കേണോത്ത് ജി. അടിയോടി

കേരളത്തിലെ പ്രമുഖനായ ജന്തുശാസ്ത്രജ്ഞനും, ശാസ്ത്രസാഹിത്യകാരനും, കേരള ശാസ്ത്രസാഹിത്യ പരിഷത്തിന്റെ സ്ഥാപകരിലൊരാളുമായിരുന്നു ഡോ. കെ.ജി അടിയോടി (1937 ഫെബ്രുവരി 18 – 2001 മേയ് 28). കേണോത്ത് ഗോവിന്ദൻ അടിയോടി എന്ന് പൂർണ്ണനാമം.UPSCയിലെ ആദ്യ മലയാളി മെബറുമാണ്‌ കെ.ജി. അടിയോടി.

കെ.ജി. അടിയോടി
ജനനം	കേണോത്ത് ഗോവിന്ദൻ അടിയോടി (1937-02-18)ഫെബ്രുവരി 18, 1937 പെരളത്ത്, കണ്ണൂർ
മരണം	മേയ് 28, 2001(2001-05-28) (പ്രായം 64) ന്യ ഡെൽഹി
ദേശീയത	ഇന്ത്യൻ
തൊഴിൽ(s)	ജന്തുശാസ്ത്രജ്ഞൻ, ശാസ്ത്രസാഹിത്യകാരൻ

ജീവിതരേഖ

തൃക്കരിപ്പൂരിൽ കാവിൽ കാമ്പ്രത്ത് ഗോവിന്ദ പൊതുവാളുടെയും കേണോത്ത് ലക്ഷ്മിപ്പിള്ളയാതിരി അമ്മയുടെയും മകനായി കണ്ണൂർ ജില്ലയിലെ പെരളത്ത് ജനിച്ചു. ഭാര്യ ഗവേഷകയായ ഡോ. റീത്ത. യൂണിയൻ പബ്ലിക്ക് സർവ്വീസ് കമ്മീഷൻ അംഗമായിരിക്കെ, 2001 മെയ് 28ന് ന്യൂഡൽഹിയിൽവെച്ചാണ് അദ്ദേഹം അന്തരിച്ചത്.

ഔദ്യോഗിക ജീവിതം

മംഗലാപുരം സെന്റ് ആഗ്നസ് കോളജ്, കോഴിക്കോടു ദേവഗിരി സെന്റ് ജോസഫ്സ് കോളജ് എന്നിവിടങ്ങളിൽ അധ്യാപകനായി ജോലി നോക്കി. 1964-70 വരെ കേരള സർവകലാശാലാ ജന്തുശാസ്ത്രവകുപ്പിൽ ഫോർഡ് ഫൌണ്ടേഷന്റെ ഗവേഷണ പ്രോജക്ടിൽ റിസർച്ച് അസിസ്റ്റന്റായിരുന്നു. കീടങ്ങളുടെ ന്യൂറോ എൻഡോക്രൈനോളജിയിൽ ഇദ്ദേഹം നടത്തിയ ഗവേഷണങ്ങൾക്ക് 1970-ൽ പി.എച്ച്.ഡി. ബിരുദം ലഭിച്ചു. ഇതിനുശേഷം മലയാളം എൻസൈക്ളോപീഡിയയിൽ ആറുമാസക്കാലം ശാസ്ത്രവിഭാഗം എഡിറ്ററായിരുന്നു. തുടർന്ന് കോഴിക്കോടു സർവകലാശാലാജന്തുശാസ്ത്ര വിഭാഗത്തിൽ റീഡറായി ചേർന്ന അടിയോടി 1977-ൽ പ്രൊഫസറും പിന്നീട് ജന്തുശാസ്ത്രവകുപ്പു മേധാവിയും സയൻസ്ഫാക്കൽറ്റിഡീനും ആയി.

1977-78-ൽ ബ്രിട്ടനിലും പിന്നീട് ജർമനിയിലെ കോൺ(Kohn) സർവകലാശാലയിലും ഫ്രാൻസിലെ പാരീസ് സർവകലാശാലയിലും അടിയോടി ഗവേഷണം നടത്തി. ക്രസ്റ്റേഷ്യൻ പ്രത്യുത്പാദന ഫിസിയോളജിയിലാണ് പിന്നീട് ഇദ്ദേഹം ഗവേഷണം തുടർന്നത്. 1994-96-ൽ കൊച്ചി ശാസ്ത്ര സാങ്കേതിക സർവകലാശാല വൈസ് ചാൻസലർ ആയി ഇദ്ദേഹം സേവനമനുഷ്ഠിച്ചു. യൂണിയൻ പബ്ളിക് സർവീസ് കമ്മീഷൻ അംഗമായിരുന്നു

ശാസ്ത്രപ്രചരണം

ഇന്റർനാഷണൽ സൊസൈറ്റി ഒഫ് ഇൻവെർട്ടിബ്രേറ്റ് റിപ്രൊഡക്ഷൻ (ISIR) എന്ന സംഘടന രൂപീകരിച്ച അടിയോടിതന്നെയായിരുന്നു 1986 വരെ അതിന്റെ സെക്രട്ടറി ജനറൽ. കേരള ശാസ്ത്രസാഹിത്യ പരിഷത്തിന്റെ സ്ഥാപകരിൽ പ്രമുഖനായ അടിയോടി ദേശീയ ശാസ്ത്രവേദിയുടെ സ്ഥാപക പ്രസിഡന്റുമായിരുന്നു.

പ്രധാന കൃതികൾ

ദേശീയ-അന്തർദേശീയ ജേർണലുകളിലും ആനുകാലിക പ്രസിദ്ധീകരണങ്ങളിലും ഇംഗ്ളീഷിലും മലയാളത്തിലും 300-ൽ അധികം ഗവേഷണ ലേഖനങ്ങൾ പ്രസിദ്ധീകരിച്ചിട്ടുണ്ട്.

• തെയ്യവും തിറയും,
• ജീവന്റെ ഉദ്ഭവവും ഭാവിയും (1965-ലെ എം.പി.പോൾ പുരസ്കാരം)
• കേരളത്തിലെ വിഷപ്പാമ്പുകൾ,
• പ്രാഥമിക ജന്തുശാസ്ത്രം

എന്നിവയാണ് പ്രധാന കൃതികൾ.

പുരസ്തകാരങ്ങൾ

• വിക്രം സാരഭായ് മെമ്മോറിയൽ അവാർഡ് (1980),
• വൃക്ഷമിത്ര അവാർഡ് (1986),
• ഇന്ദിരാഗാന്ധി പര്യവരൺ അവാർഡ് (1989) എന്നീ ദേശീയ പുരസ്കാരങ്ങളും
• 1990-ൽ ഗ്ളോബൽ 500 അവാർഡ്,
• യുനെസ്ക്കോ സമ്മാനം (1989),
• റൈറ്റ് ലൈവ്ലിഹുഡ് അവാർഡ് എന്നീ അന്തർദേശീയ പുരസ്കാരങ്ങളും അടിയോടിക്ക് ലഭിച്ചിട്ടുണ്ട്.

കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ ജി. അടിയോടി കേണോത്ത് ജി. അടിയോടി എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.