ടൂളാൻ

തെക്കുകിഴക്കൻ ഫ്രാൻസിലെ ഒരു നഗരമാണ് ടൂളാൻ. 'വാർ ഡിപ്പാർട്ടുമെന്റ്' (Var department)-ന്റെ തലസ്ഥാനമായ ടൂളാൻ മാഴ്സീൽസിനു (Marseilles) 46 കി.മീ. തെ. കി. മാറി മെഡിറ്ററേനിയൻ തീരത്ത് സ്ഥിതിചെയ്യുന്നു. നഗരജനസംഖ്യ: 167619 (1990); നഗരസമൂഹ ജനസംഖ്യ: 437553 (1990).

ടൂളാൻ Toulon
Location of ടൂളാൻ Toulon
Country	France
Region	Provence-Alpes-Côte d'Azur
Department	Var
Arrondissement	ടൂളാൻ
Intercommunality	Toulon Provence Méditerranée
ഭരണസമ്പ്രദായം
• Mayor (2008–2014)	ഹുബെർട്ട് ഫാൽക്കോ
Area 1	42.84 ച.കി.മീ.(16.54 ച മൈ)
ജനസംഖ്യ  (2006)2	1,70,041
• ജനസാന്ദ്രത	4,000/ച.കി.മീ.(10,000/ച മൈ)
Demonym(s)	ടുളോനൈസ്
സമയമേഖല	UTC+01:00 (CET)
• Summer (DST)	UTC+02:00 (CEST)
INSEE/Postal code	83137 /83000
Elevation	0–589 മീ (0–1,932 അടി) (avg. 1 മീ or 3.3 അടി)
1 French Land Register data, which excludes lakes, ponds, glaciers > 1 km2 (0.386 sq mi or 247 acres) and river estuaries. 2 Population without double counting: residents of multiple communes (e.g., students and military personnel) only counted once.

ഫ്രാൻസിലെ മൂന്ന് നാവികത്താവളങ്ങളിലൊന്നായ ടൂളാൻ ഒരു മുഖ്യ ഉത്പാദന-വാണിജ്യ കേന്ദ്രംകൂടിയാണ്. മത്സ്യബന്ധന കേന്ദ്രമെന്ന നിലയിലും ടൂളാൻ പ്രശസ്തമാണ്. നിരവധി കപ്പൽ നിർമ്മാണ-റിപ്പയറിംഗ് കേന്ദ്രങ്ങൾ ടൂളാനിലുണ്ട്. രാസവസ്തുക്കൾ, തുണിത്തരങ്ങൾ, യന്ത്രസാമഗ്രികൾ, സംസ്കരിച്ച ഭക്ഷ്യസാധനങ്ങൾ, യുദ്ധോപകരണങ്ങൾ എന്നിവയാണ് ടൂളാനിലെ മുഖ്യ വ്യാവസായികോത്പന്നങ്ങൾ.

1911-ൽ ടൂളാൻ തുറമുഖത്ത് വച്ച് ലിബർട്ടി എന്ന യുദ്ധക്കപ്പലിൽ ഉണ്ടായ അഗ്നിബാധ ഇവിടെ വൻ നാശനഷ്ടങ്ങൾ വിതച്ചു. സമീപത്തുണ്ടായിരുന്ന മറ്റു കപ്പലുകൾക്കും ഈ അഗ്നിബാധയിൽ നാശനഷ്ടങ്ങൾ ഉണ്ടായി. ഇരുന്നൂറോളം പേർ ഈ അപകടത്തിൽ മരിച്ചു. രണ്ടാം ലോകയുദ്ധകാലത്ത് ജർമൻ സേനയുടെ കൈയിൽ പെടാതിരിക്കാൻ ഫ്രഞ്ച് നാവികപ്പടയുടെ ഒട്ടനവധി കപ്പലുകൾ ടൂളാൻ തുറമുഖത്ത് മുക്കിത്താഴ്ത്തിയിട്ടുണ്ട്. തുടർന്നുണ്ടായ ബോംബാക്രമണത്തിൽ ടൂളാൻ തുറമുഖം മിക്കവാറും പൂർണമായി നശിപ്പിക്കപ്പെട്ടു. ടൂളാൻ ഹാർബറിന്റെ കിഴക്കൻഭാഗം വാണിജ്യ-നാവികാവശ്യത്തിനും (Merchant shipping) പടിഞ്ഞാറൻ ഭാഗം ഫ്രഞ്ച് നാവികാവശ്യത്തിനും വേണ്ടിയാണുപയോഗിക്കുന്നത്.

