ബല റാം നന്ദ
ബല റാം നന്ദ (1917 - 30 മേയ് 2010) ഒരു ഇന്ത്യൻ ചരിത്രകാരനായിരുന്നു. മഹാത്മാഗാന്ധിയെക്കുറിച്ചുള്ള പുസ്തക പരമ്പരയുടെ മുഖ്യപത്രാധിപൻ എന്ന നിലയിലാണ് ബൗദ്ധികലോകത്ത് ശ്രദ്ധേയനായത്. നിലവിൽ പാകിസ്താന്റെ ഭാഗമായ റാവൽപ്പിണ്ടിയിൽ 1917 ഒക്ടോബർ 11-ന് പുരുഷോത്തംദാസ് നന്ദയുടെയും മായാദേവി നന്ദയുടെയും മകനായി ജനിച്ചു. ലാഹൂർ ഗവൺമെന്റ് കോളജിൽനിന്നും 1937-ൽ ചരിത്രത്തിൽ ബിരുദവും 1939-ൽ ബിരുദാനന്തര ബിരുദവും നേടി. 1942-ൽ ഇന്ത്യൻ റെയിൽവേയിൽ ഉയർന്ന ഉദ്യോഗസ്ഥനായി ചേരുകയും വിവിധ പദവികൾ വഹിക്കുകയും ചെയ്തു. 1965-ൽ തീൻമൂർത്തി മ്യൂസിയം ആൻഡ് ലൈബ്രറി ആരംഭിച്ചപ്പോൾ അതിന്റെ പ്രഥമ ഡയറക്ടറായി. 1980 വരെ ആ ചുമതല വഹിച്ചു.
പ്രധാനരചനകൾ
തിരുത്തുക- ഗാന്ധി; എ പിക്റ്റോറിയൽ ബയോഗ്രഫി
- ഇൻ ഗാന്ധീസ് ഫൂട്ട്സ്റ്റെപ്സ്,
- ദ് ലൈഫ് ആൻഡ് ടൈംസ് ഒഫ് ജാമ്നലാൽ ബജാജ്,
- ഇൻ സെർച്ച് ഒഫ് ഗാന്ധി,
- ദി നെഹ്റൂസ്: മോട്ടിലാൽ ആൻഡ് ജവാഹർലാൽ,
- ഗാന്ധി ആൻഡ് ഹിസ് ക്രിട്ടിക്സ്,
- മഹാത്മാഗാന്ധി: എ ബയോഗ്രഫി,
- ഗോഖലേ: ദി ഇന്ത്യൻ മോഡറേറ്റ്സ് ആൻഡ് ദ് ബ്രിട്ടീഷ് രാജ്,
- ജവാഹർലാൽ നെഹ്റു: റിബൽ ആൻഡ് സ്റ്റേറ്റ്സ്മാൻ,
തുടങ്ങി ജീവചരിത്രശാഖയെ സമ്പന്നമാക്കിയ നിരവധി രചനകൾ ഇദ്ദേഹത്തിന്റേതായിട്ടുണ്ട്.
ജീവചരിത്രകാരൻ
തിരുത്തുകജീവചരിത്രരചനയിലെ നന്ദയുടെ സവിശേഷപാടവം കണ്ടറിഞ്ഞ നെഹ്റു തന്റെ പിതാവിന്റെ ജീവചരിത്രമെഴുതാൻ ഇദ്ദേഹത്തെ ക്ഷണിക്കുകയായിരുന്നു.
- ഗാന്ധി: പാൻ ഇസ്ലാമിസം,
- ഇംപീരിയലിസം ആൻഡ് നാഷണലിസം ഇൻ ഇന്ത്യ,
- സോഷ്യലിസം ഇൻ ഇന്ത്യ, ഗോഖലേ,
- ഗാന്ധി ആൻഡ് ദ് നെഹ്റൂസ്: സ്റ്റഡീസ് ഇൻ ഇന്ത്യൻ നാഷണലിസം
എന്നിവയാണ് ഇദ്ദേഹത്തിന്റെ മറ്റുപ്രധാന കൃതികൾ.
പുരസ്കാരങ്ങൾ
തിരുത്തുക- ന്യൂഡൽഹിയിലെ ഇന്ത്യൻ കൗൺസിൽ ഒഫ് സോഷ്യൽ സയൻസസ് റിസർച്ച് നാഷണൽ ഫെല്ലോഷിപ്പ്,
- ദാദാഭായി നവറോജി മെമ്മോറിയൽ പുരസ്കാരം
തുടങ്ങി ഒട്ടനേകം പുരസ്കാരങ്ങളും ബഹുമതികളും ഇദ്ദേഹത്തിന് ലഭിച്ചിട്ടുണ്ട്.
- 1988-ൽ പദ്മഭൂഷനും
- 2003-ൽ പദ്മവിഭൂഷനും നൽകി രാഷ്ട്രം ഇദ്ദേഹത്തെ ആദരിച്ചു.
അവലംബം
തിരുത്തുക | കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ നന്ദ, ബി.ആർ. (1917 - ) എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം. |