സെന്റ് ജോൺ ദ ബാപ്റ്റിസ്റ്റ് ചർച്ച്, മുംബൈ
മുംബൈയിലെ അന്ധേരി എന്ന സ്ഥലത്ത് സ്ഥിതി ചെയ്യുന്ന പോർച്ചുഗീസുകാർ നിർമ്മിച്ച ഒരു പുരാതന ക്രിസ്ത്യൻ പള്ളിയാണ് സെന്റ് ജോൺ ദ് ബാപ്റ്റിസ്റ്റ് ചർച്ച്.
ചരിത്രം
തിരുത്തുക1579 ൽ പോർച്ചുഗീസുകാരനായ ജെസ്യൂട്ട് പാതിരി മാനുവൽ ഗോമസ് നിർമിച്ചതാണ് ഈ പള്ളി. അതേ വർഷം സ്നാപകയോഹന്നാന്റെ പെരുന്നാളിന് ഇത് പൊതുജനങ്ങൾക്ക് തുറന്നു കൊടുത്തു. ഇതിനോടനുബന്ധിച്ച് ഒരു ശ്മശാനവും ഉണ്ടായിരുന്നു. 1588-ൽ മരോൾ ഗ്രാമവാസികൾ കൂട്ടമായി ക്രിസ്തുമതത്തിലേക്ക് പരിവർത്തനം ചെയ്യപ്പെട്ടു. 1840 ൽ ഗ്രാമത്തിൽ ഒരു പകർച്ചവ്യാധി പടർന്നതിനെത്തുടർന്ന് ഈ പള്ളി ഉപേക്ഷിക്കപ്പെട്ടു. പിന്നീട് കൊണ്ടിവിടയിലെ വികാരി ജോസ് ലോറൻസ്കോ പെയ്സ് പള്ളി അടുത്തുള്ള മരോൾ ഗ്രാമത്തിലേക്ക് സ്ഥലംമാറ്റി. ഈ പള്ളിയിലെ പ്രതിമകൾ, തൂണുകൾ, അൾത്താര മുതലായവ പുതിയ സഭയിലേക്ക് മാറ്റി. 1949-ൽ ഒരു ശക്തമായ ചുഴലിക്കാറ്റിലാണ് ഈ പള്ളിയുടെ മേൽക്കൂര തകർന്നു വീണതെന്ന് പറയപ്പെടുന്നു[1]. 1973 വരെ പെരുന്നാൾ ദിവസം ഇവിടെ വിശ്വാസികൾ ഒത്തുകൂടിയിരുന്നു. എന്നാൽ ഈ പ്രദേശം സാന്താക്രൂസ് ഇലക്ട്രോണിക് എക്സ്പോർട്ട്സ് പ്രോസസ്സിംഗ് സോൺ (സീപ്സ്) എന്ന പദ്ധതിയുടെ ഭാഗമായതോടെ സുരക്ഷാകാരണങ്ങളാൽ പൊതുജനങ്ങൾക്ക് പ്രവേശനം നിഷേധിക്കപ്പെട്ടു. തുടർന്ന് 30 വർഷത്തോളം ഇവിടെ കുർബാന നടന്നിരുന്നില്ല. 2003 ൽ അന്നത്തെ മഹാരാഷ്ട്ര മുഖ്യമന്ത്രി സുശീൽ കുമാർ ഷിൻഡെ ഈ പള്ളി ബോംബെ അതിരൂപതയിലെ ഫാദർ റോഡ്നി എസ്പെറെൻസിനു കൈമാറി[2].
ഉപേക്ഷിക്കപ്പെട്ട പള്ളി തകർന്ന് ചെടികൾ മൂടുവാൻ തുടങ്ങിയിരുന്നുവെങ്കിലും അവിടെയുള്ള ക്രിസ്ത്യാനികൾ വർഷം തോറും ഈ പള്ളി സന്ദർശിക്കുന്നു. എല്ലാ വർഷവും മേയ് മാസത്തിലെ രണ്ടാമത്തെ ഞായറാഴ്ചയിൽ പരിസരത്തുള്ള മൂവായിരത്തോളം വിശ്വാസികൾ ഈ പള്ളിയിൽ ഒത്തുകൂടുന്നു[3]. വിശ്വാസികളിൽ കൂടുതലും ഈസ്റ്റ് ഇന്ത്യൻ സമുദായത്തിൽ പെട്ടവരാണ്. മരോൾ പള്ളിയിൽ നിന്നും സ്നാപകയോഹന്നാന്റെ പ്രതിമയും വഹിച്ച് വിശ്വാസികൾ ഇവിടെയെത്തുന്നു[1].
അവലംബം
തിരുത്തുക- ↑ 1.0 1.1 https://indianexpress.com/article/cities/mumbai/436-year-old-ruins-of-condita-church-springs-to-life-for-annual-mass/
- ↑ "CM gives SEEPZ church back to archdiocese". Archived from the original on 2013-07-20. Retrieved 2018-11-08.
- ↑ https://www.dnaindia.com/mumbai/report-st-john-s-opens-for-mass-1096878