ഈഗുപ്തായ ഓർത്തഡോക്സ് സഭ
| ||||||||||||||||||||||||
ഓറിയന്റൽ ഓർത്തഡോക്സ് സഭകളിലെ ഒരു അംഗസഭയാണ് അലക്സാന്ത്രിയൻ ഈഗുപ്തായ ഓർത്തഡോക്സ് സഭ അഥവാ അലക്സാന്ത്രിയൻ കോപ്റ്റിക് ഓർത്തഡോക്സ് സഭ (Coptic Orthodox Church of Alexandria). 'കോപ്റ്റിക് ഓർത്തഡോക്സ് സഭ' എന്ന ചുരുക്കപ്പേരിൽ അറിയപ്പെടുന്നു.
കോപ്റ്റിക്(ഈഗുപ്തായ) സഭ ക്രി.വ 42-ൽ രൂപംകൊണ്ടുവെന്നും സുവിശേഷകനായ മർ‍ക്കോസാണു് ഒന്നാമത്തെ മേലദ്ധ്യക്ഷനെന്നും വിശ്വസിയ്ക്കപ്പെടുന്നു. അതിനാൽ 'സുവിശേഷകനായ മർ‍ക്കോസിന്റെ സിംഹാസനം' എന്ന് ഈ സഭ അറിയപ്പെടുന്നു. അലക്സാന്ത്രിയയായിരുന്നു സഭാകേന്ദ്രം. അയ്ഗുപ്തോസ് (Aigyptos) എന്ന ഗ്രീക്കു് പദത്തിൽ നിന്നാണു് ഈഗുപ്തായ , കോപ്റ്റിക് , കോപ്റ്റ്, ഈജിപ്ത് തുടങ്ങിയ വാക്കുകളുണ്ടായതു്. [1]
ഈ സഭയുടെ ഉത്ഭവം ഈജിപ്റ്റിലായിരുന്നെങ്കിലും ഇന്ന് ലോകത്തിന്റെ വിവിധഭാഗങ്ങളിൽ ഈ സഭാ വിശ്വാസികൾ അധിവസിക്കുന്നു. 2012-ലെ കണക്കുകൾ പ്രകാരം 10% ഈജിപ്തുകാർ ഈ സഭയിൽ അംഗങ്ങളാണ്.[2]
ചരിത്രത്തിൽതിരുത്തുക
കോപ്റ്റിക് സഭയുടെ മേലദ്ധ്യക്ഷനായ അലക്സാന്ത്രിയയിലെ മാർപ്പാപ്പ ക്രൈസ്തവലോകത്തെ പ്രമുഖനായി കണക്കാക്കപ്പെട്ടിരുന്നു[അവലംബം ആവശ്യമാണ്]. അലക്സാണ്ഡ്രിയയിലെ പതിമൂന്നാമത്തെ ബിഷപ്പായ ഹെരാക്ലസ് മാർപ്പാപ്പ (ക്രി. വ. 231-248) ആണു ക്രൈസ്തവ ലോകത്ത് ആദ്യമായി മാർപ്പാപ്പ എന്നു സംബോധന ചെയ്യപ്പെട്ട സഭാതലവൻ. ബൈബിളിലെ 27 പുതിയനിയമപുസ്തകങ്ങളുടെ പട്ടിക ആദ്യമായി പുറത്തുവന്നത് ക്രി.വ. 369-ൽ അലക്സാന്ത്രിയയിലെ മാർപ്പാപ്പയായിരുന്ന മാർ അത്താനാസിയോസ് (ക്രി.വ. 396-373) പ്രസിദ്ധീകരിച്ച ഈസ്റ്റർ ചാക്രിക ലേഖനത്തിലൂടെ ആയിരുന്നു [3]. നിഖ്യായിലും (ക്രി.വ 325) കുസ്തന്തീനോപ്പോലീസിലും (ക്രി.വ 381) എഫെസോസിലും (ക്രി.