ചിത്താരിപ്പുഴ

കേരളത്തിലെ കാസർഗോഡ് ജില്ലയിലെ കാഞ്ഞങ്ങാടിനടുത്തുള്ള ചിത്താരി ഗ്രാമത്തിലൂടെ ഒഴുകുന്ന ഒരു ചെറിയ പുഴയാണ് ചിത്താരിപ്പുഴ. ഇംഗ്ലീഷ്:chittarippuzha. ഇരിയ പുണൂർ ഭാഗത്തുനിന്ന് ഉത്ഭവിക്കുന്ന ചിത്താരിപ്പുഴക്ക് 25 കിലോ മീറ്റർ നീളമുണ്ട്. ലെപ്റ്റെർമാ ബിജു എന്ന ഞണ്ടുകൾ കാണപ്പെടുന്ന ഏക സ്ഥലവും ഈ പുഴയാണ്. വിവിധ കൈയ്യേറ്റങ്ങളിലൂടെ കടന്നു പോകുന്ന പുഴ ഇപ്പോൾ നാശത്തിന്റെ വക്കിലാണ്.

പേരിനു പിന്നിൽ

മൂന്നു ഭാഗവും പുഴയാൽ ചുറ്റപ്പെട്ടു കിടക്കുന്ന എന്നർത്ഥത്തിലാണ് ചിത്താരി എന്ന ഗ്രാമത്തിന്റെ പേരു സിദ്ധിച്ചത് ( ചുറ്റും ആറ് ). ഈ പുഴയ്ക്ക് ചിത്താരിപ്പുഴ എന്ന പേരു വന്നു.

ഉത്ഭവം

ജില്ലയിലെ ചെട്ടിയാംചാൽ പ്രദേശത്തുള്ള ഇരിയ വാഴുന്നോറുടെയും പട്ടമ്മാരുടെയും കുളങ്ങളാണ് ചിത്താരിപ്പുഴയുടെ ഉത്ഭവകേന്ദ്രം. ചെറമ്പ, തായ്കോളം, പുല്ലൂർ എന്നീ ചെറു നദികൾ കൂടിചേർന്നാണ് ഈ പുഴ രൂപമെടുക്കുന്നത്. ഈ നദിയുടെ പോഷക നദികൾ കാലന്ദ്, ബേക്കൽ പുഴ, ചിറ്റാരിത്തോട് എന്നിവയാണ്.

പതനം

ചേറ്റുകുണ്ട് ഭാഗത്തുനിന്ന് വടക്കോട്ടൊഴുകി നാലു കിലോമീറ്ററിലധികം സഞ്ചരിച്ചാണ് പുഴ അജാനൂർ കടപ്പുറം അഴിമുഖത്ത് കൂടെ കടലിൽ ചേരുന്നത് . ഇതിനു മുൻപായി ചിത്താരി ഗ്രാമത്തെ രണ്ടായി കൈപിരിഞ്ഞ് മൂന്നു വശങ്ങളും ചുറ്റുന്നു.

പ്രത്യേകതകൾ

ചിത്താരി ഗ്രാമത്തിനു ചുറ്റുമുള്ള കണ്ടൽക്കാടുകൾ പ്രത്യേകതയാണ്. ഈ കാടുകളിൽ നിന്ന് ലോകത്ത് മറ്റൊരിടത്തും കാണപ്പെടാത്ത ലെപ്റ്റർമാ ബിജു (Leptarma biju) എന്ന് പേരുള്ള ഞണ്ടുകളെ 4 സെപ്റ്റംബർ 2020നു കണ്ടെത്തിയിട്ടുണ്ട്.

ഇന്നത്തെ അവസ്ഥ

അജാനൂർ പഞ്ചായത്തിലെ ഫീൽഡ് മാപ്പനുസരിച്ച് ചിത്താരി പുഴയുടെ വീതി 70 മുതൽ 100 മീറ്റർ വരെയാണ്. ഇന്ന് 30 മുതൽ 40 മീറ്റർ വരെയായി ചുരുങ്ങിട്ടുണ്ട്. വ്യാപക കൈയേറ്റമാണ് കാരണം.