ജിംനേഷ്യം

ശാസ്ത്രീയമായി ശാരീരിക വ്യായാമം ചെയ്യുന്നതിനോ, കായിക പരിശീലനങ്ങൾക്കായോ ക്രമപ്പെടുത്തിയിരിക്കുന്ന സ്ഥാപനങ്ങളാണ് ജിംനേഷ്യം (Gymnasium) ചുരുക്കത്തിൽ ജിം (Gym) എന്നറിയപ്പെടുന്നു. അത്യാധുനിക രീതിയിൽ വിപുലമായി ക്രമീകരിക്കപ്പെട്ടിട്ടുള്ള ജിംനേഷ്യങ്ങൾ ഹെൽത്ത് ക്ലബുകൾ, ഫിറ്റ്നസ്സ് സെന്ററുകൾ, ഹെൽത്ത്‌ ആൻഡ് ഫിറ്റ്നസ് സെന്ററുകൾ എന്നീ പല പേരുകളിലും അറിയപ്പെടാറുണ്ട്.

ഒരു ആധുനിക ജിംനേഷ്യം

വിദേശ രാജ്യങ്ങളിൽ ശാസ്ത്രീയമായി പരിശീലനം സിദ്ധിക്കപ്പെട്ട മികച്ച ‘രജിസ്റ്റർഡ് ഹെൽത്ത്‌ ആൻഡ് ഫിറ്റ്നസ് പ്രൊഫഷണൽ ട്രെയിനർ’മാരുടെ മേൽനോട്ടത്തിലാണ് ഇത്തരം കേന്ദ്രങ്ങൾ പ്രവർത്തിക്കുന്നത്. അതിനുവേണ്ടി പ്രത്യേക പ്രൊഫഷണൽ കോഴ്സുകൾ തന്നെ അവിടെ യൂണിവേഴ്സിറ്റികൾ നേരിട്ടും ഓൺലൈനായും നടത്തുന്നുണ്ട്. മാത്രമല്ല, പല ജിമ്മുകളും വിദഗ്ദരായ ഫിസിയോതെറാപ്പിസ്റ്റുകളുടെയും ഡയറ്റീഷ്യൻമാരുടെയും സേവനം കൂടി ലഭ്യമാക്കാറുണ്ട്. ഇവിടെ ഡംബെൽ, ബാർബെൽ തുടങ്ങിയ ഫ്രീ വെയ്റ്റ് സാമഗ്രികളും ട്രെഡ് മിൽ, എല്ലിപ്റ്റിക്ക് ട്രെയിനർ തുടങ്ങിയ സങ്കീർണവും ശാസ്ത്രീയവുമായ ആധുനിക വ്യായാമ യന്ത്രങ്ങളും സജ്ജമാക്കിയിരിക്കുന്നു.

ഫ്രീ വെയ്റ്റ് സാമഗ്രികൾ മാത്രമോ അല്ലെങ്കിൽ അവക്ക് പ്രാമുഖ്യം നൽകപ്പെടുകയോ ചെയ്യുന്ന ജിമ്മുകളെ 'കാരിരുമ്പ് ജിമ്മുകൾ' (black-iron gym) എന്ന് പരാമർശിക്കപ്പെടാറുണ്ട്. ശരീരത്തിലെ പേശികൾ അഥവാ മസിലുകളുടെ വളർച്ചയും പോഷണവും ഇവിടെ സാധ്യമാകുന്നു. അന്നജവും, മധുരവും, ഉപ്പും, കൊഴുപ്പും കുറച്ചു പ്രോടീൻ സമ്പുഷ്ടമായതും, പഴങ്ങളും, പച്ചക്കറികളും, പരിപ്പുവർഗങ്ങളും അടങ്ങിയ പോഷകസമൃദ്ധമായ ആഹാരം കഴിക്കേണ്ടത് ഇതിന് ആവശ്യമാണ്. ശാരീരിക മാനസിക ആരോഗ്യവും ശരീരസൗന്ദര്യവും കായിക ബലവും ഉറപ്പ് വരുത്താൻ ജിംനേഷ്യങ്ങൾ സഹായിക്കുന്നു എന്നും പറയാം.

