രതിസലിലം

രതിസലിലം/ സ്നേഹദ്രവം/ മദനജലം

സ്ത്രീകളിൽ ശാരീരികമായ ലൈംഗികോത്തേജനം ഉണ്ടാകുന്നതിന്റെ പ്രധാന ലക്ഷണമാണ് രതിസലിലം, സ്നേഹദ്രവം അഥവാ മദനജലം. ഇംഗ്ലീഷിൽ വാജിനൽ ലൂബ്രികേഷൻ (Vaginal lubrication) എന്ന്‌ പറയുന്നു. സ്ത്രീകളുടെ ലൈംഗിക ആസ്വാദനത്തിൽ ഇത് സുപ്രധാന പങ്ക് വഹിക്കുന്നു. മഷ്തിഷ്‌ക്കത്തിലെ ഉത്തേജനത്തിന്റെ ഫലമായി യോനീകലകളിൽ രക്തപ്രവാഹം വർദ്ധിച്ചു അതിന്റെ ആഴവും പരപ്പും വർദ്ധിക്കുന്നു. അപ്പോൾ യോനിമുഖത്തിനടുത്തുള്ള 'ബർത്തൊലിൻ ഗ്രന്ഥികൾ, യോനീകലകൾ തുടങ്ങിയവ നനവ്/ വഴുവഴുപ്പുള്ള സ്രവം പുറപ്പെടുവിക്കുന്നു. ഇതിനെയാണ് രതിസലിലം/രതിജലം/സ്നേഹദ്രവം എന്നൊക്കെ വിളിക്കുന്നത്. ആർത്തവചക്രവുമായി ഇത് ബന്ധപെട്ടു കിടക്കുന്നു. ആർത്തവചക്രത്തിന്റെ ഏകദേശം മധ്യത്തിലായി വരുന്ന അണ്ഡവിസർജനം അഥവാ ഓവുലേഷന്റെ സമയത്ത് ഇത് കൂടുതലായി ഉത്പാദിപ്പിക്കപ്പെടുവാൻ സാധ്യതയുണ്ട്. സംഭോഗം സുഖകരമാകാൻ സ്‌നിഗ്ദത നൽകുക, രതിമൂർച്ഛക്ക് (Orgasm) സഹായിക്കുക എന്നിവയാണ് ഇതിന്റെ ധർമ്മം. രതിജലം യാതൊരു ബുദ്ധിമുട്ടും കൂടാതെ ലിംഗം യോനിയിലേക്ക് വഴുതി ഇറങ്ങുവാൻ സഹായിക്കുന്നു. രതിസലിലം യോനിയുടെ ആരോഗ്യവും രക്തയോട്ടവും സൂചിപ്പിക്കുന്നു. സ്ത്രൈണ ഹോർമോണായ ഈസ്ട്രജനുമായി ഇത് ബന്ധപ്പെട്ടിരിക്കുന്നു[1].

ബർത്തോളിൻ ഗ്രന്ഥി രതിസലിലത്തിന്റെ ഉല്പാദനം ഇവിടെ നിന്നാണെന്നു വിശ്വസിക്കപ്പെടുന്നു.

