എം.ആർ. രാഘവവാരിയർ

കേരളീയനായ ചരിത്ര പണ്ഡിതനും അദ്ധ്യാപകനുമാണ് എം.ആർ.രാഘവവാരിയർ. ഇടയ്ക്കൽഗുഹപഠനങ്ങളിലെ ഒരു വിദഗ്ദ്ധനാണിദ്ദേഹം.

എം.ആർ. രാഘവവാരിയർ
എം.ആർ. രാഘവവാരിയർ
ജനനം	1936 കൊയിലാണ്ടി, കോഴിക്കോട്, കേരളം
ദേശീയത	ഇന്ത്യൻ
തൊഴിൽ	ചരിത്ര പണ്ഡിതൻ, അദ്ധ്യാപകൻ
ജീവിതപങ്കാളി(കൾ)	കെ.വി.ശാരദ
കുട്ടികൾ	ഡോ. രാജീവൻ ചിത്ര

ജനനവും വിദ്യാഭ്യാസവും

പഴയ കുറുമ്പ്രനാട്ടിൽ, കൊയിലാണ്ടിക്കടുത്ത്‌ ചേലിയയിലെ മണലിൽ തൃക്കോവിൽ വാരിയത്ത്‌ വീട്ടിൽ 1936-ലാണ് എം.ആർ.രാഘവ വാരിയരുടെ
ജനനം. ഡൽഹിയിലെ ജവഹർലാൽ നെഹ്‌റു സർവ്വകലാശാലയിൽനിന്ന്‌ ചരിത്രത്തിൽ എം.ഫിൽ ഗവേഷണബിരുദവും കോഴിക്കോട്‌
സർവ്വകലാശാലയിൽനിന്ന്‌ സാഹിത്യത്തിൽ പി.എച്ച്‌.ഡി.ബിരുദവും നേടി.

അദ്ധ്യാപക ജീവിതം

1959 മുതൽ 1972 വരെ ഹൈസ്കൂൾ അദ്ധ്യാപകനായി സേവനം അനുഷ്ഠിച്ച അദ്ദേഹം ഹൈസ്കൂൾ അദ്ധ്യാപകനായിരിക്കെ കാലിക്കറ്റ്‌
സർവ്വകലാശാല ചരിത്രവകുപ്പിൽ അദ്ധ്യാപകനായി പ്രവർത്തനം ആരംഭിച്ചു . ലിപി വിജ്‌ഞ്ഞാനീയം,കേരളചരിത്രം, പ്രാചീനഭാരതചരിത്രം
എന്നിവയാണ് വാരിയരുടെ പ്രധാന പഠനവിഷയങ്ങൾ. അനേകം എം.ഫിൽ, പി.എച്ച്‌.ഡി. വിദ്യാർത്ഥികളുടെ ഗവേഷണങ്ങൾക്ക്‌
മേൽനോട്ടം അദ്ദേഹം വഹിച്ചിട്ടുണ്ട്. തുടർന്ന് കോട്ടയം മഹാത്മാഗാന്ധി സർവ്വകലാശാലയിലെ സ്‌ക്കൂൾ ഓഫ്‌ സോഷ്യൽ സയൻസിൽ
വിസിറ്റിങ്ങ്‌ പ്രൊഫസറായി അദ്ദേഹം പ്രവർത്തനം അനുഷ്ഠിച്ചു.

സംഭാവനകൾ

ജപ്പാനീസ് ചരിത്രകാരനായ നെബ്രോ കരാഷിമയോടൊപ്പം രാഘവ വാരിയർ പന്തലായനി കൊല്ലം തുറമുഖത്തുനിന്നും അനേകം ചൈനീസ്
ഉപകരണങ്ങൾ കണ്ടെടുത്തു. പന്തലായനിയിൽ കച്ചവടത്തിനെത്തിയ ചൈനീസ് മുസ്‌ലീങ്ങൾ ഉപയോഗിച്ചിരുന്നവയാണെന്ന് കരുതുന്നു. ഇടയ്ക്കൽ ഗുഹകളെപ്പട്ടിയുള്ള പഠനം നടത്തുന്നവരിൽ പ്രധാനിയാണ്‌ രാഘവ വാരിയർ .

കുടുംബം

പത്നി കെ.വി.ശാരദയും മകൻ ഡോ.രാജീവനും മകൾ ചിത്രയുമടങ്ങുന്നതാണ് രാഘവവാരിയരുടെ കുടുംബം.

കൃതികൾ

• അശോകന്റെ ധർമ്മശാസനങ്ങൾ (ഭാഷാ ഇൻസ്‌റ്റിറ്റ്യൂട്ട്‌ 1974)
• വടക്കൻ പാട്ടുകളുടെ പണിയാല (വളളത്തോൾ വിദ്യാപീഠം 1983)
• കേരളീയത ചരിത്രമാനങ്ങൾ (വളളത്തോൾ വിദ്യാപീഠം 1991. രാജൻഗുരുക്കളോടൊപ്പം)
• മധ്യകാലകേരളംഃ സമ്പത്ത്‌, സമൂഹം, സംസ്‌കാരം (ചിന്തപബ്ലിഷേഴ്‌സ്‌ 1997).
• വായനയുടെ വഴികൾ

പുരസ്കാരങ്ങൾ

മലയാളകവിത : ആധുനികതയും പാരമ്പര്യവും എന്ന കൃതിക്ക് 2013-ലെ ഇടശ്ശേരി മെമോറിയൽ അവാർഡ്‌ രാഘവവാരിയർക്കു ലഭിച്ചു.