മോൾ (യൂണിറ്റ്)

രസതന്ത്രത്തിൽ 6.02214129(27)×10²³ (അവൊഗാഡ്രോ നമ്പർ) എണ്ണത്തെ സുചിപ്പിക്കുവാൻ ഉപയോഗിക്കുന്ന പദമാണ് മോൾ. അന്താരാഷ്ട്ര ഏകകവ്യവസ്ഥയിൽ (SI) പദാർത്ഥത്തിന്റെ അളവ് സൂചിപ്പിക്കുന്ന ഏകകം എന്ന നിലയിൽ രസതന്ത്രത്തിൽ മോൾ ഉപയോഗിച്ചു വരുന്നു. mol എന്നാണ് ഇതിന്റെ ചുരുക്കെഴുത്ത്. ഒരു മോൾ എന്നത് കൃത്യമായി 6.02214129(27)×10²³ പ്രാഥമിക ഘടകങ്ങളുടെ ഒരു കൂട്ടമാണ്. അത് ആറ്റങ്ങൾ, തന്മാത്രകൾ, അയോണുകൾ, അയോൺ ജോഡികൾ അല്ലെങ്കിൽ മറ്റ് കണികകൾ എന്നിവയോ ആകാം. 12 ഗ്രാം ¹²C യിലെ ആറ്റങ്ങളുടെ എണ്ണവുമായി തത്തുല്യമായ പദാർത്ഥത്തിന്റെ അളവാണ് മോളിന്റെ ചരിത്രപരമായ നിർവചനം. ഇതിന്റെ അടിസ്ഥാനത്തിലാണ് മോളിന്റെ SI മൂല്യം തിരഞ്ഞെടുത്തത്.

Mole
Unit of scientific measure.
Unit system:	SI base unit
Unit of...	Amount of substance
Symbol:	mol

രാസപ്രവർത്തനങ്ങളുടെ അളവുകളും ഉൽപ്പന്നങ്ങളുടെ അളവുകളും പ്രകടിപ്പിക്കുന്നതിനുള്ള സൗകര്യപ്രദമായ മാർഗമായി രസതന്ത്രത്തിൽ മോൾ വ്യാപകമായി ഉപയോഗിക്കുന്നു. ഉദാഹരണത്തിന്, 2 H₂ + O₂ → 2 H₂O എന്ന രാസപ്രവർത്തനം, പ്രതിപ്രവർത്തിക്കുന്ന ഓരോ 2 mol ഹൈഡ്രജൻ തന്മാത്രയും (H₂) ഉം 1 mol ഓക്സിജൻ തന്മാത്രയും (O₂) ഉം പ്രവർത്തിച്ച് 2 മോൾ വെള്ളം രൂപം കൊള്ളുന്നു എന്നു വ്യാഖ്യാനിക്കുന്നു. ഒരു ലായനിയുടെ സാന്ദ്രത സാധാരണയായി അതിന്റെ മോളാർ സാന്ദ്രതയാൽ സൂചിപ്പിക്കുന്നു. ഇത് ലായനിയുടെ ഒരു യൂണിറ്റ് വോള്യത്തിൽ ലയിച്ചിരിക്കുന്ന പദാർത്ഥത്തിന്റെ അളവായി നിർവചിക്കപ്പെടുന്നു.