മാമണ്ണൂർ മഠം

മടവൂർ ഗ്രാമത്തിന്റെ ചരിത്രം തുടങ്ങുന്നത് ഈ മഠത്തിൽ നിന്നാണ്. എന്നാൽ ഇത്രയും ചരിത്ര പ്രാധാന്യം ഉള്ള സ്ഥലം തകർച്ചയുടെ വക്കിൽ ആണ്. ഈ മഠത്തിന്റെ ഭൂരിഭാഗവും തകർന്ന അവസ്ഥയിൽ ആണ്. ഇനി കുറച്ചു നാൾ കൂടിയേ ചിലപ്പോൾ ഈ ശേഷിക്കുന്ന ഭാഗം നിലനിലിക്കുകയുള്ളു.

നൂറ്റാണ്ടുകൾക്ക് മുൻപ് മാണ്ഡവ്യൻ എന്നൊരു മുനി പൂജാദി കർമങ്ങൾക്ക് വേണ്ടി നിരവധി ബ്രാഹ്മണരെ ഇവിടെ കുടിയിരുത്തുകയും അവരുടെ താമസത്തിനു നാടിന്റെ ഒട്ടേറെ ഭാഗങ്ങളിൽ മഠം നിർമിക്കുകയും ചെയ്യ്തു ( മടവൂർ എന്ന പേര് വരാൻ ഇതാണ് കാരണം ) മംഗലാപുരത്തു നിന്നാണ് ബ്രാഹ്മണർ ഇവിടേക്ക് വന്നത് പറയപ്പെടുന്നു.

പരശുരാമകേരളത്തിലെ 32 നമ്പൂതിരിഗ്രാമങ്ങളിൽ തെക്കേ അറ്റത്തുള്ള ഗ്രാമമായ നീർമണ്ണഗ്രാമത്തിലെ അത്രി ഗോത്രത്തിൽ പെട്ട ബ്രാഹ്മണകുടുംബമാണ് മാമണ്ണൂർ മഠം. യജുർവ്വേദികളാണ്. (ഐതിഹ്യപ്രകാരം വിശ്വാമിത്ര, വസിഷ്ഠ, അംഗിരസ്സ, അത്രി എന്നീ 4 ഗോത്രക്കാരെയാണ് പരശുരാമൻ കേരളത്തിലേക്ക് കൊണ്ടുവന്നത് എന്ന് പറയപ്പെടുന്നു. ബാക്കി ഗോത്രങ്ങൾ പല കാലങ്ങളിലായി കുടിയേറിയതാകാം). കേരളത്തിൽ ക്ഷത്രിയ/പെരുമാൾ ഭരണം തുടങ്ങുന്നതിനും മുമ്പ് നമ്പൂതിരിഭരണം നിന്നിരുന്നു. ആ സമയത്ത് വടക്ക് ചന്ദ്രഗിരിപ്പുഴയും തെക്ക് കന്യാകുമാരിയും വരെയുള്ള ഭൂപ്രദേശം ഭരണ സൗകര്യത്തിനായി 4 കഴകങ്ങളായി തിരിച്ചിരുന്നു. അതിൽ തെക്കേയറ്റത്തുള്ള ചെങ്ങന്നൂർ കഴകം ഭരിച്ചിരുന്ന വഞ്ഞിപ്പുഴ പണ്ടാരത്തിൽ നിന്നും ഇന്നത്തെ ചിറയിൻകീഴ്, വർക്കല താലൂക്കുകൾ ഉൾപ്പെടുന്ന ഭൂപ്രദേശത്ത് ഭരണം നടത്താനും കരം പിരിക്കാനും ഉള്ള അവകാശം മാമണ്ണൂർ മഠത്തിലേക്ക് വന്നുചേർന്നു. ആ കാലത്ത് മഠം നിലനിന്നിരുന്നത് ആറ്റിങ്ങലിന് അടുത്ത് മാമം എന്നറിയപ്പെടുന്ന സ്ഥലത്തായിരുന്നു. (മാമം എന്ന സ്ഥലപ്പേരു 'മാമണ്ണൂർ മഠം' എന്നത് ലോപിച്ച് വന്നതാണെന്ന് ചില ഭാഷാ/ചരിത്ര പണ്ഡിതർ അഭിപ്രായപ്പെടുന്നുണ്ട്). ചില സാമൂഹിക കാരണങ്ങളാൽ മടവൂരേക്ക് പലായനം ചെയ്ത 2 പേർ 2 ശാഖകളായി സ്ഥാപിച്ചതാണ് ഇന്ന് കാണുന്ന മാമണ്ണൂർ മഠവും മടവൂരിൽ തന്നെ ആരൂർ ദേശത്തെ മാമണ്ണൂർ മഠവും. സ്വന്തമായി സൈന്യത്തെ നിയോഗിക്കാനും കൈകാര്യം ചെയ്യാനുമുള്ള അവകാശവും മഠത്തിനുണ്ടായിരുന്നു. മഠത്തിനു സമീപമുള്ള തൃക്കുന്നത്ത് കളരി ഭദ്രകാളി ക്ഷേത്രം മഠം വകയായുള്ള സൈന്യം ആരാധന നടത്തിയിരുന്ന ക്ഷേത്രമാണ്. ആറ്റിങ്ങൽ, കിളിമാനൂർ കൊട്ടാരങ്ങൾ സ്ഥാപിക്കുന്നതിനായി പിന്നീട് വന്ന രാജകുടുംബങ്ങൾക്ക് മഠം വക ഭൂമി വിട്ടുകൊടുത്തതായി ചരിത്രം പറയുന്നു. പകൽക്കുറി മഹാവിഷ്ണുക്ഷേത്രം, മടവൂർ മഹാദേവക്ഷേത്രം മുതലായ ക്ഷേത്രങ്ങളുടെ ഊരാഴ്മയും മഠത്തിലേക്കായിരുന്നു.

ടിപ്പുവിൻറെ പടയോട്ടകാലത്തും അല്ലാതെയുമായി പയ്യന്നൂർ/മംഗലാപുരം ഭാഗത്ത് നിന്നും കുടിയേറിയ ധാരാളം ബ്രാഹ്മണകുടുംബങ്ങൾക്ക് മഠത്തിന് സമീപപ്രദേശത്ത് സ്വസ്ഥമായി താമസിക്കാനുള്ള സഹായവും ചെയ്തുകൊടുത്തു.

പേരിലും പാണ്ഡിത്യത്തിലും കാളിദാസസമനായ മടവൂർ കാവിൽ കാളു (കാളിദാസൻ) ആശാൻ എന്ന മഹാകവി മഠത്തിലെ ഉണ്ണികളെ പഠിപ്പിക്കാനായി നിയുക്തനായിരുന്നു.