പി.കെ. ഡീവർ

കേരളത്തിലെ സാമൂഹ്യപരിഷ്കർത്താവായിരുന്നു പി. കെ. ഡീവർ (1901 - 1990). ഇദ്ദേഹത്തിന്റെ മുഴുവൻ പേര് പുരയിടത്തിൽ കൃഷ്ണൻ ഡീവർ എന്നാണ്.

പി.കെ. ഡീവർ
വ്യക്തിഗത വിവരങ്ങൾ
ജനനം	1901 തേവര, എറണാകുളം
മരണം	1990
ദേശീയത	ഇൻഡ്യ
ജോലി	സാമൂഹ്യപരിഷ്കർത്താവ്

ജീവിതരേഖ

തേവര പുതുവൽപുരയിടത്തിൽ അയ്യപ്പന്റെയും നെടുങ്ങാടു കളത്തിത്തിപറമ്പിൽ വെങ്കു കുഞ്ഞമ്മയുടെയും പുത്രനായി ജനിച്ചു. എറണാകുളം മഹാരാജാസ് കോളേജിലാണ് പഠിച്ചത്.

കൊച്ചി പ്രജാ മണ്ഡലത്തിലൂടെ സ്വാതന്ത്ര്യസമരത്തിലും ജനാധിപത്യ ഭരണത്തിനു വേണ്ടിയുള്ള സമരത്തിലും പങ്കെടുത്തു. കൊച്ചി ടാറ്റാ കമ്പനിയിലെ തൊഴിലാളികളെ സംഘടിപ്പിച്ചുകൊണ്ട് ട്രേഡ് യൂണിയൻ രംഗത്തും പ്രവർത്തിച്ചുതുടങ്ങി. അതിനുശേഷം കെ.എസ്ഇ.ബി. എക്സിക്യൂട്ടീവ് എംപ്ലോയിസ് യൂണിയൻ തുടങ്ങിയ നിരവധി തൊഴിലാളി സംഘടനകളുടെ നേതൃത്വം വഹിച്ചു.

കൊച്ചി നിയമസഭയിലേക്ക് തെരഞ്ഞെടുക്കപ്പെട്ടു. തിരു-കൊച്ചി രൂപീകരണത്തെത്തുടർന്ന് തിരു-കൊച്ചി നിയമസഭയിലും അംഗമായി.

തിരുവിതാംകൂർ ചെമ്മീൻ വ്യവസായ സഹകരണ സംഘം 'ഗുണ്ടു ഐലൻഡ്' കയർ വർക്കേഴ്സ് സഹകരണ സംഘം തുടങ്ങി നിരവധി സഹകരണ പ്രസ്ഥാനത്തിൽ നേതൃത്വം വഹിച്ചു. അഖില കേരള ധീവരസഭയുടെ രൂപീകരണത്തിലും പങ്കാളിയായിരുന്നു.

1993-ൽ ഇദ്ദേഹത്തിന്റെ ജീവചരിത്രം ഡീവർ എന്ന കർമ്മധീരൻ, എന്ന പേരിൽ കൊച്ചിയിൽ നിന്ന് പ്രസിദ്ധീകരിക്കപ്പെട്ടിട്ടുണ്ട്.