കായിക മികവിനായി, മസിലുകൾ ബലപ്പെടുത്തുന്നതിനായി, ശരീരഭാരം കൂട്ടുകയോ കുറക്കുകയൊ ചെയ്യുന്നതിനായി, കുടവയർ കുറയ്ക്കുന്നതിനായി, ശരീര സൗന്ദര്യവും ആകർഷകത്വവും മെച്ചപ്പെടുത്തുവാനായി, ആരോഗ്യം നിലനിർത്തുന്നതിനായും രോഗങ്ങളെ നിയന്ത്രിക്കുന്നതിനായും, യുവത്വം നിലനിർത്താനായി, മാനസികമായ ഉല്ലാസവും ഊർജസ്വലതയും നിലനിർത്തുന്നതിനായി, ‘ഫിറ്റ്നസ്‘ എന്ന ലക്ഷ്യത്തിനായി, മികച്ച ജീവിതശൈലിയ്ക്കായി, ലൈംഗികവും പ്രത്യുൽപാദനപരവുമായ ആരോഗ്യം മെച്ചപ്പെടുത്താനായി, ടെസ്റ്റോസ്റ്റിറോൺ ഹോർമോൺ ഉത്പാദനം നിലനിർത്താൻ എന്നിങ്ങനെ പല ലക്ഷ്യങ്ങൾക്കായി ജിമ്മുകളിൽ വ്യായാമം ചെയ്യുന്നവരുണ്ട്.

വികസിത രാജ്യങ്ങളിൽ തങ്ങളുടെ ആരോഗ്യവും സൗന്ദര്യവും കായികക്ഷമതയും നിലനിർത്താൻ പ്രായഭേദമന്യേ, സ്ത്രീപുരുഷ വ്യത്യാസമില്ലാതെ ജനങ്ങൾ ജിമ്മുകളിൽ പോകുന്നതായി കാണാം. അത്തരം രാജ്യങ്ങളിലെ പല ജോലിക്കാർക്കും ജിം അംഗത്വം അവരുടെ തൊഴിൽ സ്ഥാപനങ്ങൾ സൗജന്യമായി നൽകാറുണ്ട്. കാൻസർ, പ്രമേഹം, ഹൃദ്രോഗം, പക്ഷാഘാതം, പേശീക്ഷയം, അസ്ഥികളുടെ ബലക്കുറവ്, എല്ലുകളുടെ തേയ്മാനം‌, അമിതവണ്ണം, ഉദ്ധാരണക്കുറവ്, യോനീ വരൾച്ച, വന്ധ്യത, വിഷാദരോഗം, രക്ത സമ്മർദ്ദം, അമിത കൊളസ്ട്രോൾ അടക്കമുള്ള ജീവിതശൈലി രോഗങ്ങളെ ചെറുക്കുവാൻ ഏതൊരു വ്യായാമവും പോലെ തന്നെ ജിമ്മുകളിലെ കായിക പരിശീലനങ്ങൾ നല്ലൊരു പരിധിവരെ സഹായിക്കാറുണ്ട്. ശാരീരിക ആരോഗ്യം മാത്രമല്ല മാനസിക ആരോഗ്യവും, ലൈംഗികാരോഗ്യവും നിലനിർത്താൻ ശാസ്ത്രീയമായ വ്യായാമ പദ്ധതികൾ സഹായിക്കുന്നു എന്ന്‌ പഠനങ്ങൾ തെളിയിക്കുന്നു. മാത്രമല്ല ശരീര സൗന്ദര്യവും, ആകാരഭംഗിയും ടെസ്റ്റോസ്റ്റിറോൺ ഹോർമോൺ സന്തുലിതാവസ്ഥയും മെച്ചപ്പെടുത്തി പ്രായക്കൂടുതൽ മൂലമുണ്ടാകുന്ന പ്രശ്നങ്ങളെയും ഗുരുതര രോഗ സാധ്യതയും നല്ലൊരു ശതമാനംവരെ പരിഹരിക്കാനും ഇതുകൊണ്ട് സാധിക്കുന്നു.

