എം. കൃഷ്ണൻകുട്ടി മേനോൻ

മലയാളത്തിലെ പ്രശസ്ത നോവലിസ്റ്റും പത്രപ്രവർത്തകനുമായിരുന്നു എം.കെ. മേനോൻ എന്ന എം.കൃഷ്ണൻകുട്ടി മേനോൻ (ജൂൺ 23, 1928 - മേയ് 15, 1993) വിലാസിനി എന്ന തൂലികാനാമത്തിൽ അറിയപ്പെട്ടിരുന്ന കൃഷ്ണൻ കുട്ടി മേനോൻ വടക്കാഞ്ചേരിക്ക് അടുത്തുള്ള കരുമത്രയിലാണ് ജനിച്ചത്. 1947-ൽ മദിരാശി സർവ്വകലാശാലയിൽ നിന്നും ബിരുദം നേടിയ അദ്ദേഹം രണ്ടുവർഷം കേരളത്തിൽ അദ്ധ്യാപകനായും നാലുവർഷം ബോംബെയിൽ ഗുമസ്തനായും ജോലിനോക്കിയശേഷം 1953-ൽ സിംഗപ്പൂരിലേക്ക് പോയി. തുടർന്നുള്ള 25 വർഷക്കാലം ഏ. എഫ്. പി എന്ന അന്താരാഷ്ട്ര വാർത്താ ഏജൻസിയുടെ കീഴിൽ ജോലിനോക്കിയ അദ്ദേഹം അതിന്റെ തെക്കുകിഴക്കനേഷ്യൻ കേന്ദ്രത്തിന്റെ ഡയറക്ടറായാണ്‌ വിരമിച്ചത്. 1977-ൽ കേരളത്തിലേക്ക് തിരിച്ചുപോന്ന ഇദ്ദേഹം 1993- അന്തരിക്കുന്നത് വരെ മലയാള സാഹിത്യത്തിലെ സജീവ സാനിധ്യമായിരുന്നു. നോവലുകളും യാത്രാവിവരണങ്ങളുമുൾപ്പെടെ നിരവധി പുസ്തകങ്ങൾ രചിച്ച അദ്ദേഹത്തിന്റെ അവകാശികൾ എന്ന കൃതി നോവൽ വിഭാഗത്തിലെ ഇന്ത്യയിലെ തന്നെ ഏറ്റവും വലിയ കൃതിയായാണ് കരുതപ്പെടുന്നത്.

മൂർക്കനാട്ടു കൃഷ്ണൻകുട്ടി മേനോൻ
ജനനം	1928 ജൂൺ 23
മരണം	മേയ് 15, 1993(1993-05-15) (പ്രായം 64)
ദേശീയത	ഇന്ത്യൻ
മറ്റ് പേരുകൾ	വിലാസിനി
തൊഴിൽ	നോവലിസ്റ്റ്, പത്രപ്രവർത്തകൻ
അറിയപ്പെടുന്നത്	അവകാശികൾ എന്ന നോവലിന്റെ കർത്താവ്

കൃതികൾ

• നിറമുള്ള നിഴലുകൾ (1965)
• ഇണങ്ങാത്ത കണ്ണികൾ (1968)
• ഊഞ്ഞാൽ (1969)
• ചുണ്ടെലി (1971)
• അവകാശികൾ(നാലു വാല്യം) (1980)
• യാത്രാമുഖം (1987)

. തുടക്കം (1977 )

അവാർഡുകൾ

• 1981 കേരള സാഹിത്യ അക്കാദമി അവാർഡ്(അവകാശികൾ)
• 1983 വയലാർ രാമവർമ്മ അവാർഡ് (അവകാശികൾ)