റെസിഡന്റ്സ് അസ്സോസ്സിയേഷൻ

റെസിഡന്റ്സ് അസ്സോസ്സിയേഷൻ എന്നതു് ഒരു പ്രദേശത്തെ താമസക്കാരുടെ ഒരു കൂട്ടായ്മയാണു്. ഒരു പ്രദേശത്തെ ആളുകളുടെ പൊതുവായ താത്പര്യങ്ങളുടെ സംരക്ഷണാർത്ഥമാണ് ഇവ രൂപവത്കരിക്കുന്നത് . കേരളത്തിൽ റെസിഡന്റ്സ് അസ്സോസ്സിയേഷനുകൾ കേരള സർക്കാരിന്റെ സംഘം രജിസ്ട്രാറുടെ ഓഫീസിൽ രജിസ്റ്റർ ചെയ്യേണ്ടതുണ്ട്. രജിസ്റ്റർ ചെയ്യുവാനായി സംഘടനയുടെ യോഗം ചേർന്ന് തീരുമാനമെടുത്തു്, പ്രസിഡന്റ്, സെക്രട്ടറി, ഖജാൻജി എന്നിവർ ചേർന്ന് തയ്യാറാക്കിയ ഒരപേക്ഷ, മെമ്മോറാണ്ടം ഓഫ് അസ്സോസ്സിയേഷൻ , ബൈലോ എന്നിവ സമർപ്പിച്ച് നിശ്ചിത ഫീസുമടച്ച് രജിസ്റ്റർ ചെയ്യാം.

കേരളത്തിലെ റസിഡന്റ്സ് അസ്സോസിയേഷനുകൾ

കേരളത്തിലെ സർക്കാരുകൾ നടപ്പിലാക്കുന്ന പല സാമൂഹ്യപരിപാടികളും റസിഡന്റ്സ് അസോസിയേഷനുകളുടെ പങ്കാളിത്തത്തോടെയാണ് നടപ്പിലാക്കുന്നത്. മദ്യവിരുദ്ധകേരളം പദ്ധതി, വയോജന സുരക്ഷാ പദ്ധതി ഉദാഹരണം. സന്നദ്ധ സഘടനകളെക്കൂടാതെ തങ്ങളെയും വികസന പ്രവർത്തനങ്ങളിൽ ഓദ്യോഗിക പങ്കാളികളാക്കണമെന്ന് റസിഡൻറ്‌സ്‌ അസോസിയേഷനുകൾ ആവശ്യപ്പെടാറുണ്ട്. പരിസരമലിനീകരണത്തിനെതിരേയും റസിഡന്റ്സ് അസോസിയേഷനുകൾ നടപടികളെടുക്കാറുണ്ട്.

തിരുവനന്തപുരത്തെ പാങ്ങോടുള്ള ശ്രീചിത്രനഗർ റസിഡന്റ്സ് അസോസിയേഷൻ പങ്കാളികൾക്കായി ഒരു മ്യൂച്വൽ ഫണ്ട് ആരംഭിക്കുകയുണ്ടായി.

കേരളത്തിലെറസിഡന്റ്‌സ് അസോസിയഷനുകൾ പ്രസിദ്ധീകരിക്കുന്ന ബുള്ളറ്റിനുകളിൽ ആലപ്പുഴയിലെ തത്തംപള്ളി റസിഡന്റ്‌സ് അസോസിയേഷൻ (ടി.ആർ.എ) പ്രസിദ്ധീകരിക്കുന്ന ടി.ആർ.എ ബുള്ളറ്റിൻ ശ്രദ്ധേയമാണ്. ബുള്ളറ്റിൻ issuu.com/trabulletin എന്ന സൈറ്റിൽ വായിക്കാം.