ബോംഴൂർ മയ്യഴി

എം. മുകുന്ദന്റെ വ്യത്യസ്ത കഥാപാത്രങ്ങളെ അവതരിപ്പിക്കുന്ന ഒരു ഹ്രസ്വ ചിത്രമാണ് ബോംഴൂർ മയ്യഴി.. അകം പ്രൊഡക്ഷൻസിന്റെ ബാനറിൽ ഇ. എം. ഹാഷിം നിർമ്മിച്ച ഈ ചിത്രത്തിന്റെ കഥ തിരക്കഥ സംഭാഷണം എന്നിവ ഒരുക്കി സംവിധാനം ചെയ്തിരിക്കുന്നത് ഇ. എം. അഷ്റഫ് ആണ്. ക്യാമറ കൈകാര്യം ചെയ്തത് ശ്രീകുമാർ പെരുമ്പടവമാണ്. കഥാപാത്രങ്ങൾക്കൊപ്പം എം. മുകുന്ദനും അഭിനയിക്കുന്നുണ്ട്. മുകുന്ദന്റെ വ്യത്യസ്ത കഥാപാത്രങ്ങൾക്കൊപ്പം കഥകളിൽ വരുന്ന മയ്യഴിപ്പുഴ, മൂപ്പൻ സായ്വിന്റെ ബംഗ്ലാവ്, വെള്ളിയാങ്കല്ല്, തുടങ്ങി വ്യത്യസ്ത ഇടങ്ങളും ചിത്രത്തിൽ വരുന്നുണ്ട്. ചന്ദ്രികയും ചോയിയും പോലെയുള്ള കഥാപാത്രങ്ങൾ തങ്ങളുടെ പരിഭവങ്ങളും പിണക്കങ്ങളുമായി കഥാകാരനൊപ്പം അണിനിരക്കുന്നതും കഥയെ വ്യത്യസ്തമാക്കുന്നു. വെള്ളിയാങ്കല്ലിലേക്ക് പറക്കുന്ന തുമ്പികളുടെ പശ്ചാത്തലത്തിൽ, തന്നെ ചോദ്യം ചെയ്യുന്ന കഥാപാത്രങ്ങളോട് നിങ്ങൾ വെള്ളിയാങ്കല്ലിൽ ആത്മാക്കളായി തന്നെ കഴിയുക, അവിടെന്ന് നിങ്ങൾക്ക് മോചനമില്ല എന്ന് കഥാകാരൻ പറയുന്നുണ്ട്. 

സുർജിത്, നൗഷാദ്. കെ, ആൽബർട്ട് അലക്സ്, കാർത്തിക് പ്രസാദ്, അജയ് കല്ലായ്, ജിൻസി ജിയോ, ആതിര തുടങ്ങിയവർ വേഷമിട്ട ചിത്രത്തിലെ ഗാനം ആലപിച്ചിരിക്കുന്നത് സയനോരയാണ്.