അറബിമലയാള സാഹിത്യ ചരിത്രം

അറബിമലയാള ലിപിയെക്കുറിച്ചും അതിലെ രചനകളെക്കുറിച്ചുമുള്ള ഒരു ഗവേഷണഗ്രന്ഥമാണ് അറബിമലയാള സാഹിത്യ ചരിത്രം. ഒ. ആബു ആണ് ഈ ഗവേഷണഗ്രന്ഥം തയ്യാറാക്കിയത്. 1970-ലാണ് ആദ്യമായി പ്രസിദ്ധീകരിക്കപ്പെടുന്നത്. സാഹിത്യ പ്രവർത്തക സഹകരണ സംഘം പ്രസിദ്ധീകരിച്ച ഈ ഗ്രന്ഥം നാഷണൽ ബുക്സ്റ്റാൾ ആണ് വിതരണം നടത്തിയത്.

രചന

അരനൂറ്റാണ്ടുകാലത്തെ അദ്ദേഹത്തിന്റെ ശ്രമഫലമാണ്  'അറബി-മലയാള സാഹിത്യചരിത്രം'. അറബിമലയാളത്തിൽ വിവർത്തനങ്ങളും വ്യാഖ്യാനങ്ങളുമുണ്ടെന്ന് അദ്ദേഹം കണ്ടെത്തി. അറബി മലയാളത്തിന്റെ പ്രത്യേകതകൾ, അതിന്റെ വ്യാകരണം, ശൈലി, ലിപികൾ തുടങ്ങിയവ പണ്ഡിതോചിതമായി തന്നെ കൈകാര്യം ചെയ്തു. മലയാളത്തിലെ പല വാക്കുകളും ഇസ്‌ലാമിക സംസ്കാരത്തെ ഉൾക്കൊള്ളാൻ പര്യാപ്തമല്ലാത്തതിനാലായിരുന്നു അറബി-മലയാള ഭാഷയുടെ പിറവി ആവശ്യമായിത്തീർന്നതെന്നായിരുന്നു ആബുവിന്റെ വാദം. അറബി ഭാഷയിലെ അർഥസമ്പുഷ്ടമായ പല പദങ്ങളും അറബി മലയാളത്തിലൂടെ മലയാളത്തിലേക്ക് കടന്നുവന്നുവെന്നും അദ്ദേഹം നിരീക്ഷിക്കുന്നു. അറബിമലയാളം ഒരു ഭാഷയാണെന്നും ആ ഭാഷക്കു സ്വന്തമായി ഒരു വ്യാകരണമുണ്ടെന്നും ഒ. അബു വിശ്വസിച്ചിരുന്നു.മുസ്‌ലിംകൾ കടന്നു ചെന്ന നാടുകളിൽ തദ്ദേശീയ ഭാഷയെ അറബി ലിപിയിൽ എഴുതുന്ന പതിവിനെകുറിച്ച് ഈ കൃതിയിൽ ഒ. അബു പറയുന്നുണ്ട്.