സ്ത്രീകളിൽ പ്രസവ ശേഷമുള്ള ചില ബുദ്ധിമുട്ടുകൾ പരിഹരിക്കാൻ ജിമ്മുകളിലെ വ്യായാമം സഹായകരമാണ്. 45, 50 വയസ് പിന്നിട്ട സ്ത്രീകളിൽ ആർത്തവവിരാമം അഥവാ മെനോപോസ് (Menopause) എന്ന ഘട്ടത്തിൽ ഉണ്ടാകാനിടയുള്ള അസ്ഥികളുടെ ബലക്കുറവും പൊട്ടലും വിഷാദം, കോപം തുടങ്ങിയ മാനസിക പ്രശ്നങ്ങളും ചെറുക്കാൻ ജിമ്മുകളിലെ ശാസ്ത്രീയമായ പരിശീലനം സഹായിക്കാറുണ്ട്. ചില രാജ്യങ്ങളിൽ 'മേനോപോസ് സപ്പോർട്ട് ഗ്രൂപ്പുകളും' ജിമ്മുകളിൽ പ്രവർത്തിക്കുന്നു. പരിശീലനങ്ങൾ കാര്യക്ഷമവും ശാസ്ത്രീയവുമായി നടത്തുന്നതിന് ആധുനിക ജിമ്മുകളിൽ ദൃശ്യ-ശ്രാവ്യ ഉപകരണങ്ങൾ സ്ഥാപിക്കപ്പെട്ടിട്ടുണ്ട്. പ്രധാന പട്ടണങ്ങളിലെ ജിമ്മുകളിൽ നീന്തൽക്കുളം ഉൾപ്പെടെ 'എയറോബിക്സ്' സൗകര്യങ്ങളും വ്യക്തിഗത പരിശീലന പരിപാടികളും യോഗ, 'മസാജ്', 'സ്നാക്ക്സ് ബാർ' അടക്കമുള്ള സേവനങ്ങളും ലഭ്യമാണ്. ചില ജിമ്മുകളും മാസ-വാർഷിക അംഗത്വങ്ങൾക്ക് പുറമേ ആജീവാനന്ത അംഗത്വസൗകര്യവും ഏർപ്പെടുത്താറുണ്ട്.

അമേരിക്കയിലെ ഒരു സ്കൂളിലെ ജിംനേഷ്യം

ചില രാജ്യങ്ങളിൽ ഇൻ-ഡോർ കായിക സൗകര്യങ്ങളോടു കൂടിയ സ്ഥാപനങ്ങളെയാണ് ജിംനേഷ്യം എന്ന് അറിയപ്പെടുന്നത്. അമേരിക്കൻ ഐക്യനാടുകളിൽ മിക്കവാറും എല്ലാ കോളേജുകളിലും സ്കൂളുകളിലും ഇത്തരത്തിലുള്ള ജിംനേഷ്യങ്ങൾ ക്രമീകരിക്കപ്പെട്ടിട്ടുണ്ട്. ചില രാജ്യങ്ങളിൽ പ്രാദേശിക ആരോഗ്യ കേന്ദ്രങ്ങളിലും ഫിസിയോതെറാപ്പി സെന്ററുകളിലും ഇവ ഉണ്ടാകാറുണ്ട്. ഇവയെ 'സ്പോർട്ടേറിയം' എന്ന പേരിലും അറിയപ്പെടാറുണ്ട്.

