സ്വെറ്റ്ലാന സവിത്സ്കയ
ഒരു സോവിയറ്റ് വൈമാനികയും ബഹിരാകാശസഞ്ചാരിയുമാണ് സ്വെറ്റ്ലാന സവിത്സ്കയ(Russian: Светла́на Евге́ньевна Сави́цкая; ജനനം ഓഗസ്റ്റ് 8, 1948) . 1982-ൽ ബഹിരാകാശത്തെത്തിയ രണ്ടാമത്തെ വനിത എന്ന ബഹുമതിയും, 1984-ൽ രണ്ട് തവണ ബഹിരാകാശത്തെത്തിയ ആദ്യ വനിത, ബഹിരാകാശത്ത് നടന്ന ആദ്യവനിത എന്ന ബഹുമതികളും കരസ്ഥമാക്കി[1][2].
| സ്വെറ്റ്ലാന സവിത്സ്കയ | |
|---|---|
.jpg) | |
| ബഹിരാകാശസഞ്ചാരി | |
| ദേശീയത | സോവിയറ്റ് / റഷ്യൻ |
| ജനനം | ഓഗസ്റ്റ് 8, 1948 മോസ്കോ, സോവിയറ്റ് യൂണിയൻ |
മറ്റു പേരുകൾ | സ്വെറ്റ്ലാന സവിത്സ്കയ |
മറ്റു തൊഴിൽ | ഫ്ലൈറ്റ് എഞ്ചിനീയർ |
ബഹിരാകാശത്ത് ചെലവഴിച്ച സമയം | 19 ദിവസം 17 മണിക്കൂർ 06 മിനിറ്റ് |
| തിരഞ്ഞെടുക്കപ്പെട്ടത് | 1980 (Female Group 2) |
മൊത്തം EVAകൾ | 1 |
മൊത്തം EVA സമയം | 3 മണിക്കൂർ 35 മിനിറ്റ് |
| ദൗത്യങ്ങൾ | സല്യുട്ട് 7-EP2 (സൊയൂസ് T-7 up, സൊയൂസ് T-5 down), സല്യുട്ട് 7-EP4 (സൊയൂസ് T-12) |
ദൗത്യമുദ്ര |  |
| അവാർഡുകൾ |  |
ആദ്യകാല ജീവിതം തിരുത്തുക
രണ്ടാം ലോകമഹായുദ്ധത്തിൽ മികവ് പ്രകടിപ്പിച്ച കമാൻഡർ യെവ്‌ഗിനി സവിത്‌സ്കിയുടെ മകളായി 1948 ഓഗസ്റ്റ് 8-ന് മോസ്കോയിൽ ജനിച്ചു. നന്നേ ചെറുപ്പത്തിൽ തന്നെ വിമാനം പറത്തലിൽ താല്പര്യം പ്രകടിപ്പിച്ച സ്വെറ്റ്ലാന 22 വയസ്സ് തികയുന്നതിനു മുൻപേ തന്നെ 400-ൽ പരം പാരാജമ്പിങ്ങുകൾ നടത്തിയിരുന്നു. 1970-ൽ ലോക എയ്റോബാറ്റിക് ചാമ്പ്യൻഷിപ്പിൽ ഒന്നാംസ്ഥാനം കരസ്ഥമാക്കി. 1972-ൽ മോസ്കോ ഏവിയേഷൻ ഇൻസ്റ്റിറ്റ്യൂട്ടിൽ നിന്നും എഞ്ചിനീയറിംഗിൽ ബിരുദമെടുത്ത ശേഷം ഒരു ടെസ്റ്റ് പൈലറ്റ് ആയി സ്ഥാനമേറ്റു. 20-ലേറെ തരം വിമാനങ്ങൾ പറത്തുന്നതിന് യോഗ്യത നേടിയ സ്വെറ്റ്ലാന വേഗതയിലും ഉയരത്തിലും അനവധി ലോകറെക്കോർഡുകൾ വനിതാവിഭാഗത്തിൽ സ്ഥാപിച്ചു[3].
ബഹിരാകാശ രംഗത്ത് തിരുത്തുക
1980-ൽ സ്വെറ്റ്ലാന സോവിയറ്റ് ബഹിരാകാശ പദ്ധതിയിലേക്ക് തിരഞ്ഞെടുക്കപ്പെട്ടു. സൊയൂസ്, സല്യുട്ട് ബഹിരാകാശ വാഹനങ്ങളിലായിരുന്നു പരിശീലനം ആരംഭിച്ചത്. 1982 ഓഗസ്റ്റ് 19-ന് സൊയൂസ് ടി-7 എന്ന ബഹിരാകാശ വാഹനത്തിൽ സല്യുട്ട് 7 ബഹിരാകാശ നിലയത്തിലേക്ക് തിരിച്ച സ്വെറ്റ്ലാന ബഹിരാകാശത്തെത്തിയ രണ്ടാമത്തെ വനിതയായി. വാലെന്റീന തെരഷ്ക്കോവയുടെ ബഹിരാകാശയാത്ര ഇതിനും 19 വർഷങ്ങൾക്ക് മുൻപായിരുന്നു.
