ടാലിൻ, അർമേനിയ

ടാലിൻ (അർമേനിയൻ: Թալին), അർമേനിയയിലെ അരാഗറ്റ്‌സോട്ൻ പ്രവിശ്യയിലെ ഒരു പട്ടണവും നഗര മുനിസിപ്പൽ സമൂഹവുമാണ്. 2011 ലെ സെൻസസ് പ്രകാരം, ടാലിൻ പട്ടണത്തിലെ ജനസംഖ്യ 5,310 ആയിരുന്നു. 2016-ലെ ഔദ്യോഗിക കണക്കുകൾ അനുസരിച്ച് ടാലിനിൽ നിലവിൽ 3,800 ജനസംഖ്യയുണ്ട്. ഏഴാം നൂറ്റാണ്ടിലെ കത്തീഡ്രൽ ഓഫ് ടാലിൻ സ്ഥിതിചെയ്യുന്നതിൻറെപേരിൽ ഈ സമൂഹം ശ്രദ്ധേയമാണ്.

Talin Թալին
Talin
Talin Թալին
Coordinates: 40°22′58.65″N 43°52′25.185″E
Country	അർമേനിയ
Marz	Aragatsotn
First mentioned	2nd century
വിസ്തീർണ്ണം
• ആകെ	7 ച.കി.മീ.(3 ച മൈ)
ഉയരം	1,585 മീ(5,200 അടി)
ജനസംഖ്യ  (2011 census)
• ആകെ	5,310
• ജനസാന്ദ്രത	760/ച.കി.മീ.(2,000/ച മൈ)
സമയമേഖല	GMT+4
വെബ്സൈറ്റ്	Official web
Sources: Population

ചരിത്രം

പുരാതന, മധ്യകാല ചരിത്രങ്ങൾ

ഏഴാം നൂറ്റാണ്ടിലെ കത്തീഡ്രൽ ഓഫ് ടാലിൻ.

ആധുനിക അർമേനിയയിലെ ഏറ്റവും പഴക്കംചെന്ന വാസസ്ഥലങ്ങളിലൊന്നായ ടാലിനിലെ പുരാതന അസ്തിവാരങ്ങൾ ബി.സി. രണ്ടാം സഹസ്രാബ്ദത്തോളം പഴക്കമുള്ളതാണ്. രണ്ടാം നൂറ്റാണ്ടിൽ ടോളമിയാണ് ടാലിൻ പട്ടണത്തെക്കുറിച്ചുള്ള ആദ്യ പരാമർശം നടത്തിയത്. ടാലിൻ എന്ന അർമേനിയൻ പേരിന്റെ ഹെല്ലനൈസ്ഡ് പതിപ്പെന്ന നിലയിൽ ടോളമി ഈ അധിവാസകേന്ദ്രത്തെ ടാലിന എന്ന് വിശേഷിപ്പിച്ചു.

ഒന്നുകിൽ കംസാരകൻ അർമേനിയൻ കുലീന കുടുംബത്തിന്റെ ഭരണത്തിൻ കീഴിലുള്ള ഒരു വലിയ ഗ്രാമം അല്ലെങ്കിൽ ഗ്രേറ്റർ അർമേനിയയുടെ 15-ാമത്തെ പ്രവിശ്യയായിരുന്ന അയ്രാറാത്തിലെ അരഗത്സോട്ൻ കന്റോണിനുള്ളിലെ ഒരു പട്ടണം എന്ന നിലയിൽ 7-ാം നൂറ്റാണ്ടിനും 10-ാം നൂറ്റാണ്ടിനും ഇടയിൽ ടാലിൻ നിരവധി ചരിത്രകാരന്മാരാൽ നിരന്തര പരാമർശം നടത്തപ്പെട്ടിട്ടുണ്ട്. 774-ൽ, ടാലിൻ പിടിച്ചടക്കപ്പെടുകയും അതിന്റെ ജനസംഖ്യ അറബ് മുസ്ലീങ്ങളാൽ ഭരിക്കപ്പെടുകയും ചെയ്തു. എന്നിരുന്നാലും, ഒൻപതാം നൂറ്റാണ്ടിന്റെ അവസാനത്തോടെ അർമേനിയയിലെ ബഗ്രാറ്റിഡ് രാജ്യം സ്ഥാപിതമായതോടെ നഗരം പുനരുജ്ജീവിപ്പിക്കപ്പെട്ടു.

ഏഴാം നൂറ്റാണ്ടിന്റെ അവസാനത്തിൽ നേർസെ കംസാരകൻ രാജകുമാരനാണ് ടാലിൻ കത്തീഡ്രലിലെ മതസമുച്ചയം സ്ഥാപിച്ചത്. അതേ കാലഘട്ടത്തിൽ, പട്ടണത്തിന്റെ തെക്ക് ഭാഗത്തായി കംസാരകൻ രാജകുമാരന്മാർ ദഷ്ടഡെം കോട്ടയും നിർമ്മിച്ചു.

