പനങ്കഞ്ഞി

പണ്ട് കാലത്ത് കേരളത്തിൽ വ്യാപകമായി ഉപയോഗിച്ചിരുന്ന ഒരു ഭക്ഷണപദാർത്ഥമാണ് പനങ്കഞ്ഞി. കുടപ്പനയുടെ തടിക്കുള്ളിൽ നിന്ന് ലഭിക്കുന്ന പൊടി ഉപയോഗിച്ചാണ് ഇത് നിർമിച്ചിരുന്നത്.

നിർമ്മാണം

കുടപ്പന കുലച്ച് കഴിയുമ്പോൾ അതിന്റെ വളർച്ച ഏകദേശം അവസാനിക്കുന്നു. ഇങ്ങനെ വളർച്ചനിന്ന കുടപ്പനകളോ അല്ലെങ്കിൽ ഒടിഞ്ഞുവീണ കുടപ്പനകളോ ആണ് സാധാരണയായി പനങ്കഞ്ഞി ഉണ്ടാക്കാനായി ഉപയോഗിക്കാറ്. ഈ കുടപ്പനകൾ വെട്ടി, അതിന്റെ പുറം തൊലി കളഞ്ഞ്, അകത്തെ ഭാഗം മാത്രം വേർതിരിച്ചെടുക്കുന്നു. ഇത് വെയിലത്തിട്ട് ഉണക്കി പൊടി വേർതിരിച്ചെടുക്കുന്നു. ഈ പൊടി കുറുക്കിയാണ് പനങ്കഞ്ഞി ഉണ്ടാക്കുന്നത്.

പനയുടെ ഉള്ളിൽ നിന്ന് ലഭിക്കുന്ന പൊടിയോടുകൂടിയ കാമ്പ് പന്നി, താറാവ് തുടങ്ങിയവയ്ക്ക് തീറ്റയായും കൊടുക്കാറുണ്ട്.

അനുബന്ധ വിഭവങ്ങൾ

പനയട

പനങ്കഞ്ഞി ഉണ്ടാക്കാനായി വേർതിരിച്ചെടുക്കുന്ന പൊടികൊണ്ട് ഉണ്ടാക്കുന്ന ഒരു വിഭവമാണ് പനയട. മറ്റ് അടകൾ ഉണ്ടാക്കുന്നതുപോലെതന്നെയാണ് ഇതും തയ്യാറാക്കുന്നത്. ഓട്ടുകലത്തിൽ ചുടുന്ന പനയടക്ക് ഒലത്തനട എന്നും പറയാറുണ്ട്.