കാഞ്ഞിരം (നക്ഷത്രം)

ബൈബിളിലെ പുതിയനിയമത്തിലെ വെളിപാടുപുസ്തകത്തിൽ പരാമർശിക്കുന്ന ഒരു നക്ഷത്രമോ മാലാഖയോ ആണ് കാഞ്ഞിരം. ഗ്രീക്ക് ഭാഷയിൽ അപ്സിന്തിയോൺ (αψίνθιον) അല്ലെങ്കിൽ അപ്സിന്തോസ് (άψινθος) എന്നാണ് ഇതറിയപ്പെടുന്നത്.

കാഞ്ഞിരം ബൈബിളിൽ

ലാ'അനാഹ് (לענה) എന്ന ഹെബ്രായപദത്തിന്റെ പരിഭാഷയായി കാഞ്ഞിരം എന്ന വാക്ക് പഴയനിയമത്തിൽ പലയിടത്തായി പ്രത്യക്ഷപ്പെടുന്നുണ്ടെങ്കിലും എന്തിന്റെയെങ്കിലും നാമരൂപമായി ഈ വാക്കിന്റെ വ്യക്തമായ പ്രയോഗം പുതിയനിയമത്തിലെ വെളിപാടു പുസ്തകത്തിൽ മാത്രമാണ്: "മൂന്നാമത്തെ ദൂതൻ ഊതി; അപ്പോൾ ദീപം പോലെ ജ്വലിക്കുന്ന ഒരു മഹാ നക്ഷത്രം ആകാശത്തുനിന്നു വീണു; നദികളിൽ മൂന്നിലൊന്നിന്മേലും നീരുറവുകളിന്മേലും ആയിരുന്നു വീണതു. ആ നക്ഷത്രത്തിന്നു കാഞ്ഞിരം എന്നു പേർ; വെള്ളത്തിൽ മൂന്നിലൊന്നു കാഞ്ഞിരംപോലെ ആയി; വെള്ളം കൈപ്പായതിനാൽ മനുഷ്യരിൽ പലരും മരിച്ചുപോയി." (വെളിപാട് 8:10-11)