ഐരാവതേശ്വര ക്ഷേത്രം

തമിഴ്നാട്ടിലെ കുംഭകോണത്തിനു സമീപം ദാരാസുരത്ത് സ്ഥിതിചെയ്യുന്ന പ്രസിദ്ധമായ ഹൈന്ദവ ക്ഷേത്രമാണ് ഐരാവതേശ്വര ക്ഷേത്രം (തമിഴ് : ஐராவதேஸ்வரர் கோயில்). 'ഐരാവതേശ്വരൻ' എന്നും അറിയപ്പെടുന്ന ശിവനെയാണ് ഇവിടെ ആരാധിക്കുന്നത്. 12-ആം നൂറ്റാണ്ടിൽ രാജരാജ ചോളൻ രണ്ടാമന്റെ കാലത്താണ് (1143-1173) ക്ഷേത്രത്തിന്റെ നിർമ്മാണം നടന്നത്. ക്ഷേത്രത്തിന്റെ നിർമ്മാണത്തിനായി ദ്രാവിഡ വാസ്തുവിദ്യാ ശൈലിയാണ് സ്വീകരിച്ചിരിക്കുന്നത്. ഐരാവതേശ്വര ക്ഷേത്രം, ബൃഹദീശ്വര ക്ഷേത്രം (തഞ്ചാവൂർ), ഗംഗൈകൊണ്ടചോളീശ്വര ക്ഷേത്രം (ഗംഗൈകൊണ്ടചോളപുരം) എന്നീ മൂന്ന് ക്ഷേത്രങ്ങളെയും ചേർത്ത് 'ചോഴ മഹാക്ഷേത്രങ്ങൾ' എന്നുവിളിക്കാറുണ്ട്. 1987-ൽ യുനെസ്‌കോ ഐരാവതേശ്വര ക്ഷേത്രത്തെ ലോക പൈതൃക സ്ഥാനങ്ങളിൽ ഒന്നായി പ്രഖ്യാപിച്ചു.

ഐരാവതേശ്വര ക്ഷേത്രം
ഐരാവതേശ്വര ക്ഷേത്രം
ഐരാവതേശ്വര ക്ഷേത്രം class=notpageimage| തമിഴ്നാട്ടിൽ ക്ഷേത്രത്തിന്റെ സ്ഥാനം.
നിർദ്ദേശാങ്കങ്ങൾ:	10°46′59″N 79°7′57″E
പേരുകൾ
ശരിയായ പേര്:	ഐരാവതേശ്വരർ കോയിൽ
തമിഴ്:	ஐராவதேஸ்வரர் கோயில்
സ്ഥാനം
രാജ്യം:	ഇന്ത്യ
സംസ്ഥാനം:	തമിഴ്നാട്
ജില്ല:	തഞ്ചാവൂർ ജില്ല
സ്ഥാനം:	കുംഭകോണത്തിന് അടുത്തുള്ള ദാരാസുരം
വാസ്തുശൈലി, സംസ്കാരം
പ്രധാന പ്രതിഷ്ഠ:	ശിവൻ
വാസ്തുശൈലി:	ദ്രാവിഡ വാസ്തുവിദ്യ
ക്ഷേത്രങ്ങൾ:	1
ചരിത്രം
നിർമ്മിച്ചത്: (നിലവിലുള്ള രൂപം)	12-ആം നൂറ്റാണ്ട്
സൃഷ്ടാവ്:	രാജരാജ ചോളൻ രണ്ടാമൻ

