പാച്ചോറ്റി

പാച്ചോറ്റി
	ഇലകളും കായകളും
ശാസ്ത്രീയ വർഗ്ഗീകരണം
കിങ്ഡം:	സസ്യം
(unranked):	പുഷ്പിക്കുന്ന സസ്യങ്ങൾ
(unranked):	യൂഡികോട്സ്
(unranked):	ആസ്റ്റെറൈഡ്സ്
Order:	Ericales
Family:	Symplocaceae
Genus:	Symplocos
Species:	S. cochinchinensis
Binomial name
	Symplocos cochinchinensis; (Lour.) S. Moore

പശ്ചിമഘട്ടത്തിലും പൂർവ്വഘട്ടത്തിലും കാണപ്പെടുന്ന ഒരു ഔഷധ വൃക്ഷമാണ്‌ പാച്ചോറ്റി. സിമ്പ്ലൊക്കോസ് കൊച്ചിൻ ചിനെൻസിസ് (Symplocos cochinchinensis) എന്നാണ് ഇതിന്റെ ശാസ്ത്രീയനാമം. മലയോരപ്രദേശങ്ങളിൽ 10 മീറ്റർവരെ പൊക്കത്തിൽ ഇവ വളരുന്നു. ഇന്ത്യയ്ക്കു പുറമെ ഓസ്ട്രേലിയ, മ്യാന്മാർ, ചൈന, ഇന്തോനേഷ്യ, ജപ്പാൻ, മലേഷ്യ, ന്യൂ ഗിനിയ, ശ്രീലങ്ക, തായ്‌ലാന്റ്, ലാവോസ് എന്നീ രാജ്യങ്ങളിലും കാണപ്പെടുന്നു^[1]. പാച്ചോറ്റിയിൽ വെള്ള പാച്ചോറ്റി എന്നും ചുവന്ന പാച്ചോറ്റി എന്നും രണ്ടിനങ്ങളുണ്ട്. ഇതിൽ വെള്ള പാച്ചോറ്റി തൃക്കേട്ട നക്ഷത്രക്കാരുടെ വൃക്ഷമാണ്. വലിയ മരമായി വളരാറുണ്ടെങ്കിലും സാധാരണയായി ഇവ ഇടത്തരം വൃക്ഷമായാണ് വളരുന്നത്.

പേരുകൾ

സംസ്കൃതം - ലോധ്ര:, തിൽ‌വാക, തില്വ:, ക്രമുക:
ഹിന്ദി - ഭോലിയ, സോദ്ധ
ഹിന്ദി, ബംഗാളി, മറാത്തി, ഗുജറാത്തി - ലോധ്ര

ഘടന

അനേകം ശാഖോപശാഖകളും തിങ്ങിനിറഞ്ഞ ഇലകളും ഉള്ള വൃക്ഷമാണിത്. അനായാസമായി ഉരിഞ്ഞെടുക്കാവുന്ന മരത്തൊലിക്ക് വെള്ള കലർന്ന പച്ചനിറം ഉണ്ടായിരിക്കും. ഉണങ്ങുമ്പോൾ തൊലി ഉണങ്ങി ചുരുളുന്നു. ശാഖാഗ്രത്തിലായി കൂട്ടമായുണ്ടാകുന്ന ഇലകൾ ഏകാന്തരക്രമത്തിൽ വിന്യസിച്ചിരിക്കുന്നു. ഇലകൾക്ക് 7.5 മുതൽ 15 സെന്റീമീറ്റർ വരെ നീളവും 5-7.5 സെന്റീമീറ്റർ വരെ വീതിയും ഉണ്ടായിരിക്കും.

ഡിസംബർ - മേയ് കാലയളവിലാണ് സസ്യം പുഷ്പിക്കുന്നത്. വെള്ള നിറത്തിലുള്ള പൂക്കൾ സുഗന്ധമുള്ളവയാണ്. ഒരു കുലയിൽ 10 മുതൽ 12 വരെ പൂക്കൾ കാണപ്പെടുന്നു. ഒറ്റ വിത്തുമായാണ് ഇവയുടെ ഫലം ഉണ്ടാകുന്നത്. നിലത്തു പതിക്കുന്ന വിത്തുകൾ അതിവേഗം നശിക്കുന്നതിനാൽ സ്വാഭാവിക പുനരുത്ഭവം വളരെ കുറവാണ്. അതിനാൽ വനത്തിൽ ഇവയുടെ സ്വാഭാവിക വളർച്ച വിരളമാണ്. ഈടും ഉറപ്പും കുറഞ്ഞ ഇവയുടെ തടിക്ക് വെള്ള നിറമാണ്.