തേറ്റാമ്പരൽ

ഒരിനം ഔഷധസസ്യമാണ് തേറ്റാമ്പരൽ. ലൊഗാനിയേസീ (Loganiaceae) സസ്യകുടുംബത്തിൽ പ്പെടുന്നു. ശാസ്ത്രനാമം: സ്ട്രിക്നോസ് പൊട്ടറ്റോറം (Strychnos potatoram). സംസ്കൃതത്തിൽ കതകഃ, അംബുപ്രസാദഫല, ചക്ഷുഷ്യ, നിർമ്മലഃ, ഛേദനീയ, ഗുഛഫല, കതഃ എന്നീ പേരുകളിലറിയപ്പെടുന്നു. ആയുർവേദത്തിൽ ആസവാരിഷ്ടങ്ങൾ തെളിച്ചെടുക്കാൻ പ്രധാനമായും തേറ്റാമ്പരലാണ് ഉപയോഗിച്ചിരുന്നത്. അതിനാലാണ് തെളിയിക്കുന്നത് അഥവാ നിർമ്മലമാക്കുന്നത് എന്ന് അർഥംവരുന്ന നിർമ്മലഃ എന്ന പേര് ഈ സസ്യത്തിനു ലഭിച്ചത്.

തേറ്റാമ്പരൽ
ശാസ്ത്രീയ വർഗ്ഗീകരണം
കിങ്ഡം:	Plantae
(unranked):	Angiosperms
(unranked):	Eudicots
(unranked):	Asterids
Order:	Gentianales
Family:	Loganiaceae
Genus:	Strychnos
Species:	S. potatorum
Binomial name
Strychnos potatorum L.f.

ലഭ്യത

കേരളത്തിലെ ഇലപൊഴിയും വനങ്ങളിലാണ് തേറ്റാമ്പരൽ സുലഭമായി വളരുന്നത്. ഇടുക്കി ജില്ലയിലെ മറയൂരിലാണ് ഇവ ഏറ്റവും അധികമായുള്ളത്.

ഘടന

4-7 മീ. ഉയരത്തിൽ വളരുന്ന ഈ ചെറുമരത്തിന്റെ ചാരനിറത്തിലുള്ള തൊലിയിൽ ആഴത്തിലുള്ള വിള്ളലുകൾ കാണാം. മരത്തൊലിയുടെ ഉപരിഭാഗം ചെതുമ്പൽ പോലെ അടർന്നുപോവുക പതിവാണ്. തേറ്റാമ്പരലിന് ധാരാളം ശാഖകളുണ്ട്. ഇലകൾക്ക് 5-7.5 സെ.മീ. നീളവും 2-4.5 സെ.മീ. വീതിയുമുണ്ട്. ദീർഘവൃത്താകൃതിയിലുള്ള ഇലകൾ തുകൽപോലെയിരിക്കും. ഇലകളുടെ കക്ഷ്യങ്ങളിൽ നിന്ന് പൂങ്കുലകളുണ്ടാകുന്നു. പുഷ്പങ്ങൾ ചെറുതാണ്. ബാഹ്യദളങ്ങളും ദളങ്ങളും അഞ്ചെണ്ണംവീതം ഉണ്ട്. ഒന്നോ രണ്ടോ വിത്തുകളുള്ള ബെറിയാണ് കായ്. പാകമായ കായ്കൾക്ക് കറുപ്പുനിറമായിരിക്കും.

പരന്ന് വൃത്താകൃതിയിലുള്ള വിത്തിന്റെ ഉപരിതലം മിനുസമുള്ള ലോമങ്ങൾ കൊണ്ട് ആവൃതമായിരിക്കുന്നു. ഇതിന്റെ വിത്തുകൾ ഉപയോഗിച്ച് കഴുകിയ മൺകലത്തിൽ ശേഖരിച്ചുവയ്ക്കുന്ന വെള്ളത്തിലെ മാലിന്യങ്ങൾ വളരെവേഗം അടിയുന്നു.

വിത്തിൽ 'സയബോളിൻ' എന്ന ആൽക്കലോയ്ഡും β-സിറ്റോസ്റ്റെറോൾ, ഒലിയാനോലിക് അമ്ളം, 3-β-അസിറ്റേറ്റ്, സാപ്പോണിൻ, ഗാലക്റ്റോസ്, മാന്നോസ് എന്നീ രാസഘടകങ്ങളും അടങ്ങിയിരിക്കുന്നു.

തേറ്റാമ്പരലിന്റെ വേരും ഫലവും വിത്തും ഔഷധയോഗ്യമാണ്. വേര് നേത്രരോഗങ്ങൾ, മൂത്രകൃച്ഛ്റം, പ്രമേഹം, കഫ പിത്തരോഗങ്ങൾ എന്നിവയ്ക്ക് ഔഷധമാണ്. ആയുർവേദത്തിൽ തേറ്റാമ്പരലിനെ വിഷഘ്ന ഗണത്തിൽ ഉൾപ്പെടുത്തിയിരിക്കുന്നു. കശ്യപ സംഹിതയിൽ തേറ്റാമ്പരലിനെ ഇപ്രകാരം വിശേഷിപ്പിക്കുന്നു:

'കഷായമധുരം ശീതം ആശുദൃഷ്ടിപ്രസാദനം വികാസീഹ്ളാദനം സ്നിഗ്ദ്ധം ചക്ഷുഷ്യം കതകംഫലം'.

പുറത്തേക്കുള്ള കണ്ണികൾ

• http://ayurvedicmedicinalplants.com/index.php?option=com_zoom&Itemid=26&page=view&catid=19&key=11
• http://database.prota.org/dbtw-wpd/exec/dbtwpub.dll?AC=QBE_QUERY&BU=http://database.prota.org/search.htm&TN=PROTAB~1&QB0=AND&QF0=Species+Code&QI0=Strychnos+potatorum&RF=Webdisplay Archived 2011-11-06 at the Wayback Machine.

കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ തേറ്റാമ്പരൽ എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.