ഐതിഹ്യം

ക്ഷേത്രത്തിലെ കാളയുടെയും ആനയുടെയും പ്രതിമ

ഹൈന്ദവ ദേവനായ ശിവനാണ് ഈ ക്ഷേത്രത്തിലെ പ്രധാന പ്രതിഷ്ഠ. 'ഐരാവതേശ്വരൻ' എന്ന പേരിലാണ് ശിവനെ ഇവിടെ ആരാധിക്കുന്നത്. ഹിന്ദു പുരാണങ്ങളിൽ പരാമർശിക്കുന്ന വെളുത്ത നിറത്തിലുള്ള ഒരു ആനയാണ് ഐരാവതം. ദുർവാസാവ് മഹർഷിയുടെ ശാപത്തെത്തുടർന്ന് ഐരാവതത്തിന് വെളുപ്പ് നിറം നഷ്ടപ്പെട്ടു. നിറം തിരിച്ചുകിട്ടുന്നതിനു വേണ്ടി ഐരാവതം ഈ സ്ഥലത്തു വച്ച് ശിവനെ തപസ്സു ചെയ്തു. ശിവന്റെ നിർദ്ദേശപ്രകാരം ഇവിടുത്തെ കുളത്തിൽ ഇറങ്ങിയ ഐരാവതത്തിന് വെളുപ്പ് നിറം തിരികെ ലഭിച്ചു എന്നാണ് കഥ. ഐരാവതത്തിന്റെ ദുഃഖം അകറ്റിയതിനാൽ ശിവനെ 'ഐരാവതേശ്വരൻ' എന്നും വിളിക്കുന്നു. മരണത്തിന്റെ ദേവൻ എന്നറിയപ്പെടുന്ന യമനും ഇവിടെ വച്ച് ശിവനെ തപസ്സു ചെയ്തിരുന്നു. 'ശരീരം മുഴുവൻ ചുട്ടുപൊള്ളട്ടെ' എന്ന മുനിശാപത്തിൽ നിന്ന് മുക്തി ലഭിക്കുന്നതിനു വേണ്ടിയായിരുന്നു യമന്റെ തപസ്സ്. ഇവിടുത്തെ കുളത്തിൽ കുളിച്ചു കയറിയ യമദേവന് ശാപമോക്ഷം ലഭിച്ചുവെന്നാണ് വിശ്വാസം. അതിനാൽ ഈ കുളത്തിനെ യമതീർത്ഥം എന്നും വിളിക്കാറുണ്ട്.

പെരിയ നായകി അമ്മൻ കോവിൽ

പെരിയ നായകി അമ്മൻ കോവിലിന്റെ പ്രവേശന കവാടം

ഐരാവതേശ്വര ക്ഷേത്രത്തിന്റെ വടക്കു ഭാഗത്ത് പെരിയ നായകി അമ്മൻ കോവിൽ സ്ഥിതിചെയ്യുന്നു. ഈ ക്ഷേത്രം ഐരാവതേശ്വര ക്ഷേത്രത്തിൽ നിന്ന് ഒറ്റപ്പെട്ടു കാണപ്പെടുന്നു. ശിവന്റെ പത്നിയായ പാർവ്വതി ദേവിയാണ് ഇവിടുത്തെ പ്രതിഷ്ഠ.

ചിത്രശാല

• ഐരാവതേശ്വര ക്ഷേത്രത്തിലെ കാഴ്ചകൾ
• 
  ഐരാവതേശ്വര ക്ഷേത്രത്തിന്റെ പ്രവേശന കവാടം.
• 
  ഗോപുരം
• 
  പുൽത്തകിടി
• 
  വിമാനം (ഏറ്റവും ഉയരമുള്ള ഭാഗം)
• 
  ശില്പങ്ങൾ
• 
  ശ്രീകോവിലിന്റെ പിൻഭാഗം.
• 
  ചിത്രങ്ങൾ
• 
  നാശം സംഭവിച്ച ഭാഗങ്ങൾ.
• 
• 
• 
• 

അവലംബം

• Geeta Vasudevan (2003). The Royal Temple of Rajaraja: An Instrument of Imperial Chola Power. Abhinav Publications. ISBN 81-7017-383-3.
• P.V. Jagadisa Ayyar (1993). South Indian Shrines. New Delhi: Asian Educational Services. ISBN 81-206-0151-3.
• Krishna Chaitanya (1987). Arts of India. Abhinav Publications.
• Richard Davis (1997). Lives of Indian images. Princeton, N.J: Princeton University Press. ISBN 0-691-00520-6.

പുറത്തേക്കുള്ള കണ്ണികൾ

• ഐരാവതേശ്വര ക്ഷേത്രം എന്ന വിഷയവുമായി ബന്ധമുള്ള കൂടുതൽ പ്രമാണങ്ങൾ (വിക്കിമീഡിയ കോമൺസിൽ)
• World Heritage Site status for Airavatesvara Temple Archived 2008-08-15 at the Wayback Machine.
• - A Complete Visitors Guide to Darasuram Airateswara Temple Archived 2015-02-11 at the Wayback Machine.