പുരുഷന്മാരിലും സ്നേഹദ്രവം ഉണ്ടാകാറുണ്ട്. ഇംഗ്ലീഷിൽ പ്രീ ഇജാക്കുലേറ്ററി ഫ്ലൂയിഡ് (Pre Ejaculatory Fluid) അഥവാ പ്രീകം (Precum) എന്നറിയപ്പെടുന്നു. ലിംഗത്തിന് ഉദ്ധാരണം സംഭവിച്ചശേഷം സ്‌ഖലനത്തിന് മുന്നോടിയായി ഇത് സ്രവിക്കപ്പെടുന്നു. കൗപ്പേഴ്‌സ് ഗ്രന്ഥികൾ ആണ്‌ ഇവ ഉത്പാദിപ്പിക്കുന്നത്. ഇത് ശുക്ലമല്ല. നിറമില്ലാത്ത ഈ ദ്രാവകം പലരിലും പല അളവിൽ കാണപ്പെടുന്നു. ലിംഗത്തിലേ പിഎച്ച് ക്രമീകരിക്കുക, അതുവഴി ബീജത്തിനെ സംരക്ഷിക്കുക, ലിംഗപ്രവേശനം സുഗമമാകാൻ വഴുവഴുപ്പ് നൽകുക, ഘർഷണം കുറക്കുക, സംഭോഗം സുഖകരമാക്കുക തുടങ്ങിയവയാണ് ഇതിന്റെ ധർമങ്ങൾ ഇതിനുമുണ്ട്. പുരുഷന്റെ മൂത്രനാളിയിലെയും അമ്ലത കുറക്കുന്നത് ഈ ദ്രാവകത്തിന്റെ പ്രവർത്തന ഫലമായാണ്. ഇതിൽ കുറഞ്ഞ അളവിൽ ബീജവും കാണപ്പെടുന്നു. അതിനാൽ ഇത് ഗർഭധാരണത്തിനും കാരണമാകാറുണ്ട്. ശുക്ലം ‌സ്ഖലിക്കുന്നതിന് തൊട്ട് മുൻപ് ലിംഗം യോനിയിൽ നിന്നും പിൻവലിച്ചാൽ പോലും മദനജലം കാരണം ചിലപ്പോൾ സ്ത്രീ ഗർഭം ധരിക്കാം. പിൻവലിക്കൽ രീതി (Withdrawal method) എന്നറിയപ്പെടുന്ന ഗർഭനിരോധന മാർഗം പരാജയപ്പെടാനുള്ള കാരണം ഇതാണെന്ന് വിലയിരുത്തപ്പെടുന്നു[2].

സാധാരണയായി രതിജലത്തിന് പുളിരസമാണുള്ളത്. ഇതിന്റെ നിറം അല്പം വെളുപ്പു കലര്ന്നത് മുതൽ നിറമില്ലാത്തത് വരെ ആകാം, അത് സ്ത്രീകളുടെ ‌ആർത്തവ ചക്രത്തിനനുസരിച്ച് മാറിക്കൊണ്ടിരിക്കും. അണ്ഡവിസർജനത്തിനോട് അനുബന്ധിച്ചു യോനീസ്രവം നേർത്ത് കാണപ്പെടാറുണ്ട്. [3]

സ്ത്രീ സ്ഖലനവും സ്‌ക്വിർട്ടിംങ്ങുംതിരുത്തുക

ചില ഗവേഷണങ്ങൾ സ്ത്രീ സ്ഖലനവും സ്‌ക്വിർട്ടിംഗ് അല്ലെങ്കിൽ ഗഷിംഗ് എന്നറിയപ്പെടുന്നതും തമ്മിൽ വേർതിരിച്ചറിയുന്നു. ഈ പദങ്ങൾ പൊതുജനങ്ങൾ പരസ്പരം മാറിമാറി ഉപയോഗിക്കുന്നു, ഇത് പലപ്പോഴും ആശയക്കുഴപ്പത്തിലേക്ക് നയിക്കുന്നു. ഈ ഗവേഷണ പ്രസിദ്ധീകരണങ്ങളിൽ, "യഥാർത്ഥ" സ്ത്രീ സ്ഖലനം എന്നത് സ്ത്രീ പ്രോസ്റ്റേറ്റിൽ നിന്ന് വളരെ ചെറിയതും കട്ടിയുള്ളതും വെളുത്തതുമായ ദ്രാവകം പുറത്തുവിടുന്നതാണെന്ന് നിർദ്ദേശിക്കപ്പെടുന്നു,

 
സ്ഖലനത്തിനു ശേഷം യോനിയിൽ ദ്രാവകം

അതേസമയം "സ്കിർട്ടിംഗ്" അല്ലെങ്കിൽ "ഗഷിംഗ്" (അശ്ലീലത്തിൽ പതിവായി കാണിക്കുന്നത്) വ്യത്യസ്തമാണ്. പ്രതിഭാസം: വ്യക്തവും സമൃദ്ധവുമായ ദ്രാവകം പുറന്തള്ളൽ, ഇത് മൂത്രാശയത്തിൽ നിന്ന് നേർപ്പിച്ച ദ്രാവകമാണെന്ന് കാണിക്കുന്നു.