ചരിത്രം

പുരാതന ഗ്രീസിൽ പതിനെട്ടു വയസ്സ് തികഞ്ഞ പുരുഷ കായികതാരങ്ങൾക്ക് പൊതുമത്സരങ്ങളിൽ പങ്കെടുക്കുന്നതിനുള്ള പരിശീലനം നൽകുവാനായി സ്ഥാപിക്കപ്പെട്ടിരുന്ന കേന്ദ്രങ്ങളെ ജിംനേഷ്യൻ (γυμνάσιον, gymnasion) എന്നു അറിയപ്പെട്ടിരുന്നു. 'നഗ്നരായുള്ള മത്സരങ്ങളുടെ കളരി' എന്നതാണ് ഇതിന്റെ വാച്യാർത്ഥം.പുരുഷസൗന്ദര്യ പ്രദർശനത്തിന്റെയും മറ്റും ഭാഗമായി കായിക മത്സരാർത്ഥികൾ അക്കാലത്ത് നഗ്നരായി മത്സരിച്ചിരുന്നുവെന്നതാണ് ഇതിനു കാരണമായി കരുതുന്നത്.

പുരാതന ഗ്രീക്കുകാരുടെ ഇടയിൽ ഈ പരിശീലന കേന്ദ്രങ്ങൾക്ക് വലിയ പ്രാധാന്യം ഉണ്ടായിരുന്നു. പ്രധാന പട്ടണങ്ങളിലെല്ലാം ഒരു ജിംനേഷനെങ്കിലും സ്ഥാപിക്കുവാൻ ഭരണാധികാരികൾ ശ്രദ്ധിച്ചിരുന്നു. കായിക പരിശീലനത്തിനുള്ള കേന്ദ്രം എന്നതിൽ നിന്നും സ്നാനഘട്ടങ്ങൾ, വസ്ത്രം മാറാനുള്ള അണിയറകൾ, താത്കാലിക താമസയിടം, മത്സരക്കളങ്ങൾ എന്നിങ്ങനെ വിവിധ സൗകര്യങ്ങളുള്ള വൻസമുച്ചയങ്ങളായി ജിംനേഷ്യനുകൾ മാറി. കാലക്രമത്തിൽ തത്ത്വശാസ്ത്രം,സാഹിത്യം,സംഗീതം തുടങ്ങിയ വിഷയങ്ങളിൽ പ്രഭാഷണങ്ങൾക്കും സംവാദങ്ങൾക്കുമുള്ള ഒരു വേദി കൂടിയായി ജിംനേഷനുകൾ മാറപ്പെടുകയും ജിംനേഷ്യനുകളോടൊപ്പം പൊതുവായനശാലകൾ നിർമ്മിക്കുകയും ചെയ്തതോടു കൂടി ഇവയ്ക്ക് ഒരു കായികപരിശീലന കേന്ദ്രം എന്നതിനൊപ്പം ഒരു ബൗദ്ധിക-സാംസ്കാരിക പ്രതിഛായ കൂടി ലഭിക്കപ്പെട്ടു.

പിൽക്കാലത്ത്, ഗ്രീക്കിൽ നിന്നും ഈ പദം ജിംനേഷ്യം എന്ന ലത്തീൻ രൂപത്തിൽ യൂറോപ്യൻ രാജ്യങ്ങളിലും പ്രചരിച്ചു. പക്ഷേ ജർമ്മൻ സംസാരിക്കുന്ന രാജ്യങ്ങളിൽ മൂലപദത്തിന്റെ ബൗദ്ധിക പശ്ചാത്തലത്തിനോട് സാമ്യം പുലർത്തുന്ന വിധം സർക്കാർ നിയന്ത്രണത്തിലുള്ള ഒരു വിഭാഗം ദ്വിതീയ വിദ്യാഭ്യാസകേന്ദ്രങ്ങളെ ജിംനേഷ്യം വിദ്യാലയങ്ങൾ എന്ന് അറിയപ്പെട്ടപ്പോൾ ഇംഗ്ലീഷ് സംസാരിക്കുന്ന രാജ്യങ്ങളിൽ ജിംനേഷ്യം എന്നത് കായിക പരിശീലനത്തിനും വ്യായാമത്തിനുമുള്ള കേന്ദ്രങ്ങളായി തുടർന്നു.