ബെഞ്ചമിൻ മൊളോയിസ്

ദക്ഷിണാഫ്രിക്കയിലെ ഒരു കവിയും, രാഷ്ട്രീയപ്രവർത്തകനുമായിരുന്നു ബെഞ്ചമിൻ മൊളോയിസ്. ദക്ഷിണാഫ്രിക്കയിലെ വർണ്ണവിവേചനത്തിനെതിരേ പോരാട്ടം നടത്തിയ കലാകാരന്മാരിലൊരാളായിരുന്നു ബെഞ്ചമിൻ. ആഫ്രിക്കൻ നാഷണൽ കോൺഗ്രസ്സിന്റെ അനുയായി കൂടെയായിരുന്ന ബെഞ്ചമിൻ മൊളായിസിനെ പി.വി.ബോത്തെ സർക്കാർ തൂക്കിക്കൊല്ലുകയായിരുന്നു.

ബെഞ്ചമിൻ മൊളോയിസ്
ജനനം	ബെഞ്ചമിൻ മൊളോയിസ് 1955 അലക്സാണ്ട്ര, ദക്ഷിണാഫ്രിക്ക
മരണം	1985 ഒക്ടോബർ 18
തൊഴിൽ	മനുഷ്യാവകാശപ്രവർത്തകൻ (അപ്പാർത്തീഡ് നിയമത്തിനെതിരേ പോരാട്ടം നടത്തി)

ജീവചരിത്രം

"അടിച്ചമർത്തലിന്റെ ഒരു കൊടുങ്കാറ്റിനു പിന്നാലെ എന്റെ രക്തം മഴയായ് പെയ്തിറങ്ങും. എനിക്ക് അഭിമാനമേയുള്ളൂ എന്റെ ജീവിതം നൽകാൻ , എന്റെ ഒരേയൊരു ജീവിതം"

കൊല്ലപ്പെടുന്നതിനു മുമ്പ് ബെഞ്ചമിൻ എഴുതിയതെന്നു കരുതപ്പെടുന്ന കവിതയിൽ നിന്നും

1955 ൽ ദക്ഷിണാഫ്രിക്കയിലെ അലക്സാണ്ട്രിയയിലാണ് ബെഞ്ചമിൻ ജനിച്ചത്. ഒരു ഫാക്ടറി തൊഴിലാളിയായിരുന്ന ബഞ്ചമിൻ നിരോധിക്കപ്പെട്ട ആഫ്രിക്കൻ നാഷണൽ കോൺഗ്രസ്സിന്റെ അനുയായിയായിരുന്നു. ദക്ഷിണാഫ്രിക്കയിലെ കുപ്രസിദ്ധമായ അപ്പാർത്തീഡ് നിയമത്തിനെതിരേ പോരാട്ടം നടത്തിയ കലാകാരന്മാരിലൊരാൾ കൂടിയായിരുന്നു ബെഞ്ചമിൻ.

വധശിക്ഷ

1983 ൽ കറുത്തവർഗ്ഗക്കാരനായ ഒരു പോലീസ് ഉദ്യോഗസ്ഥൻ വധിക്കപ്പെട്ടതുമായി ബന്ധപ്പെട്ട കേസിലാണ് പോലീസ് ബെഞ്ചമിനെ അറസ്റ്റ് ചെയ്തത്. ആഫ്രിക്കൻ നാഷണൽ കോൺഗ്രസ്സ് ഈ കൊലപാതകത്തിന്റെ ഉത്തരവാദിത്തം ഏറ്റെടുത്തിരുന്നുവെങ്കിലും, അതിൽ ബെഞ്ചമിന് യാതൊരു പങ്കുമില്ലായിരുന്നുവെന്ന് അറിയിച്ചിരുന്നു. ബെഞ്ചമിന്റെ വധശിക്ഷ റദ്ദാക്കുവാൻ വേണ്ടി ദക്ഷിണാഫ്രിക്കയിലുടനീളം പ്രക്ഷോഭങ്ങളും സമരങ്ങളും നടന്നു. അമേരിക്കയും, റഷ്യയും ഉൾപ്പെടെയുള്ള ലോകരാഷ്ട്രങ്ങൾ ഈ വധശിക്ഷ റദ്ദാക്കുവാൻ, ബോത്തെ സർക്കാരിനോടാവശ്യപ്പെട്ടു. 1985 ഒക്ടോബർ 18 ന് പ്രിട്ടോറിയ ജയിലിൽ വെച്ച് ബെഞ്ചമിനെ തൂക്കിലേറ്റി.