കൊവാസ്ജി ജഹാംഗീർ ഹാൾ
ദക്ഷിണ മുംബൈയിലെ കൊളാബയിൽ സ്ഥിതി ചെയ്യുന്ന ആധുനിക കലയുടെ ഒരു സംഗ്രഹാലയമാണ് കൊവാസ്ജി ജഹാംഗീർ ഹാൾ. നാഷണൽ ഗാലറി ഓഫ് മോഡേൺ ആർട്ട് ഇവിടെ പ്രവർത്തിക്കുന്നു.
ചരിത്രം തിരുത്തുക
ജോർജ് വിറ്ററ്റ് എന്ന ആർക്കിടെക്റ്റ് പണികഴിപ്പിച്ച കൊവാസ്ജി ജഹാംഗീർ ഹാൾ, ഇൻസ്റ്റിറ്റ്യൂട്ട് ഓഫ് സയൻസിന്റെ ഭാഗമായിരുന്നു[1] 1911-ൽ ആരംഭിച്ച നിർമ്മാണം പൂർത്തീകരിച്ചത് 1920-ലാണ്[2]. ഈ സ്ഥാപനത്തിനായി 400,000 രൂപ സംഭാവന നൽകിയ സർ കൊവാസ്ജി ജഹാംഗീറിന്റെ പേരിലാണ് ഈ കെട്ടിടം അറിയപ്പെടുന്നത്. വിവിധ സാംസ്കാരികപരിപാടികളുടെ വേദിയായിരുന്ന ഈ ഹാൾ 1984-ൽ മഹാരാഷ്ട്ര സർക്കാർ കേന്ദ്രസർക്കാരിന് 30 വർഷ്ഷത്തെ ലീസിന് നൽകി. 1996 ൽ ഇത് ആധുനിക കലയുടെ മ്യൂസിയമായി മാറി. 33,000,000 രൂപ ചിലവിൽ 20,000 ചതുരശ്ര അടി പ്രദർശന മേഖല രൂപവത്കരിച്ചു.
ഇന്ന് ഈ മ്യൂസിയത്തിന്റെ ഭരണച്ചുമതല നാഷണൽ ഗാലറി ഓഫ് മോഡേൺ ആർട്ട് (എൻ.ജി.എം.എ) എന്ന സ്ഥാപനത്തിനാണ്.
നവീകരണം തിരുത്തുക
ഒരു സംരക്ഷിത പൈതൃകഘടന ആയതിനാൽ കെട്ടിടത്തിന്റെ ബാഹ്യ രൂപമോ, ഘടനാപരമായ മാറ്റങ്ങളോ ഇതിൽ വരുത്താനാകില്ല. കരിങ്കൽ തറയുള്ള യഥാർത്ഥ കെട്ടിടത്തിനുള്ളിൽ രണ്ട് അടി അകലം വിട്ട് പുതിയ പുതിയ മാർബിൾ തറ സ്ഥാപിച്ച് നിർമ്മാണം നടത്തിയാണ് റോമി ഖോസ്ല എന്ന ആർക്കിടെക്റ്റ് ഈ കെട്ടിടം നവീകരിച്ചത്. ഉൾഭാഗത്തെ ഘടനയിൽ പൂർണ്ണമായും മാറ്റം വരുത്തി നാല് സ്പ്ലിറ്റ്-ലെവൽ ഗ്യാലറികൾ, സെമിനാർ ഹാൾ, ദൃശ്യ-ശ്രാവ്യ പ്രദർശനങ്ങൾക്കുള്ള സ്ഥലം, ഒരു പുസ്തക പ്രദർശനശാല ഒരു ലഘുഭക്ഷണശാല എന്നിവയ്ക്കുള്ള സൗകര്യമൊരുക്കി. മഹേന്ദ്ര രാജ് എന്ന എഞ്ചിനീയർ ഇതിൽ മുഖ്യപങ്ക് വഹിച്ചു[2].
മ്യൂസിയത്തിലെ ഒരു ഭാഗത്ത് എൻ.ജി.എം.എ. യുടെ ശാശ്വത ശേഖരത്തിലുള്ള സൃഷ്ടികൾ പ്രദർശിപ്പിച്ചിരുന്നു. എന്നാൽ ഇന്ന് താൽക്കാലിക പ്രദർശനങ്ങൾ മാത്രമാണ് ഇവിടെ സംഘടിപ്പിക്കപ്പെടുന്നത്. സന്ദർശകരുടെ ബാഗുകൾ സൂക്ഷിക്കുവാനായി ഒരു ലോക്കർ സംവിധാനം ഇവിടെ ഒരുക്കിയിട്ടുണ്ട്.