വ 431) വച്ചു് കൂടിയ ആകമാന സുന്നഹദോസുകളിൽ പ്രമാണിത്തം വഹിച്ചതു് അലക്സാന്ത്രിയൻ നേതാക്കൻമാരായിരുന്നു. റോമാസാമ്രാജ്യത്തിന്റെ തലസ്ഥാനം ആസ്ഥാനമായിരുന്ന റോമാസഭാദ്ധ്യക്ഷനും അലക്സാന്ത്രിയൻ സഭാദ്ധ്യക്ഷനും തമ്മിലുള്ള മൽ‍സരമായിരുന്നു ക്രി.വ 451-ലെ കൽക്കദോൻ സുന്നഹദോസിനെ തുടർന്നുള്ള സഭാപിളർ‍പ്പിന് ഒരു കാരണമായത്.[അവലംബം ആവശ്യമാണ്] റോമാസഭാദ്ധ്യക്ഷനാണു കൽക്കദോൻ സുന്നഹദോസിനു നേതൃത്വം നല്കിയതു്. ഓറിയന്റൽ ഓർത്തഡോക്സ് സഭകൾ ഒരുഭാഗത്തും റോമാസഭയും ബൈസന്റൈൻ സഭയും മറുഭാഗത്തുമായി സഭ നെടുകെ പിളർന്നു. ക്രൈസ്തവസഭയിൽ ഇന്നും നിലനിൽ‍ക്കുന്ന ഏറ്റവും പുരാതനമായ സഭാപിളർ‍പ്പാണിതു് (പൗരസ്ത്യ സഭ നെസ്തോറിയൻ വിശ്വാസം സ്വീകരിച്ചതു് ക്രി.വ 486-നു് ശേഷമാണു്).[അവലംബം ആവശ്യമാണ്]
ഇപ്പോഴത്തെ സ്ഥിതിതിരുത്തുക
11-ആം നൂറ്റാണ്ടിൽ ആസ്ഥാനം കെയ്റോയിലേക്ക് മാറ്റി. ഈജിപ്തിലെ ജനസംഖ്യയിൽ 10% ആയി ചുരുങ്ങിയ ക്രൈസ്തവരിൽ 95% ഈഗുപ്തായ ഒർത്തഡോക്സ് സഭക്കാരാണു്. ഈജിപ്തിലെ പ്രോട്ടോക്കോൾ അനുസരിച്ചു് പൊതുവേദിയിൽ പ്രധാനമന്ത്രിയുടേതിനോടൊപ്പം സ്ഥാനം ലോക സുന്നിമുസ്ലീം പഠനകേന്ദ്രമായ അൽ അസ്ഹർ സർ‍വകലാശാലയുടെ ഗ്രാൻ‍ഡ് ഷെയ്ക്കിനും അലക്സാന്ത്രിയൻ പോപ്പിനും ഉണ്ടു് . തവാദറോസ് രണ്ടാമനാണ് ഇപ്പോഴത്തെ മാർപാപ്പ.
മുഖപത്രമായ എൽ കറാസ അറബിയിലും ഇംഗ്ലീഷിലും പ്രസിദ്ധീകരിയ്ക്കുന്നു. അഗാപി ടിവി എന്ന ഉപഗ്രഹ ചാനലും കോപ്റ്റിക് സഭ നടത്തുന്നു.
അവലംബംതിരുത്തുക
- ↑ കോപ്റ്റിക് എൻസൈക്ലോപ്പീഡിയ
- ↑ U.S.Dept of State/Egypt
- ↑ ഡോ. പൗലൂസ് മാർ ഗ്രിഗോറിയോസ്; പൗരസ്ത്യ ക്രൈസ്തവ ദർശനം;പുറം: 19 ; ദിവ്യബോധനം പബ്ലിക്കേഷൻസ്, സോഫിയ സെന്റർ, പഴയ സെമിനാരി, കോട്ടയം; 1996
സ്രോതസ്സുകൾതിരുത്തുക
- Wolfgang Kosack, Novum Testamentum Coptice. Neues Testament, Bohairisch, ediert von Wolfgang Kosack. Novum Testamentum, Bohairice, curavit Wolfgang Kosack. / Wolfgang Kosack. neue Ausgabe, Christoph Brunner, Basel 2014. ISBN 978-3-906206-04-2.