യോനീവരൾച്ചതിരുത്തുക

സ്ത്രീകളിൽ രതിസലിലം അഥവാ ലൂബ്രിക്കേഷന്റെ അഭാവത്തെ യോനിവരൾച്ച എന്ന് പറയുന്നു. ലൂബ്രിക്കേഷന്റെ അഭാവത്തിൽ യോനി വരണ്ടും പേശികൾ മുറുകിയും കാണപ്പെടുന്നു. ഏതു പ്രായക്കാരായ സ്ത്രീകളിലും യോനിവരൾച്ച ഉണ്ടാകാം. അത് ആർത്തവചക്രവുമായി ബന്ധപെട്ടു കിടക്കുന്നു. ആർത്തവത്തിന് ശേഷം ഓവുലേഷന് മുൻപായി വരുന്ന കുറച്ചു ദിവസങ്ങളിൽ യോനിയിൽ ചെറിയ വരൾച്ച ഉണ്ടാകാൻ സാധ്യതയുണ്ട്. തന്മൂലം വേദനയും ബുദ്ധിമുട്ടുമുള്ള ലൈംഗികബന്ധവും ജനനേന്ദ്രിയത്തിൽ ചെറിയ പൊറലുകളും മുറിവുകളും ഉണ്ടാകാറുണ്ട്. ചില ആളുകളിൽ വേഴ്ച സമയത്ത് ചെറിയ രക്തസ്രാവം ഉണ്ടാകുന്നത് അതുകൊണ്ടാണ്. ഈ അവസ്ഥയിൽ ലൈംഗികബന്ധം നടന്നാൽ ഘർഷണം മൂലം ഇരുവർക്കും ലൈംഗികബന്ധം വേദനയുള്ളതും വിരസവും, സുഖം ഇല്ലാതാകാനും, പുരുഷന് ലിംഗപ്രവേശനം ബുദ്ധിമുട്ടേറിയതാകാനും സാധ്യതയുണ്ട്. ഇത് സ്ത്രീക്ക് ലൈംഗികബന്ധത്തോട് ഭയവും താല്പര്യക്കുറവും ഉണ്ടാകാനും ചിലപ്പോൾ യോനീസങ്കോചത്തിനും (vaginismus) പങ്കാളിയോട് വിരോധത്തിനും ഇടയാക്കുന്നു. ആവശ്യത്തിന് സമയം സംഭോഗപൂർവലീലകൾക്ക്‌ (ഫോർപ്ലേ) ചിലവഴിച്ചെങ്കിൽ മാത്രമേ പലപ്പോഴും ശരിയായ ലൂബ്രിക്കേഷനും രതിമൂർച്ഛയും ഉണ്ടാവുകയുള്ളൂ [4].

