവയായും ഉപയോഗിക്കുന്നു. കാത്സ്യവും ഫോസ്ഫറസ്സും ധാരാളം അടങ്ങിയ ഇലകളും തണ്ടുകളും നല്ല കാലിത്തീറ്റയാണ്.

ആയുർവേദത്തിൽ

കാംബോജീ, അശ്വപുച്ഛാ, മാഷപർണ്ണി തുടങ്ങിയ പര്യായങ്ങൾ. കഷായ രസമുള്ള വേരിനാണ് ഔഷധ ഗുണം കൂടുതൽ. ഇത് ക്ഷയ രോഗത്തിനുള്ള പ്രതിവിധികളിൽ ഒന്നാണ്. കാട്ടുഴുന്നിലെ സക്രിയ ഘടകങ്ങൾ വാത രോഗങ്ങളെയും, നാഡീവ്യൂഹ സംബന്ധിയായ രോഗങ്ങളേയും, തളർവാതത്തെയും, പീനസത്തെയും ചികിത്സിക്കുവാൻ ഉപയോഗിച്ചു വരുന്നു.

ഔഷധ ഗുണങ്ങൾ

• കാട്ടുഴുന്നിന്റെ സക്രിയ ഘടകം കൂമറൈൻ വിഭാഗത്തിലെ ആൽക്കല്ലൊയിഡുകളാണ്. അതിൽ പ്രധാനമായുള്ള ഫ്രക്സിഡിന് രക്തത്തിലെ പഞ്ചസാരയുടെ അളവ് കുറയ്ക്കുവാൻ ശേഷിയുണ്ട്.
• കാട്ടുഴുന്നിന്റെ തണ്ടുകളിൽ നിന്ന് വേർതിരിച്ചെടുത്ത ഫ്ലേവനോൾ ഗ്ലൈക്കോസൈഡ് (C₂₆H₂₈O₁₇) എന്ന് തന്മാത്രയ്ക്ക് ബാക്റ്റീരിയകൾക്കും കൂണുകൾക്കുമെതിരേ പ്രവർത്തിക്കുവാനുള്ള കഴിവുണ്ട്.
• വേരൊഴികെയുള്ള ഭാഗങ്ങളിൽ നിന്ന് വേർതിരിച്ചെടുത്ത ബെർജെനിൻ (C ₁₄ H ₁₆ O ₉), ഡൈഡ്സിൻ (C ₂₁ H ₂₁ O ₉), വിറ്റെക്സിൻ (C ₂₁ H ₂₀ O ₁₀), 3-O-methyl-D- chiro ഇനോസിറ്റോൾ (C ₇ H ₁₄ O ₆) എന്നീ തന്മാത്രകൾക്ക് വേദന സംഹാര ഗുണങ്ങളുണ്ട്.

പോഷക ഗുണങ്ങൾ

• തമിഴ് നാട്ടിലെ സേലം ജില്ലയിലെ ചില ഗോത്രവർഗ്ഗ്ക്കാർ കാട്ടുഴുന്ന് ഒരു ഭക്ഷണധാന്യമായുപയോഗിക്കുന്നു. അവർക്കിടയിൽ നടത്തിയ പഠനങ്ങൾ‍ കാട്ടുഴുന്നിന്റെ പോഷകഗുണങ്ങൾ വ്യക്തമാക്കുന്നു.

• • മാംസ്യം 22.86%
  • കൊഴുപ്പ് 6.10%
  • ഊർജ്ജം 100 ഗ്രാം ഉണങ്ങിയ ധാന്യത്തിൽ 378.94 കിലോ കാലറി
  • അമിനോ ആസിഡുകൾ-ലൈസീൻ, ല്യൂസീൻ, ഐസോല്യൂസീൻ, ആർജിനൈൻ, വാലൈൻ, ഹിസ്റ്റിഡൈൻ
  • പൊട്ടാസ്സ്യം, മഗ്നീസ്യം, കാത്സ്യം, ഫോസ്ഫറസ് തുടങ്ങിയ ധാതുക്കൾ ഉയർന്ന തോതിൽ അടങ്ങിയിരിക്കുന്നു.

• ഫീനോൾ, ടാന്നിൻ, ഹൈഡ്രജൻ സയനൈഡ് തുടങ്ങിയ ശരീരത്തിനു ദോഷകരമായ തന്മാത്രകൾ, ധാന്യം പാകപ്പെടുത്തുന്നതിനു മുൻപുള്ള കുതിർക്കൽ, പാകപ്പെടുത്തിയതിനുശേഷം വെള്ളം ഊറ്റി കളയൽ തുടങ്ങിയ പ്രക്രിയകളിൽ നശിക്കുന്നു.