നടുവിൽ ജുമുഅത്ത് പള്ളി (ജാറം)

മലപ്പുറം ജില്ലയിലെ തിരൂരങ്ങാടി നഗരസഭയിൽ സ്ഥിതി ചെയ്യുന്ന മുസ്ലിംപള്ളിയാണ് നടുവിൽ ജുമുഅത്ത് പള്ളി. ഏകദേശം 500 വർഷത്തെ പഴക്കമുള്ള ഈ പള്ളിക്ക് നിർമിച്ചത് അറക്കൽ കുടുംബമാണ്. സ്രാമ്പി ആയിരുന്ന കൊച്ചു പള്ളി പിന്നീട് ജുമുഅത്ത് പള്ളിയായി വികസിപ്പിച്ചു. ഈ പള്ളി ദർസിൽ മുസ്ലിം ജ്ഞാനികളായ ശൈഖ് സയ്യിദ് അഹ്മദ് സൈനി ദഹ് ലാൻ , ശൈഖ് യൂസുഫുന്നബ്ഹാനി, ശൈഖ് അബ്ദുൽ ഹമീദ് ശർവാനി, മുഫ്തി മുഹമ്മദ് ഹസ്ബുല്ലാ എന്നിവരുടെ ശിഷ്യന്മാർ അധ്യാപനം നടത്തിയിട്ടുണ്ട്. ആലി മുസ്‌ലിയാർ, നെല്ലിക്കുത്ത് മുഹമ്മദ് മുസ്‌ലിയാർ, ചെറിയ മുണ്ടംകുഞ്ഞിപ്പോക്കർ മുസ്‌ലിയാർ തുടങ്ങിയവർ ഈ പള്ളി ദർസിലെ മറ്റ് അധ്യാപകരാണ്.

ജാറം

ഏറനാട്ടിലെ സൂഫി സന്യാസി അറബി തങ്ങളുടെ മൃത കുടീരമാണ് നടുവിലത്തെ ജാറം എന്നപേരിൽ അറിയപ്പെടുന്നത്. തിരൂരങ്ങാടി നടുവിലത്തെ പള്ളിയോട് അനുബന്ധിച്ചാണ് ഈ ജാറം സ്ഥിതിചെയ്യുന്നത്.

യമനിലെ ഹള്റൽ മൗത്തിൽ നിന്നുമാണ് അറബി തങ്ങൾ എന്ന സൂഫി മലബാറിലേക്ക് വന്നെത്തുന്നത്. മത പ്രബോധനാർത്ഥം ഉൾ നാടുകളിലേക്ക് ഇദ്ദേഹം സഞ്ചരിക്കുകയും ഏറനാട് കേന്ദ്രീകരിച്ചു പ്രവർത്തനമാരംഭിക്കുകയുമുണ്ടായി. കൊളോണിയൽ വിരുദ്ധനും കുടിയാന്മാരോട് സഹാനഭൂതി കാട്ടുന്ന വ്യക്തിതവുമായിരുന്നു അദ്ദേഹം.

ബ്രിട്ടീഷ് ജന്മി വിരുദ്ധ പോരാട്ടത്തിന് മുൻപ് മാപ്പിളമാർ അനുഗ്രഹം തേടി ഇവിടം സന്ദർശിക്കുക പതിവായിരുന്നു. മമ്പുറം സയ്യിദ് അലവി, ഉമർ ഖാളി, സയ്യിദ് ഫസൽ, ആലി മുസ്‌ലിയാർ തുടങ്ങിയവർ അറബി തങ്ങളുടെ ശവകുടീരത്തിൽ സന്ദർശനം നടത്തിയിട്ടുണ്ട്. എല്ലാ വർഷവും റമ്ദാൻ പതിനെട്ടിന് അറബി തങ്ങളുടെ ഓർമ്മ പുതുക്കി ഉറൂസ് കൊണ്ടാടപ്പെടുന്നു .