ഇതിന് ശാരീരികവും മാനസികവുമായ പല കാരണങ്ങൾ ഉണ്ട്. യുവതികളിൽ ആമുഖലീല അഥവാ ഫോർപ്ലേയുടെ കുറവ് മൂലമാണ് പ്രധാനമായും യോനി വരൾച്ച ഉണ്ടാകുന്നത്. ഈസ്ട്രജൻ ഹോർമോൺ അസന്തുലിതാവസ്ഥ, പ്രസവശേഷം മുലയൂട്ടൽ, യോനിയിലെ അണുബാധ, പ്രമേഹം, ഓവറി നീക്കം ചെയ്യൽ, തൈറോയ്ഡ് പ്രശ്നങ്ങൾ, ഗര്ഭനിരോധന ഗുളികകൾ, കീമോതെറാപ്പി, ചില മരുന്നുകൾ, നിർജലീകരണം, ഉത്തേജനക്കുറവ് എന്നിവയൊക്കെ കാരണം യോനിവരൾച്ച ഉണ്ടാകാം. മധ്യവയസ്‌കരിൽ ആർത്തവവിരാമത്തിനുശേഷം (Menopause) സ്ത്രീ ഹോർമോണായ ഈസ്ട്രജന്റെ കുറവ്മൂലം സ്നേഹദ്രവത്തിന്റെ ഉത്‌പാദനം കുറഞ്ഞേക്കാം. വേദനയേറിയ ലൈംഗികബന്ധവും താല്പര്യക്കുറവുമാണ് ഇതിന്റെ ഫലം. യോനി മുറുകി ഇരിക്കുന്നതിനാൽ പുരുഷനും സംഭോഗം ബുദ്ധിമുട്ടാകാം. ഇത്തരം ആളുകൾ ദീർഘനേരം രതിപൂർവകേളികളിൽ അഥവാ ഫോർപ്ലേയിൽ ഏർപ്പെടുന്നത് സ്വാഭാവികമായി ലൂബ്രിക്കേഷന് ഉണ്ടാകാൻ സഹായിക്കുന്നു. സ്ത്രീരോഗങ്ങൾ, അണുബാധ എന്നിവ ഉള്ളവർ ഒരു ഡോക്ടറെ കണ്ടു അതിന് കൃത്യമായ ചികിത്സ എടുക്കേണ്ടതുണ്ട്. മാനസിക കാരണങ്ങളിൽ വിഷാദം, വാജിനിസ്മസ് അഥവാ യോനിസങ്കോചം, നിർബന്ധിച്ചുള്ള ലൈംഗികബന്ധം, പങ്കാളിയോടുള്ള താല്പര്യക്കുറവ്, ലൈംഗികതയോടുള്ള വെറുപ്പ്, സ്ട്രെസ്, പങ്കാളിയുടെ ശുചിത്വക്കുറവ്, വായ്നാറ്റം തുടങ്ങിയവ ലൂബ്രിക്കേഷനെ മോശമായി ബാധിച്ചേക്കാം. അലൈംഗികർക്ക് ചിലപ്പോൾ ഇതുണ്ടായില്ലെന്നും വരാം. രതിജലത്തിന്റെ അഭാവത്തിൽ ലൈംഗിക ബന്ധത്തിലേർപ്പെടുമ്പോൾ ജനനേന്ദ്രിയങ്ങളിൽ ഉണ്ടാകുന്ന പോറലുകളിലൂടെ എയ്ഡ്‌സ് മുതലായ സുരക്ഷിതമല്ലാത്ത ലൈംഗികബന്ധത്തിലൂടെ പകരുന്ന രോഗങ്ങളും (STDs) പെട്ടെന്ന് പിടിപെടാൻ സാധ്യതയുണ്ട്. [5]

കൃത്രിമ ജലാധിഷ്ഠിത സ്നേഹകങ്ങൾതിരുത്തുക

രതിജലം അല്ലെങ്കിൽ ലൂബ്രിക്കേഷൻ ഉണ്ടാകാത്ത അവസ്ഥയിൽ ഉപയോഗിക്കുന്നതാണ് കൃത്രിമ ലൂബ്രിക്കന്റ് ജെല്ലികൾ അഥവാ സ്നേഹകങ്ങൾ (Lubricant gels). യോനീവരൾച്ച, യോനിമുറുക്കം, സംഭോഗസമയത്ത് വേദന, നീറ്റൽ, പുകച്ചിൽ എന്നിവ അനുഭവപ്പെടുന്നവർക്ക് അത്തരം ബുദ്ധിമുട്ടുകൾ ഇല്ലാതാക്കി ലൈംഗികബന്ധത്തിന്റെ ആസ്വാദ്യത വർധിപ്പിക്കാനും രതിമൂർച്ഛ അനുഭവപ്പെടാനും ഇത്തരം ലൂബ്രിക്കന്റുകൾ ഏറെ ഫലപ്രദമാണ്. ആദ്യമായി ലൈംഗികബന്ധത്തിൽ ഏർപ്പെടുന്നവർക്കും, ആർത്തവവിരാമം കഴിഞ്ഞവർക്കും, ലൂബ്രിക്കേഷൻ കുറഞ്ഞവർക്കും, ആമുഖലീലകൾക്ക് താല്പര്യമില്ലാത്തവർക്കും, പെട്ടന്ന് ലൈംഗികബന്ധത്തിൽ ഏർപ്പെടുന്നവർക്കും ഇവ ഗുണകരമാണ്.

