പൂപറിക്കാൻ പോരുമോ

ചെറിയ കുട്ടികൾ കളിക്കുന്ന ഒരു നാടൻ കളിയാണ് പൂപറിക്കാൻ പോരുമോ. 1980-കൾ വരെ കൊച്ചി മേഖലയിൽ ഈ കളി സ്കൂളുകളിലും മറ്റും നിലവിലുണ്ടായിരുന്നു. കേരളത്തിന്റെ മറ്റു ഭാഗങ്ങളിലും ഈ കളി നിലവിലുണ്ട്. കൂടുതലും പെൺകുട്ടികളാണ് ഈ കളിയിൽ പങ്കെടുക്കുന്നത്.

വിശദാംശങ്ങൾ

കുട്ടികൾ കൈകോർത്തുപിടിച്ച് അഭിമുഖം നിൽക്കുന്ന രണ്ടു സംഘങ്ങളായി തിരിഞ്ഞ് പാട്ടുപാടിക്കൊണ്ടാണ് കളിക്കുന്നത്. ഓരു സംഘം പാടുമ്പോൾ അവർ മുന്നോട്ടു നടക്കുകയും മറു സംഘം പിന്നോട്ടു നടക്കുകയും ചെയ്യും. ഇതിനു മറുപടിയായി മറ്റേ സംഘം പാടുമ്പോൾ അവർ മുന്നോട്ടു നടക്കും. ആദ്യ സംഘം അപ്പോൾ പിന്നോട്ട് മാറും.

"പൂപറിക്കാൻ പോരുമോ പോരുമോ ആ(അ)തി രാവിലെ?" എന്നാണ് ആദ്യ വരി. ഇത് ഒരു സംഘം പാടും.

"ആരെ നിങ്ങൾക്കാവശ്യം ആവശ്യം ആതി രാവിലെ." എന്നാണ് മറുപടി.

"(ആളുടെ പേര്)-നെ ഞങ്ങൾക്കാവശ്യം ആവശ്യം ആതി രാവിലെ." എന്ന് മറുപടി.

"കൊണ്ടുപോണത് കാണട്ടെ കാണട്ടെ ആതി രാവിലെ." എന്ന് തിരികെ വെല്ലുവിളി.

ഇതോടെ പേരെടുത്തുപറഞ്ഞ ആളിനെ രണ്ടു സംഘങ്ങളും ഓരോ കയ്യിലും പിടികൂടി താളത്തിൽ വലിക്കാൻ തുടങ്ങും (അങ്ങോട്ടൊന്നു വലിക്കുമ്പോൾ ഇവിടെനിന്നു അയഞ്ഞുകൊടുക്കുകയും വീണ്ടും ഇങ്ങോട്ടു വലിക്കുകയും ചെയ്യുന്ന തരത്തിൽ). അവസാനം ഒരു സംഘം ആളെ സ്വന്തമാക്കുന്നതോടുകൂടി കളി അവസാനിക്കും.

വരികളിലെ വ്യത്യാസങ്ങൾ

ആതി രാവിലെ എന്നത് അതിരാവിലെ (വെളുപ്പാൻ കാലത്ത്) എന്ന് നീട്ടിപ്പാടുന്നതാണ്. ഇത് ചിലയിടങ്ങളിൽ അമ്പടി രാവിലെ എന്നും ചിലപ്പോൾ പടി രാവിലെ എന്നും പാടാറുണ്ട്.

സംസ്കാരത്തിൽ

കണ്ണകി എന്ന ചലച്ചിത്രത്തിൽ കൈതപ്രം രചിച്ച ഒരു ഗാനത്തിൽ "പൂപറിക്കാൻ പോരുമോ പോരുമോ" എന്ന വരികളുണ്ട്

പുറത്തേയ്ക്കുള്ള കണ്ണികൾ

• ഈ ബ്ലോഗിൽ പാട്ടിന്റെ ഒരു പ്രാദേശികഭേദം കൊടുത്തിട്ടുണ്ട്. വരികളിൽ കാര്യമായ വ്യത്യാസമുണ്ട്.
• ഈ ബ്ലോഗിൽ മറ്റൊരു വേർഷൻ കൊടുത്തിട്ടുണ്ട്.