ഡോക്ടർ എസ്.എം.എസ്.

എസ്. എം. എസിലൂടെ ഒരു പ്രദേശത്തെ ആശുപത്രികളെ കുറിച്ചും അവിടങ്ങളിൽ ലഭ്യമായ സൗകര്യങ്ങളെ കുറിച്ചും അടിയന്തരഘട്ടത്തിൽ വിവരങ്ങൾ ലഭ്യമാക്കുന്നതിനായി കേരള സംസ്ഥാന സർക്കാർ ഏർപ്പെടുത്തിയിരിക്കുന്ന ഇ- ഗവേർണൻസ് സംവിധാനത്തിന്റെ പേരാണ് ഡോക്ടർ എസ്. എം. എസ് (Dr SMS). കേരള സ്റ്റേറ്റ് യൂണിറ്റ് ഓഫ് ഇൻഫർമാറ്റിക്സ്, സംസ്ഥാന ഐ. റ്റി. മിഷൻ, കേരളസംസ്ഥാന ആരോഗ്യവകുപ്പ് എന്നിവ സഹകരിച്ചാണ് ഈ സംരംഭം ഒരുക്കിയിരിക്കുന്നത്. 2008 മെയ് 8 ന് ആണ് ഈ പദ്ധതിയ്ക്ക് തുടക്കമിട്ടത്. പ്രവർത്തനസജ്ജമായ സംവിധാനം 2008 നവംബർ 7 ന് മുഖ്യമന്ത്രി വി. എസ്. അച്യുതാനന്തൻ ഉദ്ഘാടനം ചെയ്തു. ഈ സംരംഭം 2008-09 വർഷത്തെ ദേശീയ ഇ- ഗവേർണൻസ് പുരസ്കാരത്തിന് നാമനിർദ്ദേശം ചെയ്യപ്പെട്ടിട്ടുണ്ട്.

പ്രവർത്തനം

പിൻകോഡ് ഉപയോഗിച്ചാണ് ഓരോ പ്രദേശത്തെയും ഇതിൽ അടയാളപ്പെടുത്തിയിരിക്കുന്നത്. പിൻകോഡിനോടൊപ്പം പ്രതീക്ഷിക്കുന്ന സൗകര്യങ്ങളും ചേർത്ത് 9446-460600 എന്ന നമ്പറിലേക്ക് എസ്. എം. എസ്. അയയ്ക്കുകയാണ് വേണ്ടത്.

രോഗവിവരങ്ങൾക്കനുസൃതമായ ഏതെങ്കിലും പ്രത്യേക സൗകര്യങ്ങൾ ലഭ്യമായ, പ്രദേശത്തെ ആശുപത്രികൾ ഏതൊക്കെയെന്ന് അറിയുന്നതിന് ഹെൽത് (സ്പെയ്സ്) പിൻകോഡ് (സ്പെയ്സ്) പ്രതീക്ഷിക്കുന്ന സൗകര്യം [Health_Pincode_Facility] എന്ന രീതിയിലാണ് എസ്.എം.എസ്. അയക്കേണ്ടത്. ഏതാണ്ട് 30 സെക്കന്റിനകം മറുപടി ലഭിക്കുന്ന തരത്തിലാണ് ഈ സംവിധാനം ഒരുക്കിയിരിക്കുന്നത്. രോഗിക്ക് ആവശ്യമായ ചികിത്സ ലഭിക്കുന്ന ആശുപത്രികളുടെ പേരും ഫോൺ നമ്പറുകളും അടക്കമുള്ള മറുപടിയാണ് ലഭിക്കുക.

പ്രത്യേക ആശുപത്രിയെ കുറിച്ചുള്ള വിവരങ്ങളാണ് വേണ്ടതെങ്കിൽ ഹെൽത് (സ്പെയ്സ്) ആശുപത്രിയുടെ പേര് [Health_Hospital] എന്ന രീതി ഉപയോഗിയ്ക്കുക. അവിടത്തെ ഫോൺ നമ്പറും ചികിത്സാവിവരങ്ങളും എസ്. എം. എസിലൂടെ ലഭിയ്ക്കും. ഏതെങ്കിലും പ്രത്യേക വിഭാഗം ഉണ്ടോയെന്നാണ് അറിയേണ്ടതെങ്കിൽ ഹെൽത് (സ്പെയ്സ്) ആശുപത്രിയുടെ പേര് (സ്പെയ്സ്) പ്രതീക്ഷിക്കുന്ന സൗകര്യം [Health_Hospital_Facility] എന്ന രീതി ഉപയോഗിയ്ക്കുക. ഫോൺ നമ്പറും പ്രത്യേക വിഭാഗം ഉണ്ടോയെന്നുള്ള വിവരവും ലഭിയ്ക്കും.

ഈ സംവിധാനം ആശുപത്രികളെ കൂടാതെ സ്പെഷ്യലിസ്റ്റ് ഡോക്ടർമാർ, രക്തബാങ്കുകൾ, പരിശോധനാകേന്ദ്രങ്ങൾ, ശസ്ത്രക്രിയാസൗകര്യങ്ങൾ, വെന്റിലേറ്ററുകൾ എന്നീ സൗകര്യങ്ങളെ കുറിച്ചും വിവരങ്ങൾ തരുന്നു.

വ്യാപ്തി

നിലവിൽ കോഴിക്കോട് ജില്ലയിൽ മാത്രമാണ് സേവനം ലഭ്യമായിട്ടുള്ളത്. കോഴിക്കോട് ജില്ലയിലെ 69 ആശുപത്രികളെ കുറിച്ചുള്ള വിശദവിവരങ്ങളാണ് ഇപ്പോൾ ലഭ്യമാക്കിയിരിക്കുന്നത്. പ്രാഥമികാരോഗ്യ കേന്ദ്രങ്ങളെയും പട്ടികയിൽ ഉൾപ്പെടുത്താനുള്ള ശ്രമം നടക്കുന്നു. 24 മണിക്കൂറും പ്രവർത്തിക്കുന്ന സംവിധാനമാണ് ഇത്. സംസ്ഥാനം മുഴുവൻ ഈ സംവിധാനം വ്യാപിപ്പിക്കുന്നതിനാണ് സർക്കാർ ശ്രമിക്കുന്നത്. അതിന്റെ ഭാഗമായി കാസർഗോഡ്, കണ്ണൂർ‍, തൃശൂർ‍, എറണാകുളം ജില്ലകളിൽ ഉടനെ ആരംഭിക്കാൻ പദ്ധതിയുണ്ട്. അതിനുള്ള ഡാറ്റാ എൻട്രി പ്രവർത്തനം നടന്നുവരുന്നു.

ഡോക്ടർ എസ്.എം.എസിന്റെ രണ്ടും മൂന്നും ഘട്ടങ്ങളായ ഇ-മെയിൽ, ഹെൽത് പോർട്ടൽ എന്നിവ വികസിപ്പിക്കാനുള്ള ശ്രമം നടന്നുവരുന്നു. ഇതിൽ ഡോക്ടർമാരുടെ പേര്, പ്രധാനപ്പെട്ട ആശുപത്രികളുടെ പേര് എന്നിവ ഒരുക്കും.