സി.ആർ. നീലകണ്ഠൻ

കേരളത്തിലെ ഒരു സാമുഹ്യ,പരിസ്ഥിതി പ്രവർത്തകനും എഴുത്തുകാരനുമാണ്‌ സി.ആർ. നീലകണ്ഠൻ എന്ന സി.ആർ. നീലകണ്ഠൻ നമ്പൂതിരി. 2016 ജനുവരി 3-ൽ ആം ആദ്മി പാർട്ടിയുടെ സംസ്ഥാന കൺവീനറായി ചുമതലയേറ്റു. വിദ്യാർത്ഥി പ്രസ്ഥാനങ്ങളിലൂടെ രാഷ്ട്രീയ ജീവിതത്തിന് തുടക്കം കുറിച്ച സി ആറിനെ അടിയന്തരാവസ്ഥ കാലത്ത് കമ്മ്യൂണിസ്റ്റ് ലിറ്ററേച്ചറുകൾ കൈവശം വെച്ചെന്നു പറഞ്ഞ് നിയമ വിരുദ്ധമായി കസ്റ്റഡിയിൽ വെച്ചിരുന്നു. ശേഷം SFI വിദ്യാർത്ഥി പ്രസ്ഥാനത്തിൽ ചേർന്ന് കമ്മ്യൂണിസ്റ്റ് പാർട്ടിക്കായി പ്രവർത്തിച്ചു. 2014-ൽ ആം ആദ്മി പാർട്ടിയോടൊപ്പം കൂടിയ സി ആർ AAP സംസ്ഥാന എക്സിക്യൂട്ടീവ് കമ്മറ്റിയിൽ അംഗമായി. 2019-ൽ അദ്ദേഹം ആം ആദ്മി പാർട്ടിയുമായുള്ള ബന്ധം അവസാനിപ്പിച്ചു.

നദീ ദിനാചരണം 2012. ചാലിയാർപ്പുഴയുടെ തീരത്ത്.

ജീവിതരേഖതിരുത്തുക

1957 ഏപ്രിൽ 2 ന്‌ സി.പി. രാമൻ നമ്പൂതിരിയുടേയും സാവിത്രി അന്തർജനത്തിന്റെയും മകനായി തൃശൂർ ജില്ലയിലെ കരുവന്നൂരിൽ ജനിച്ചു. ഇരിങ്ങാലക്കുട ക്രൈസ്റ്റ് കോളേജ്, തൃശൂർ ഗവ. എൻ‌ജിനിയറിംഗ് കോളേജ് എന്നിവിടങ്ങളിൽ വിദ്യാഭ്യാസം. എസ്.എഫ്.ഐയുടെ തൃശൂർ ജില്ലാ സെക്രട്ടറിയും സംസ്ഥാനസമിതി അംഗവുമായിരുന്നിട്ടുണ്ട്. തോമസ് ഐസക്ക്, എം.എ. ബേബി, എ.കെ. ബാലൻ എന്നിവർ അക്കാലത്ത് നീലകണ്ഠന്റെ സഹപ്രവർത്തകരായിരുന്നു^[1]. ബോംബയിലെ ഭാഭാ അണുശക്തി ഗവേഷണ കേന്ദ്രത്തിൽ ഒരു വർഷത്തെ പരിശീലനം നേടി.

1983 മുതൽ അരൂരിലെ കെൽടോൺ കൺ‌ട്രോൾസിൽ ജോലിചെയ്യുന്ന നീലകണ്ഠൻ ഇപ്പോൾ അവിടുത്തെ ഡെപ്പ്യൂട്ടി ജനറൽ മാനാജർ പദവി വഹിക്കുന്നു^[2]. കെൽടോണിൽ നിന്ന് ലീവ് എടുത്ത് നാലുവർഷത്തോളം ഗൾഫിലും ജോലിചെയ്തു.

പരിസ്ഥിതി വിഷയത്തിൽ വ്യക്തമായ നിലപാട് ഉയർത്തിപ്പിടിക്കുന്ന നീലകണ്ഠൻ, പത്രങ്ങളിലും ആനുകാലികങ്ങളിലും സാമൂഹിക-ജനകീയ-പരിസ്ഥിതി പ്രശ്നങ്ങൾ കേന്ദ്രീകരിച്ച് ലേഖനങ്ങൾ എഴുതിവരുന്നു. കൂടാതെ ദൃശ്യ-ശ്രാവ്യ മാധ്യമങ്ങളിലെ പരിസ്ഥിതി സംബന്ധമായ ചർച്ചകളിലും സജീവമായി പങ്കുകൊള്ളുന്നു.

രാഷ്ട്രീയ നിലപാടുകൾതിരുത്തുക

ഒരു കാലത്ത് സി.പി.എംന്റെ സഹയാത്രികനായിരുന്ന നീലകണ്ഠൻ ഇപ്പോൾ അവരുടെ പരിസ്ഥിതി-ദളിത് വിഷയങ്ങളിലുള്ള നിലപാടുകളിൽ കടുത്ത വിയോജിപ്പ് പ്രകടിപ്പിക്കുന്ന ആളാണ്‌^[1]. എന്നാൽ കേരളത്തിലെ ജനകീയ സമരങ്ങളിൽ കക്ഷിരാഷ്ട്രീയങ്ങൾക്കതീതമായി ഇടപെട്ടു കൊണ്ടിരിക്കുകയും സമരക്കാരുമായും സമാനസംഘടനകളുമായും സജീവമായി സഹകരിച്ചുവരികയും ചെയ്യുന്നു^[3].

മാവോയിസ്റ്റുകൾ ഉണ്ടാകുന്നതെങ്ങനെ എന്ന വിഷയത്തിൽ പ്രതിചിന്ത എന്ന സ്വതന്ത്ര സംഘടന 2010 മെയ് 20-ന് കോഴിക്കോടിനടുത്തുള്ള പാലേരിയിൽ സംഘടിപ്പിച്ച ചർച്ചയിൽ മുഖ്യപ്രഭാഷണം നടത്താനെത്തിയ നീലകണ്ഠൻ, തൻ്റെ പ്രസംഗം ആരംഭിച്ചയുടനെ ഒരു കൂട്ടം ഡി.വൈ.എഫ്.ഐ. പ്രവർത്തകരാൽ ആക്രമിക്കപ്പെട്ടു^[4].

2019 ഏപ്രിലിൽ, ഇടത് - വലത് രാഷ്ട്രീയസഖ്യങ്ങളെ പിന്തുണയ്ക്കുന്ന വിഷയത്തിലുള്ള അഭിപ്രായവ്യത്യാസം മൂലം അദ്ദേഹം ആം ആദ്മി പാർട്ടിയിൽ നിന്ന് പുറത്താക്കപ്പെടുകയും അതോടെ ആ പാർട്ടിയുമായുള്ള അദ്ദേഹത്തിന്റെ ബന്ധം അവസാനിക്കുകയും ചെയ്തു.^[5]