പി. ശങ്കരൻ നമ്പ്യാർ

സമസ്ത കേരള സാഹിത്യപരിഷത്തിന്റെ സ്ഥാപകാംഗങ്ങളിലൊരാളാണ് പി. ശങ്കരൻ നമ്പ്യാർ. അധ്യാപകൻ, കവി, വിമർശകൻ, പ്രസംഗകൻ എന്നീ നിലകളിലും ഇദ്ദേഹം പ്രശസ്തനാണ്. മലയാളഭാഷയുടെ ഉല്പത്തിയെപ്പറ്റിയുള്ള സിദ്ധാന്തങ്ങളിൽ ശ്രദ്ധേയമായ തമിഴ്-മലയാള പൊതുപൂർവ്വഘട്ടത്തെക്കുറിച്ച് വ്യക്തമായ ഒരു വാദം പുറപ്പെടുവിക്കുന്നത് പി. ശങ്കരൻ നമ്പ്യാരാണ്‌. തൃശൂരിലെ കേരളവർമ കോളേജ് സ്ഥാപിക്കാൻ മുൻകൈ എടുത്ത ശങ്കരൻ നമ്പ്യാർ അതിന്റെ ആദ്യ പ്രിൻസിപ്പലായും സേവനമനുഷ്ഠിച്ചിട്ടുണ്ട്.

പി. ശങ്കരൻ നമ്പ്യാർ
ജനനം	(1892-06-10)ജൂൺ 10, 1892
മരണം	മാർച്ച് 2, 1954(1954-03-02) (പ്രായം 61)
ദേശീയത	ഭാരതീയൻ
തൊഴിൽ	അധ്യാപകൻ, കവി, വിമർശകൻ, പ്രസംഗകൻ
അറിയപ്പെടുന്നത്	ഭാഷാചരിത്ര സംഗ്രഹം
ജീവിതപങ്കാളി(കൾ)	മാധവിയമ്മ
മാതാപിതാക്ക(ൾ)	പരമേശ്വരൻ നമ്പ്യാർ, പാർവതി ബ്രാഹ്മണിയമ്മ

ജീവിത രേഖ

• 1892 ജനനം
• 1904 ഇംഗ്ലീഷ് വിദ്യാഭ്യാസം തുടങ്ങി
• 1906 പാലാഴിമഥനം ചമ്പു രചിച്ചു
• 1915 ഓണേഴ്സ് ബിരുദം നേടി
• 1916-17 'സാഹിത്യ പ്രവേശിക'
• 1922 ഭാഷാചരിത്ര സംഗ്രഹം
• 1942 'പ്രസ്ഥാനത്രയം'
• 1943 സാഹിത്യ നിഷ്കുടം
• 1949 'മകരന്ദമഞ്ജരി'
• 1951 'സുവർണ മണ്ഡലം'
• 1953 'സാഹിത്യവും സംസ്കാരവും'
• 1954 മരണം

ഭാഷാചരിത്ര സംഗ്രഹം

1922-ൽ രചിച്ച 'ഭാഷാചരിത്ര സംഗ്രഹം' മലയാളഭാഷയുടെ തുടക്കം മുതൽ അന്നോളമുള്ള ഭാഷാപ്രസ്ഥാന ഭേദങ്ങളെയെല്ലാം ഉൾക്കൊള്ളിച്ചു കൊണ്ടെഴുതിയ വിപുലമായ രചനയാണ്. ആറദ്ധ്യായമുണ്ട് ഈ കൃതിക്ക്. ഇതിലെ 'മധ്യകാല മലയാളം' എന്ന ലേഖനം പ്രത്യേക പരിഗണനയർഹിക്കുന്നു. ഭാഷോൽപത്തിയെപറ്റിയുള്ള സിദ്ധാന്തങ്ങളും മലയാളവും തമിഴും തമ്മിലുള്ള ബന്ധവും അദ്ദേഹം യുക്തിഭദ്രമായി അതിൽ വിശകലന വിമർശന വിധേയമാക്കി.

കൃതികൾ

• ഭാഷാചരിത്രസംഗ്രഹം
• സാഹിത്യവും സംസ്കാരവും
• മകരന്ദമഞ്ജരി
• സാഹിത്യ നിഷ്കുടം
• സുവർണ മണ്ഡലം