വി.ആർ. സുധീഷ്

മലയാളത്തിലെ ചെറുകഥാകൃത്തും നിരൂപകനുമാണ്‌ വി.ആർ.സുധീഷ്. ചേളന്നൂർ എസ് എൻ കോളേജിൽ മലയാളം അദ്ധ്യാപകനാണ്

ജീവിതരേഖ

വടകരയിൽ ജനനം. മടപ്പള്ളി ഗവ. കോളേജിൽ നിന്ന് ചരിത്രത്തിൽ ബിരുദവും തലശ്ശേരി ഗവ.ബ്രണ്ണൻ കോളേജിൽ നിന്ന് മലയാള സാഹിത്യത്തിൽ എം.എ ബിരുദവും നേടി. മദിരാശി സർവ്വകലാശാലയിൽ നിന്ന് എം.ഫിൽ ബിരുദം നേടിയിട്ടുണ്ട്. തുടർന്ന് എസ്.എൻ.ട്രസ്റ്റിനു കീഴിലുള്ള കോളേജുകളിൽ അദ്ധ്യാപകനായി. ഇപ്പോൾ ചേളന്നൂർ എസ്.എൻ.കോളേജിൽ ജോലിയിൽ നിന്നും വിരമിച്ചു . വിവാഹിതനാണ്. ഒരു മകളുണ്ട്.

ചെറുകഥാസാഹിത്യത്തിൽ

എം.എംബഷീർ, വി.ആർ സുധീഷ്, ആഷാമേനോൻ, സാറാജോസഫ്, അംബികാസുതൻ മാങ്ങാട് എന്നിവർ കോഴിക്കോട് ലിറ്ററേച്ചർ ഫെസ്റ്റിവലിൽ പരിസ്ഥിതിയും കഥാഭാവനയും എന്ന വിഷയത്തിൽ ചർച്ചനടത്തുന്നു.

വിദ്യാർത്ഥിജീവിതകാലത്തു തന്നെ എഴുത്തിൽ സജീവമായിരുന്നു ഇദ്ദേഹം. മാതൃഭൂമി ആഴ്ചപ്പതിപ്പിന്റെ ബാലപംക്തി,ചന്ദ്രിക ആഴ്ചപ്പതിപ്പ്, ദേശാഭിമാനി വാരിക എന്നിവിടങ്ങളിലാണ് ആദ്യകാല രചനകൾ പ്രസിദ്ധീകരിക്കപ്പെട്ടത്. ഇതിനു പുറമെ ലയം എന്ന പേരിൽ ഒരു ഇൻലന്റ് മാസിക സ്വയം പ്രസിദ്ധീകരിച്ചിരുന്നു. മടപ്പള്ളി കോളേജ് വിദ്യാർത്ഥിയായിരിക്കുമ്പോൾ കാലിക്കറ്റ് സർവ്വകലാശാലാ കലോത്സവത്തിൽ ചെറുകഥാ മത്സരത്തിൽ സമ്മാനം നേടി ശ്രദ്ധേയനായി. മലയാളത്തിലെ ആധുനിക കഥയുടെ രൂപാന്തരത്തിൻറെ പ്രധാന ദശയിലാണ് വി.ആർ.സുധീഷിൻറെ ആദ്യകാലകഥകൾ ഉണ്ടാകുന്നത്. യൌവനത്തിൻറെ കണ്ണീർപ്പാടുകളും നിലവിളിയും കണ്ടെടുക്കുന്ന എഴുത്തുകാരനാണ്‌ സുധീഷ്‌. ഭാവനിർഭരമായ ഓർമ്മകളും വിചിന്തനങ്ങളും നിറയുന്ന സുധീഷിൻറെ രചനകൾ വായനക്കാരനെ അകംനീറ്റുകയും ആനന്ദിപ്പിക്കുകയും ചെയ്യുന്നു. കലങ്ങുന്ന പ്രണയസമുദ്രം നെഞ്ചേറ്റിലാളിക്കുന്ന ഒരാളുടെ സാന്നിധ്യം ഈ കഥാകാരൻറെ തട്ടകത്തിലുണ്ട്. അസ്തിത്വത്തിൻറെ പൊരുൾ സ്വാതന്ത്ര്യമെന്നതുപോലെ അനുരാഗം കൂടിയാണെന്ന ശുഭസൂചന സുധീഷ്‌ ഓർമ്മപ്പെടുത്തിക്കൊണ്ടിരിക്കുന്നു. കാഴ്ചകളെ കീറിമുറിക്കുന്ന സാമൂഹിക-രാഷ്ട്രീയ ഭൂപടങ്ങളും കഥാകാരൻ സൂചിപ്പിക്കുന്നു. കാവ്യാത്മക ഭാഷയിൽ തീർത്ത ഹരിതപത്രങ്ങളുടെ മനോഹാരിത കൊണ്ട് സമകാലികരിൽ നിന്നു വേറിട്ടുനിൽക്കുന്നവയാണ് സുധീഷിൻറെ രചനകൾ.തോപ്പിൽ രവി പുരസ്കാരം , അയനം-സി.വി.ശ്രീരാമൻ പുരസ്കാരം തുടങ്ങിയവ നേടിയിട്ടുള്ള വി.ആർ..സുധീഷിൻറെ പല കഥാസമാഹാരങ്ങളും വിവിധ സർവ്വകലാശാലകളിൽ പാഠ്യപദ്ധതിയിൽ ഉൾപ്പെടുത്തിയിട്ടുണ്ട്.

