വട്ടമുടി

തെയ്യം പോലുള്ള അനുഷ്ഠാനകലകളിൽ ദേവതാ വേഷങ്ങൾക്ക് തലയിൽ ചൂടാനുപയോഗിക്കുന്ന അലങ്കാരമാണ് വട്ടമുടി. ആടുപാമ്പേ.. എന്ന പ്രശസ്തമായ നാടൻപാട്ടിൽ പാക്കനാരുടെ വട്ടമുടിയെക്കുറിച്ച് പരാമർശമുണ്ട്.

തെയ്യത്തിലെ വട്ടമുടി

തെയ്യത്തിലുപയോഗിക്കുന്ന മുപ്പതിലധികം തിരുമുടികളുണ്ട്. വട്ടമുടി, ചട്ടമുടി, പൊതച്ചമുടി, ഓലമുടി, പാളമുടി, പീലിമുടി, പൂക്കട്ടി, പുറത്തട്ട്, കൊണ്ഡൽമുടി തൊപ്പിച്ചമയം, ഓലച്ചമയം, ഇലമുടി എന്നീ വിവിധപേരുകളിൽ അവ അറിയപ്പെടുന്നു. പൊതുവേ പുതിയ ഭഗവതിയ്ക്ക് വട്ടമുടിയാണലങ്കാരം. തെയ്യാട്ടച്ചമയങ്ങളിൽ മുടിയലങ്കാരങ്ങൾക്കും മെയ്യലങ്കാരങ്ങൾക്കും മുഖ്യസ്ഥനമുണ്ട്.മുള, കമുക്, പട്ട് എന്നിവയാണ് വട്ടമുടി നിർമ്മാണത്തിനുപയോഗിക്കുന്നത്. ചെത്തിപ്പൂ, കുരുത്തോല എന്നിവയും ഉപയോഗിക്കാറുണ്ട്.

കഥകളിയിലെ വട്ടമുടി

കഥകളിയിൽ ഹനുമാന്റെ വേഷത്തിനും വട്ടമുടി എന്ന അലങ്കാരം ഉപയോഗിക്കാറുണ്ട്. കടത്തനാട്ട് കോവിലകത്തെത്തിയ ഒരു ഫ്രഞ്ച് സായ്പ് രാജാവിന് സമ്മാനിച്ച തൊപ്പി കണ്ട് കളിയോഗത്തിൽ ഇതേമാതൃകയിൽ ഹനുമാന് വട്ടമുടി നിർമ്മിക്കുവാൻ നിർദ്ദേശിച്ചെന്നും വെള്ളക്കാരെല്ലാം വാനരവംശത്തിൽപ്പെട്ടതാണെന്ന കൗതുകത്താലാണിതെന്നും പരാമർശമുണ്ട്. വട്ടമുടിയാട്ടം ഒരു കലാരൂപമായി അവതരിപ്പിക്കപ്പെടുന്നു. കൂടാതെ ഹനുമാൻ, നന്ദികേശ്വരൻ എന്നിവരുടെ വെള്ളത്താടിയ്ക്ക് വട്ടമുടി എന്നും പേരുണ്ട്.