മാഹി മരാത്തിബ്

മുഗളർ ഉപയോഗിച്ചിരുന്നതും ഉന്നതനിലയിലുള്ള പ്രഭുക്കൻമാർക്ക് സമ്മാനിച്ചിരുന്നതുമായ ഒരു അധികാരച്ചിഹ്നമാണ് മാഹി മരാത്തിബ് അഥവാ മൽസ്യപദവി.

പേർഷ്യയിലെ സസാനിയൻ വംശത്തിൽ 591-ാമാണ്ടുമുതൽ 628 വരെ ഭരണത്തിലിരുന്ന രാജാവായ ഖുസ്രു പർവീസ് ആണ് ഈ പദവി ഏർപ്പെടുത്തിയത്. പിന്നീടിത് മുഗളരിലേക്ക് കൈമാറപ്പെട്ടു. മാഹി മാരാത്തിബ് വളരെ ഉയർന്നനിലയിലുള്ള പദവിയായിരുന്നു. 6000-ത്തിലധികം സാറ്റ് സംഖ്യയുള്ള പ്രഭുക്കൻമാർക്കും മുഗളർക്ക് വളരെ വേണ്ടപ്പെട്ട സഖ്യരാജാക്കൻമാർക്കും മാത്രമേ ഇത് നൽകിയിരുന്നുള്ളൂ.

വായ് തുറന്നുപിടിച്ചിരിക്കുന്ന മൽസ്യത്തിന്റെ മൂൻഭാഗത്തിന്റെ ആകൃതിയിലുള്ള ഒരു ലോഹശിൽപ്പമാണിത്. ഘോഷയാത്രകളിൽ ഒരു ദണ്ഡിനുമുകളിൽ ഘടിപ്പിച്ചാണ് ഇത് പ്രദർശിപ്പിക്കുന്നത്. ലോഹശിൽപ്പത്തിന്റെ പിൻവശത്ത് തുണികൊണ്ടുള്ള ഒരു ഉറ കൂട്ടിച്ചേർക്കുകയും, മൽസ്യത്തിന്റെ വായിലൂടെ കാറ്റ് കടന്ന് ഉറയിൽ നിറഞ്ഞ് മൽസ്യത്തിന്റെ പൂർണ്ണമായ ആകൃതി കൈവരുകയുമാണ് ചെയ്തിരുന്നത്.

പുറത്തേക്കുള്ള കണ്ണികൾ

• മുഗൾ ഫിഷ് സ്റ്റാൻഡേഡ്, ഏഷ്യൻ ആർട്ട്.കോമിൽ നിന്നും.
• ഔറംഗസേബിന്റെ ഘോഷയാത്ര - ഭവാനിദാസിന്റെ ചിത്രം - ചിത്രത്തിൽ ആനപ്പുറത്ത് മാഹി മരാത്തിബ് പ്രദർശിപ്പിച്ച് കൊണ്ടുപോകുന്നത് കാണാം.