എം.ജി. രാധാകൃഷ്ണൻ

മലയാളചലച്ചിത്ര സം‌ഗീതസം‌വിധായകനും കർണ്ണാടകസംഗീതജ്ഞനുമായിരുന്നു എം.ജി. രാധാകൃഷ്ണൻ. ലളിതസംഗീതത്തെ ജനകീയമാക്കിയതിൽ മുഖ്യ പങ്ക് വഹിച്ച സംഗീതസംവിധായകനായിരുന്നു അദ്ദേഹം.

എം. ജി. രാധാകൃഷ്ണൻ
എം. ജി. രാധാകൃഷ്ണൻ
ജീവിതരേഖ
ജനനനാമം	മലബാർ ഗോപാലൻ നായർ രാധാകൃഷ്ണൻ
സംഗീതശൈലി	സംഗീതസംവിധായകൻ, കർണ്ണാടകസംഗീതം, കമ്പോസർ
തൊഴിലു(കൾ)	സംഗീതസംവിധായകൻ
സജീവമായ കാലയളവ്	1978–2010

2010 ജൂലൈ 2-നു് തിരുവനന്തപുരത്ത് സ്വകാര്യ ആശുപത്രിയിൽ കരൾരോഗത്തെത്തുടർന്ന് എഴുപതാം വയസ്സിൽ അദ്ദേഹം അന്തരിച്ചു..

വ്യക്തിജീവിതം

എം.ജി.രാധാകൃഷ്ണൻ കേരളത്തിലെ ആലപ്പുഴ ജില്ലയിലെ ഹരിപ്പാട് എന്ന സ്ഥലത്താണ് ജനിച്ചത്. 1940 ജൂലൈ 29-നായിരുന്നു അദ്ദേഹത്തിന്റെ ജനനം. പ്രശസ്ത സംഗീതസംവിധായകനും , ഹാർമോണിസ്റ്റുമായ ശ്രീ മലബാർ ഗോപാലൻനായരും , ഹരികഥാ കലാകാരി കമലാക്ഷി അമ്മയും ആണ് മാതാപിതാക്കൾ. അവരുടെ മൂന്ന് മക്കളിൽ മൂത്തയാളായിരുന്നു രാധാകൃഷ്ണൻ. പ്രശസ്ത സംഗീതജ്ഞ ഡോ. കെ. ഓമനക്കുട്ടിയും ചലച്ചിത്രപിന്നണിഗായകൻ എം.ജി. ശ്രീകുമാറുമാണ് ഇളയ സഹോദരങ്ങൾ. ആലപ്പുഴ എസ്.ഡി.കോളേജിൽ നിന്നുമാണ് കലാലയ വിദ്യാഭ്യാസം പൂർത്തിയാക്കിയത്. സ്വാതിതിരുനാൾ സംഗീത അക്കാദമിയിൽ നിന്നും ഗാനഭൂഷണം കരസ്ഥമാക്കി. പ്രശസ്തനായ പിന്നണിഗായകൻ കെ. ജെ. യേശുദാസ് അവിടെ അദ്ദേഹത്തിന്റെ സതീർത്ഥ്യനായിരുന്നു .

സംഗീതജീവിതം

ജി. അരവിന്ദന്റെ പ്രശസ്തമായ തമ്പ് എന്ന ചലച്ചിത്രത്തിനാണ് എം.ജി. രാധാകൃഷ്ണൻ, ആദ്യമായി സംഗീതസംവിധാനം നിർവഹിച്ചത്. തുടർന്ന് തകര, ആരവം, ഞാൻ ഏകനാണ്, ഗീതം, ജാലകം, നൊമ്പരത്തിപ്പൂവ്, കാറ്റ് വന്ന് വിളിച്ചപ്പോൾ, കണ്ണെഴുതി പൊട്ടും തൊട്ട്, മണിച്ചിത്രത്താഴ്, ദേവാസുരം, ചാമരം, അഗ്നിദേവൻ തുടങ്ങി നാൽപ്പതിലധികം ചിത്രങ്ങൾക്ക് സംഗീതം നൽകി. കള്ളിച്ചെല്ലമ്മ, ശരശയ്യ എന്നീ ചിത്രങ്ങളിൽ പാടിയിട്ടുണ്ട്.

2001-ൽ അച്ഛനെയാണെനിക്കിഷ്ടം എന്ന ചിത്രത്തിനും 2005-ൽ അനന്തഭദ്രം എന്ന ചിത്രത്തിനുമായി രണ്ടു തവണ സംസ്ഥാന സർക്കാരിന്റെ മികച്ച സംഗീത സംവിധായകനുള്ള അവാർഡ് ലഭിച്ചിട്ടുണ്ട്. സിനിമാസംഗീതത്തിലും ലളിതസംഗീതത്തിലും തന്റേതായ മുഖമുദ്ര പതിപ്പിച്ചിരുന്നു എം.ജി രാധാകൃഷ്ണൻ.