ഭൂമിശാസ്ത്രം

സമുദ്രനിരപ്പിൽ നിന്ന് 1,585 മീറ്റർ ഉയരത്തിൽ, ഷിരാക്ക് സമതലത്തിൽ, അരാഗാറ്റ്സ് പർവതത്തിന്റെ പടിഞ്ഞാറൻ താഴ്വാരത്ത്, പട്ടണത്തിൽനിന്ന് ഏകദേശം 6 കിലോമീറ്റർ പടിഞ്ഞാറ് ഭാഗത്തായി സ്ഥിതി ചെയ്യുന്ന അർട്ടെനി അഗ്നിപർവ്വതത്തിനു സമീപമാണ് ടാലിൻ സ്ഥിതി ചെയ്യുന്നത്. തലസ്ഥാനമായ യെറിവാൻ ടാലിനിൽ നിന്ന് റോഡ്മാർഗ്ഗം 68 കിലോമീറ്റർ ദൂരത്തിൽ തെക്കുകിഴക്കൻ ദിശയിലായി നിലകൊള്ളുന്നു. പട്ടണം വരണ്ട സ്റ്റെപ്പികളാൽ ചുറ്റപ്പെട്ടിരിക്കുന്നു.

ചൂടുള്ളതും ഊഷ്‌മളവുമായ വേനൽ, അത്യധികം തണുപ്പുള്ളതും മഞ്ഞുവീഴ്ചയുള്ളതുമായ ശീതകാലം എന്നീ സവിശേഷതകളടങ്ങിയ ഈർപ്പമുള്ള ഭൂഖണ്ഡാന്തര കാലാവസ്ഥയാണ് ടാലിനിൽ അനുഭവപ്പെടാറുള്ളത്. ഇവിടുത്തെ ശരാശരി വാർഷിക മഴ 450 മില്ലിമീറ്ററാണ്.

ജനസംഖ്യ

പ്രധാനമായും അർമേനിയൻ വംശജരായ ടാലിൻ ജനതയുടെ പൂർവ്വികർ 1829-30 ൽ ആധുനിക തുർക്കിയിലെ കാർസ്, ഡോഗുബെയാസിറ്റ്, എലെസ്കിർട്ട് എന്നീ നഗരങ്ങളിൽ നിന്ന് കുടിയേറിയവരാണ്. പത്തൊൻപതാം നൂറ്റാണ്ടിലെ സർപ്പ് ഗെവോർക്കിന്റെ (സെന്റ് ജോർജ്ജ്) പള്ളിയാണ് നഗരത്തിലെ പ്രധാന പള്ളി. ടാലിനിലെ പള്ളി അരഗത്സോട്ട് രൂപതയുടെ അധികാരപരിധിയിലാണ്. ഒരു ചെറിയ യസീദി സമൂഹത്തിന്റെ ആവാസകേന്ദ്രം കൂടിയാണ് ഈ പട്ടണം.

സംസ്കാരം

അർമേനിയൻ ചരിത്രത്തിലെ ഏറ്റവും പഴയ നാഗരികതയുടെ കേന്ദ്രങ്ങളിലൊന്നായ ടാലിൻ പ്രദേശം ചരിത്ര സ്മാരകങ്ങളാൽ സമ്പന്നമാണ്. കംസാരകൻ രാജകുമാരന്മാർ നിർമ്മിച്ച ഏഴാം നൂറ്റാണ്ടിലെ ടാലിൻ കത്തീഡ്രൽ അർമേനിയൻ രാജ്യത്തെ ആദ്യകാല ക്രിസ്ത്യൻ കാലഘട്ടത്തിലെ അർമേനിയൻ ദേവാലയ വാസ്തുവിദ്യയുടെ ഒരു ലക്ഷണമൊത്ത ഉദാഹരണമാണ്. ടാലിനിലെ മറ്റൊരു ചരിത്രസ്മാരകം പട്ടണത്തിന്റെ തെക്കൻ പരിസരത്ത് സ്ഥിതി ചെയ്യുന്ന പതിമൂന്നാം നൂറ്റാണ്ടിലെ വഴിയമ്പലമാണ്.

സോവിയറ്റ് കാലഘട്ടത്തിൽ, ഈ പട്ടണം ടാലിൻ റയോണിന്റെ കേന്ദ്രമായിരുന്നതിനാൽ, പട്ടണത്തിൽ നിരവധി സാംസ്കാരിക സ്ഥാപനങ്ങൾ തുറന്നു. ഇക്കാലത്ത്, ടാലിനിൽ സംസ്കാരിക ഭവനം, പബ്ലിക് ലൈബ്രറി, ഒരു സംഗീത വിദ്യാലയം, ഒരു ജിയോളജിക്കൽ മ്യൂസിയം എന്നിവയും സ്ഥിതിചെയ്യുന്നു.