1984-ൽ വീണ്ടും സല്യുട്ട് 7-ൽ എത്തിയ സ്വെറ്റ്ലാന രണ്ട് തവണ ബഹിരാകാശത്തെത്തിയ ആദ്യത്തെ വനിതയായി. ഇതേ ഉദ്യമത്തിൽ, 1984 ജൂലൈ 25-ന് സ്വെറ്റ്ലാന സഹയാത്രികനായ വ്ലാദിമിർ ഡ്ഴാനിബെക്കോവിനോടൊത്ത് ബഹിരാകാശനിലയത്തിന് പുറത്തായി വെൽഡിംഗ് നടത്തുകയുണ്ടായി. 3 മണിക്കൂർ 35 മിനിറ്റ് നീണ്ട ഈ ഉദ്യമത്തോടെ ബഹിരാകാശത്ത് നടന്ന ആദ്യവനിത എന്ന ഖ്യാതി നേടി[1][2]. പിന്നീട് അന്താരാഷ്ട്ര വനിതാദിനത്തോടനുബന്ധിച്ച് സല്യുട്ട് 7-ലേയ്ക്ക് സ്ത്രീകൾ മാത്രമടങ്ങിയ ഒരു ദൗത്യത്തിന് നേതൃത്വം കൊടുക്കാൻ നിയുക്തയായെങ്കിലും ആ ദൗത്യം റദ്ദാക്കപ്പെട്ടു.
പിൽക്കാല ജീവിതം തിരുത്തുക
ഓർഡർ ഓഫ് ലെനിൻ ,ഹീറോ ഓഫ് ദ സോവിയറ്റ് യൂണിയൻ എന്നീ ബഹുമതികൾക്ക് രണ്ട് തവണ വീതം അർഹയായി. സ്വെറ്റ്ലാനയുടെ ബഹുമാനാർഥം 4118 സ്വെറ്റ, സവിത്സ്കയ 4303 എന്നീ ഛിന്നഗ്രഹങ്ങൾ നാമകരണം ചെയ്യപ്പെട്ടു. ഭർത്താവ് വിക്റ്റർ ഹാറ്റ്കോവ്സ്കി . മകൻ കോൺസ്റ്റാന്റിൻ 1986 നവംബർ 7-ന് ജനിച്ചു[4].
ബഹുമതികൾ തിരുത്തുക
- ഹീറോ ഓഫ് സോവിയറ്റ് യൂണിയൻ, രണ്ട് തവണ (1982, 1984)
- ഓർഡർ ഓഫ് ലെനിൻ, രണ്ട് തവണ (1982, 1984)
- ഓർഡർ ഓഫ് ദി ബാഡ്ജ് ഓഫ് ഓണർ (1976)
- ബഹിരാകാശപര്യവേക്ഷണത്തിലെ മികവിനുള്ള മെഡൽ (12 April 2011)
- പൈലറ്റ് കോസ്മോനട്ട് ഓഫ് യു.എസ്.എസ്.ആർ
- മാസ്റ്റർ ഓഫ് സ്പോർട്ട്സ്
- എഫ്.എ.ഐ സ്വർണ്ണമെഡൽ
- 16 സ്വർണ്ണമെഡൽ, സ്പോർട്ട്സ് ഓഫ് യു.എസ്.എസ്.ആർ
- ബഹിരാകാശദൗത്യത്തിലെ വനിതാലോകറെക്കോർഡിന് വിശിഷ്ട മെഡൽ
2014-ലെ സോചി വിന്റർ ഒളിമ്പിക്സിൽ റഷ്യയുടെ പതാകയുയർത്താൻ തിരഞ്ഞെടുക്കപ്പെട്ട അഞ്ച് കോസ്മോനട്ടുകളിൽ ഒരാളായിരുന്നു സവിത്സ്കയ[5].
പുറത്തേക്കുള്ള കണ്ണികൾ തിരുത്തുക
സ്വെറ്റ്ലാന സവിത്സ്കയ എന്ന വിഷയവുമായി ബന്ധമുള്ള കൂടുതൽ പ്രമാണങ്ങൾ (വിക്കിമീഡിയ കോമൺസിൽ)- അഭിമുഖം Archived 2012-09-08 at the Wayback Machine.
- അഭിമുഖം: വോയ്സ് ഓഫ് റഷ്യ റേഡിയോ വെബ്‌സൈറ്റ് Archived 2012-04-01 at the Wayback Machine.
അവലംബം തിരുത്തുക
- ↑ 1.0 1.1 "Biographies of USSR / Russian Cosmonauts". Space Facts. 9 August 2012. Retrieved 18 February 2014.
- ↑ 2.0 2.1 "Space welding anniversary!". Orbiter-Forum. Jelsoft Enterprises Ltd. 16 July 2009. Retrieved 18 February 2014.
- ↑ എൻസൈക്ലോപീഡിയ ബ്രിട്ടാനിക്ക
- ↑ ബ്രൈറ്റ് ഹബ്ബ്
- ↑ "The XXII Olympic Winter Games in Sochi in 2014 has opened with a grand show". www.Sochi2014.com. 8 February 2014. Archived from the original on 2014-07-06. Retrieved 11 February 2014.