ടൂളാൻ നഗരത്തിന്റെ പഴയഭാഗത്തെ തെരുവുകൾ ഇടുങ്ങിയതും വക്രവുമാണ്. പാർശ്വങ്ങളിൽ തണൽ മരങ്ങൾ വച്ചുപിടിപ്പിച്ച വീതിയേറിയ നിരത്തുകളും കൂറ്റൻ മന്ദിരങ്ങളും ആധുനിക നഗരഭാഗങ്ങളുടെ സവിശേഷതകളാണ്. 11-ാം ശ.-ൽ നിർമിച്ച സെന്റ് മേരി പള്ളി, സെന്റ് ലൂയി പള്ളി, സൈനിക ആശുപത്രി എന്നിവ ഇവിടത്തെ ശ്രദ്ധേയ മന്ദിരങ്ങളാണ്. നഗരത്തിന് പുറത്ത് 17-ാം ശ. മുതൽക്കുള്ള നിരവധി കോട്ടകൾ കാണാം. 6-ാം ശ.-ത്തിൽ തന്നെ ഒരു ഇടവക ആസ്ഥാനമായി ടൂളാൻ മാറിയിരുന്നു. നഗരത്തിനടുത്ത് ലാ ഗാർഡിയിലാണ് (La Garde) ടൂളാൻ സർവകലാശാല സ്ഥിതിചെയ്യുന്നത്.

ടൂർ റൊയാലെ - പതിനാറാം നൂറ്റാണ്ടിലെ കോട്ട

അനേകം പ്രധാന യുദ്ധങ്ങൾക്ക് ടൂളാൻ നഗരം സാക്ഷ്യം വഹിച്ചിട്ടുണ്ട്. ഹെന്റി നാലാമനും പതിനാലാമനും ടൂളാൻ നഗരത്തിൽ നിരവധി കോട്ടകൾ നിർമ്മിച്ചു. 1707-ലെ സ്പാനിഷ് പിന്തുടർച്ചാ യുദ്ധകാലത്ത് ഇംഗ്ലീഷ്-നെതർലൻഡ്സ് സഖ്യസേനയെ ടൂളാൻ ചെറുത്തുനിന്നു. ഫ്രഞ്ചു വിപ്ലവകാലത്ത്, 1793-ൽ റോയലിസ്റ്റുകൾ ഈ നഗരത്തെ ഇംഗ്ലീഷുകാർക്ക് അടിയറവച്ചു. 1793-ന്റെ അവസാനത്തിൽ ഫ്രഞ്ച് റിപ്പബ്ളിക്കൻ സേന നഗരത്തെ കടന്നാക്രമിച്ച് കീഴടക്കുകയുണ്ടായി. ഈ യുദ്ധത്തിലാണ് ഒരു സൈനിക മേധാവി എന്ന നിലയിലുള്ള നെപ്പോളിയന്റെ അനിതരസാധാരണമായ കഴിവ് തെളിയിക്കപ്പെട്ടത്.

രണ്ടാം ലോകയുദ്ധ കാലത്തുണ്ടായ ബോംബാക്രമണം ടൂളാൻ നഗരത്തിൽ ഏറെ നാശനഷ്ടങ്ങൾ വരുത്തി. 1944-ൽ സഖ്യസേന ഈ നഗരത്തെ മോചിപ്പിച്ചു.

കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ ടൂളാൻ എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.