റാണി മരിയ

വാഴ്ത്തപ്പെട്ട റാണി മരിയ വട്ടാലിൽ (സിസ്റ്റർ റാണി മരിയ) ഭാരതസഭയിലെ പ്രഥമ വനിതാ രക്തസാക്ഷി ആണ്. എഫ്.സി.സി. എന്ന ചുരുക്കസംജ്‍ഞയിൽ അറിയപ്പെടുന്ന ഫ്രാൻസിസ്ക്കൻ ക്ലാര സഭ സമൂഹത്തിലെ അംഗമായ സിസ്റ്റർ, മിഷൻ പ്രവർത്തനങ്ങൾക്കായി മദ്ധ്യപ്രദേശിലെ ഇൻഡോർ -ഉദയ്നഗർ കേന്ദ്രീകരിച്ച് പ്രവർത്തിച്ചിരുന്നു. അവിടെ പ്രവർത്തനം നടത്തവേ, 1995 ഫെബ്രുവരി 25നു കൊല്ലപ്പെട്ടു.സിസ്റ്ററിന്റെ ജീവിതത്തെ ആസ്പദമാക്കി ഇറങ്ങിയ ബോളിവുഡ് ചലച്ചിത്രമാണ് ദി ഫേസ് ഓഫ് ദി ഫേസ് ലെസ്.

വാഴത്തപ്പെട്ട സി.റാണി മരിയ എഫ്.സി.സി
ജനനം	(1954-01-29)29 ജനുവരി 1954 പുല്ലുവഴി, എറണാകുളം ജില്ല, കേരളം ഇന്ത്യ
മരണം	25 ഫെബ്രുവരി 1995(1995-02-25) (പ്രായം 41) ഇൻഡോർ, മധ്യ പ്രദേശ്‌, ഇന്ത്യ
വണങ്ങുന്നത്	സിറോ മലബാർ സഭ റോമൻ കത്തോലിക്കാ സഭ
വാഴ്ത്തപ്പെട്ടത്	4 നവംബർ 2017, ഇൻഡോർ, ഇന്ത്യ by ആഞ്ചെലൊ അമാത്തോ
ഓർമ്മത്തിരുന്നാൾ	25 ഫെബ്രുവരി
പ്രതീകം/ചിഹ്നം	മതപരമായ ആചാരങ്ങൾ
മദ്ധ്യസ്ഥം	തൊഴിലാളികൾ മിഷനറികൾ

ജീവിതം

ബാല്യവും വിദ്യാഭ്യാസവും

എറണാകുളം ജില്ലയിലെ പുല്ലുവഴിയിലെ വട്ടാലിൽ പൈലി ഏലീശ്വാദമ്പതികളുടെ ഏഴു മക്കളിൽ രണ്ടാമത്തെ മകളായി 1954 ജനുവരി 29ന് ജനിച്ചു. സഹോദരങ്ങൾ: സ്റ്റീഫൻ, ആനി, വർഗീസ്, ത്രേസ്യാമ്മ, സിസ്റ്റർ സെൽമി, ലൂസി. പ്രഥമ വിദ്യാഭ്യാസം പുല്ലുവഴി ഗവ. എൽപിഎസ്നും, പുല്ലുവഴി ജയകേരളം എച്ച്എസ്എസ്, തൃപ്പൂണിത്തുറ സെന്റ് ജോസഫ്സ് ഹൈസ്കൂളിൽ ആയിരുന്നു.

പുണ്യജീവിത നാൾവഴികൾ

• ജ്ഞാനസ്നാനം: 1954 ഫെബ്രുവരി അഞ്ച്. മറിയം എന്ന നാമം സ്വീകരിച്ചു.

• സന്യാസിനി സഭാ പ്രവേശനം: 1972 ജൂലൈ 3

• സഭാവസ്ത്ര സ്വീകരണം: 1974 മേയ് ഒന്ന്

• സാമൂഹിക സേവന പരിശീലനം: 1974 ജൂലൈ ഒൻപത് (പട്ന)

• ബിജ്നോർ രൂപതയിൽ: 1975–1983

• നിത്യവ്രതവാഗ്ദാനം: 1980 മേയ് 22

• സാത്‌ന രൂപതയിൽ: 1983–1992

• എംഎ സോഷ്യോളജി ബിരുദം: 1989 (റീവ യൂണിവേഴ്സിറ്റി)

• ഇൻഡോർ രൂപതയിൽ: 1992 മേയ് 16

• പ്രൊവിൻഷ്യൽ കൗൺസിലർ: 1994 (അമല പ്രൊവിൻസ്, ഭോപ്പാൽ)

• രക്തസാക്ഷിത്വം: 1995 ഫെബ്രുവരി 25

• സംസ്കാരം: 1995 ഫെബ്രുവരി 27

വാഴ്ത്തപ്പെട്ട പദവിയിലേക്ക്

• 2003 ഫെബ്രുവരി 25ന് കർദിനാൾ മാർ വർക്കി വിതയത്തിലിന്റെ കാർമ്മികത്വത്തിൽ ഉദയനഗറിൽ എട്ടാം ചരമവാർഷിക ദിനത്തിൽ ആരംഭിച്ചു.

• ദൈവദാസി പദവി: 2005 ജൂൺ 29

• 2017 നവംബർ 4ന് മദ്ധ്യപ്രദേശിൽ ഇൻഡോർ രൂപതയുടെ മെത്രാസനമന്ദിരത്തിനു സമീപത്തുള്ള സെൻറ് പോൾ ഹയർ സെക്കൻഡറി സ്കൂൾ മൈതാനിയിൽ സമൂഹദിവ്യബലിമദ്ധ്യേ, ഫ്രാൻസീസ് പാപ്പായെ പ്രതിനിധാനം ചെയ്തുകൊണ്ട്, കർദ്ദിനാൾ ആഞ്ചെലൊ അമാത്തോയാണ് സിസ്റ്റർ റാണി മരിയയെ സഭയിലെ വാഴ്ത്തപ്പെട്ടവരുടെ പട്ടികയിൽ ഔപചാരികമായി ചേർത്തു.