1962-ൽ തിരുവനന്തപുരത്ത് ആകാശവാണിയിൽ ചേർന്നതോടെയാണ് അദ്ദേഹത്തിന്റെ സംഗീതസപര്യ ആരംഭിക്കുന്നത്. ആകാശവാണിക്ക് വേണ്ടി നിരവധി ലളിതഗാനങ്ങൾക്ക് സംഗീതം പകർന്നു.

പുരസ്കാരങ്ങൾ

കേരളസംസ്ഥാന ചലച്ചിത്രപുരസ്കാരം

• 2005 – മികച്ച സംഗീത സംവിധായകൻ – അനന്തഭദ്രം
• 2001 – മികച്ച സംഗീത സംവിധായകൻ – അച്ഛനെയാണെനിക്കിഷ്ടം

ഏഷ്യാനെറ്റ് ചലച്ചിത്രപുരസ്കാരം

• 2005 – മികച്ച സംഗീത സംവിധായകൻ – അനന്തഭദ്രം
• 2001 – മികച്ച സംഗീത സംവിധായകൻ – കാറ്റു വന്നു വിളിച്ചപ്പോൾ

ചിത്രങ്ങൾ

നമ്പർ	ചിത്രം	സം‌വിധായകൻ	വർഷം
1	തമ്പ്	ജി. അരവിന്ദൻ	1978
2	തകര	ഭരതൻ	1980
3	ആരവം	ഭരതൻ	1980
4	ഞാൻ ഏകനാണ്‌	പി. ചന്ദ്രശേഖർ	1982
5	പൂച്ചക്കൊരു മൂക്കുത്തി	പ്രിയദർശൻ	1984
6	പറയാനും വയ്യ പറയാതിരിക്കാനും വയ്യ	പ്രിയദർശൻ	1985
7	അയൽ‌വാസി ഒരു ദരിദ്രവാസി	പ്രിയദർശൻ	1986
8	ഗീതം	സാജൻ	1986
9	സർ‌വ്വകലാശാല	വേണു നാഗവള്ളി	1987
10	ജാലകം	ഹരികുമാർ	1987
11	നൊമ്പരത്തിപ്പൂവ്	പത്മരാജൻ	1987
12	വെള്ളാനകളുടെ നാട്	പ്രിയദർശൻ	1988
13	അദ്വൈതം	പ്രിയദർശൻ	1991
14	മണിച്ചിത്രത്താഴ്	ഫാസിൽ	1993
15	ചെങ്കോൽ	സിബി മലയിൽ	1993
16	അമ്മയാണെ സത്യം	ബാലചന്ദ്രമേനോൻ	1993
17	ദേവാസുരം	ഐ.വി. ശശി	1993
18	കാശ്മീരം	രാജീവ് അഞ്ചൽ	1994
19	അഗ്നിദേവൻ	വേണു നാഗവള്ളി	1995
20	രക്തസാക്ഷികൾ സിന്ദാബാദ്	വേണു നാഗവള്ളി	1998
21	സ്റ്റാലിൻ ശിവദാസ്	ടി.എസ്. സുരേഷ് ബാബു	1999
22	കണ്ണെഴുതി പൊട്ടുംതൊട്ട്	ടി.കെ. രാജീവ് കുമാർ	1999
23	പൈലറ്റ്സ്	രാജീവ് അഞ്ചൽ	2000
24	നരസിംഹം	ഷാജി കൈലാസ്	2000
25	പ്രജ	ജോഷി	2001
26	മേഘസന്ദേശം	രാജസേനൻ	2001
27	നരിമാൻ	കെ. മധു	2001
28	കാറ്റു വന്നു വിളിച്ചപ്പോൾ	കമൽ	2001
29	അച്ഛനെയാണെനിക്കിഷ്ടം	സുരേഷ് കൃഷ്ണ	2002
30	യാനം	സഞ്ജയ് നമ്പ്യാർ	2004
31	അനന്തഭദ്രം	സന്തോഷ് ശിവൻ	2005

പുറത്തേക്കുള്ള കണ്ണികൾ

• ഇന്റർനെറ്റ് മൂവി ഡാറ്റാബേസിൽ നിന്ന് എം.ജി.രാധാകൃഷ്ണൻ
• എം.ജി.രാധാകൃഷ്ണൻ അന്തരിച്ചു
• എം.ജി.രാധാകൃഷ്ണൻ മലയാളസംഗീതം ഇൻഫോ
• കെ.എസ്.ചിത്ര എം.ജി.രാധാകൃഷ്ണനെ അനുസ്മരിക്കുന്നു
• ശ്രീകുമാരൻ തമ്പി എം.ജി.രാധാകൃഷ്ണനെ അനുസ്മരിക്കുന്നു
• ഫാസിൽ എം.ജി.രാധാകൃഷ്ണനെ അനുസ്മരിക്കുന്നു
• ജോൺസൺ എം.ജി.രാധാകൃഷ്ണനെ ഓർമ്മിക്കുന്നു