കൃതികൾ

• ക്രൂരഫലിതക്കാരൻ ദൈവം
• ദൈവത്തിന് ഒരു പൂവ്
• വംശാനന്തര തലമുറ
• ചോലമരപ്പാതകൾ
• വിമതലൈംഗികം
• ഒരു എഴുത്തുകാരി അറിയുന്നു
• വാക്കുകൾ സംഗീതമാകുന്ന കാലം വരുന്നുണ്ട്
• രാജാവിന്റെ മീനുകൾ
• തീയക്കുട്ടികൾ ഇന്നും വിചാരിക്കുന്നു
• സങ്കടമരം
• കഥപറയും കഥമാമൻ
• ക്ഷീരപഥം
• മരക്കൂട്ടങ്ങൾക്കിടയിലെ നനഞ്ഞ മണ്ണ്
• സുധീഷിൻറെ കഥകൾ
• എൻറെ പ്രണയ കഥകൾ
• തെരഞ്ഞെടുത്ത കഥകൾ
• പ്രിയപ്പെട്ട കഥകൾ
• ഭവനഭേദനം
• നോവൽ വെളിച്ചങ്ങൾ ( പഠനം)
• കഥാന്തരം ( പഠനം)
• ആത്മഗാനം ( ഓർമ )
• സമുദ്രവിപഞ്ചിക ( ലേഖനം )
• ഒറ്റക്കഥാപഠനങ്ങൾ ( പഠനം)
• എഴുതിയ കാലം ( ഓർമ )
• മലയാളത്തിൻറെ പ്രണയകഥകൾ (എഡിറ്റർ)
• മലയാളത്തിൻറെ പ്രണയകവിതകൾ (എഡിറ്റർ)
• പ്രണയപുസ്തകം (എഡിറ്റർ)
• എം ടി (എഡിറ്റർ)
• മദ്യശാല (എഡിറ്റർ)
• സംഭാഷണം (എഡിറ്റർ)
• കഥകൾ :പ്രണയത്തിന്റെ ;മരണത്തിന്റെയും (എഡിറ്റർ)
• അനുഭവം ഓർമ്മ യാത്ര
• പ്രണയചന്ദ്രകാന്തം ( ലേഖനം )

പുരസ്കാരങ്ങൾ

• ഭവനഭേദനം എന്ന ചെറുകഥയ്ക്ക് 2014-ലെ കേരള സാഹിത്യ അക്കാദമി പുരസ്കാരം

ശ്രീകൃഷ്ണൻ എന്ന കഥാസമാഹാരത്തിന് 2019 ഇടശ്ശേരി അവാർഡ് ലഭിച്ചു.