ഇവ പല തരത്തിലുണ്ട്. ജലം അടങ്ങിയതും (Water based), സിലിക്കൺ അടങ്ങിയതും അവയിൽ ചിലതാണ്. ലൈംഗിക ബന്ധത്തിന് മുൻപായി ഇവ യോനീയിലും ലിംഗത്തിലും പുരട്ടാവുന്നതാണ്. ഫാർമസികൾ, സൂപ്പർ മാർക്കെറ്റുകൾ, ഓൺലൈൻ സ്റ്റോറുകൾ എന്നിവിടങ്ങളിൽ ഇവ ലഭ്യമാണ്. കേവൈ ജെല്ലി, ഡ്യുറക്സ്, കെഎസ് തുടങ്ങിയ വിവിധ ബ്രാൻഡുകൾ വിപണിയിൽ കണ്ടുവരുന്നു. കൃത്രിമ ലൂബ്രിക്കേഷന് വേണ്ടി സസ്യ എണ്ണകൾ അഥവാ വെളിച്ചെണ്ണ , ഉമിനീർ, വാസലിൻ, ബേബി ഓയിൽ തുടങ്ങിയവ യോനിയിൽ അണുബാധയ്ക്ക് സാധ്യത വർധിപ്പിക്കും എന്നതിനാൽ അവ ഒഴിവാക്കുന്നതാണ് ഉചിതം. ഇത് പ്രശ്നം കൂടുതൽ സങ്കീർണ്ണമാക്കാം. എണ്ണ അടങ്ങിയ ലൂബ്രിക്കന്റുകളുടെ (Oil based lubricants) കൂടെ ഉപയോഗിച്ചാൽ ലാറ്റക്സ് കോണ്ടം പൊട്ടിപ്പോകാൻ സാധ്യതയുണ്ട്. അതിനാൽ ജലാംശമടങ്ങിയവയാണ് ഉറകൾക്കൊപ്പം നല്ലത്[6].

ആർത്തവവിരാമത്തിന് ശേഷം സാധാരണ ലൂബ്രിക്കന്റുകൾ ഫലപ്രദമാകാത്തവർക്ക് ഈസ്ട്രജൻ ഹോർമോൺ അടങ്ങിയ ജെല്ലുകൾ ലഭ്യമാണ്. ഇത് ഉപയോഗിക്കുന്നത് യോനിയുടെ സ്വാഭാവികമായ ആരോഗ്യം സംരക്ഷിക്കുന്നതിനും യോനിചര്മത്തിന്റെ കട്ടി വർധിക്കാനും ഇടയ്ക്ക് ഉണ്ടാകുന്ന അണുബാധ അകറ്റുന്നതിനും സഹായകരമാണ്. എന്നാൽ ഇത് ഒരു ഡോക്ടറുടെ നിർദേശപ്രകാരമാണ് ഉപയോഗിക്കേണ്ടത്. ബീജനാശിനി അടങ്ങിയ ലൂബ്രിക്കന്റുകൾ ഗര്ഭനിരോധനത്തിനും സഹായിക്കും. [7]

അവലംബംതിരുത്തുക

  1. "vaginal lubrication - തിരയുക". ശേഖരിച്ചത് 2022-05-19.
  2. "precum men - തിരയുക". ശേഖരിച്ചത് 2022-05-19.
  3. "Understanding Women's Sexual Health: A Case-Based Approach".
  4. "vaginal dryness and pain - തിരയുക". ശേഖരിച്ചത് 2022-05-19.
  5. "vaginal dryness".
  6. "vaginal lubricants - തിരയുക". ശേഖരിച്ചത് 2022-05-19.
  7. "Vaginal dryness after menopause: How to treat it?".

സ്രോതസ്സ്തിരുത്തുക

  1. https://www.mayoclinic.org/symptoms/vaginal-dryness/basics/causes/sym-20151520
  2. https://www.mayoclinicproceedings.org/article/S0025-6196(11)60787-8/fulltext
  3. https://www.mayoclinic.org/vaginal-dryness-after-menopause/expert-answers/faq-20115086


"https://ml.wikipedia.org/w/index.php?title=രതിസലിലം&oldid=3774058" എന്ന താളിൽനിന്ന് ശേഖരിച്ചത്