മൈക്കേൽ ഡാവിറ്റ് അയർലണ്ടിലെ ദേശീയ നേതാവായിരുന്നു. ബ്രിട്ടിഷ് മേധാവിത്വത്തിൽ നിന്നും രാജ്യത്തെ സ്വതന്ത്രമാക്കാൻ യത്നിച്ച ഇദ്ദേഹം ഭൂപരിഷ്കരണത്തിനു വേണ്ടി സമരം നയിച്ച ലാൻഡ് ലീഗ് എന്ന സംഘടനയുടെ സ്ഥാപകനേതാവെന്ന നിലയിലും പ്രസിദ്ധി നേടിയിട്ടുണ്ട്. മെയോ കൗണ്ടിയിലെ സ്ട്രെയ്ഡിൽ 1846 മാർച്ച് 25-ന് ഒരു കർഷകന്റെ പുത്രനായി ഇദ്ദേഹം ജനിച്ചു. 1852-ൽ കുടിയിറക്കപ്പെട്ട ഡാവിറ്റിന്റെ കുടുംബം ലങ്കാഷയറിലേക്ക് താമസം മാറ്റി.

മൈക്കേൽ ഡാവിറ്റ്

തുണിമിൽ തൊഴിലാളി തിരുത്തുക

തുണിമിൽ തൊഴിലാളിയായി പ്രവർത്തിച്ചുകൊണ്ടിരിക്കെ 1857-ൽ അപകടത്തിൽപ്പെട്ട് ഇദ്ദേഹത്തിന്റെ ഒരു കൈ നഷ്ടപ്പെട്ടു. അയർലണ്ടിന്റെ സ്വാതന്ത്ര്യത്തിനായി പൊരുതിയിരുന്ന അന്താരാഷ്ട്ര സംഘടനയായ ഐറിഷ് റിപ്പബ്ലിക്കൻ ബ്രദർഹുഡിൽ (ഫെനിയൻ) അംഗമായി 1865-മുതൽ പ്രവർത്തിച്ചുതുടങ്ങി. ഈ സംഘടനയുടെ ഇംഗ്ലണ്ടിലേയും സ്കോട്ട്ലൻഡിലേയും സംഘാടക സെക്രട്ടറിയായി ഇദ്ദേഹം 1868-ൽ നിയുക്തനായി. ബ്രിട്ടിഷ് മേധാവിത്വത്തിൽ നിന്നും അയർലണ്ടിനെ സ്വതന്ത്രമാക്കാനുളള യത്നത്തിലേർപ്പെട്ടിരിക്കെ അയർലണ്ടിലേക്ക് ആയുധങ്ങൾ കയറ്റി അയച്ച കുറ്റത്തിന് 1870 മേയ് 14-ആം തീയതി ഇദ്ദേഹത്തെ അറസ്റ്റു ചെയ്യുകയും 15-വർഷത്തെ തടവിനു ശിക്ഷിക്കുകയും ചെയ്തു. എന്നാൽ ഏഴു വർഷമായപ്പോഴേക്കും 1877-ൽ മോചിതനായി.

ഭൂപരിഷ്കരണത്തിനായി തിരുത്തുക

ഫെനിയൻ വിപ്ലവ പ്രസ്ഥാനത്തെ ചാൾസ് പാർനലിന്റെ വ്യവസ്ഥാപിത പ്രക്ഷോഭവുമായി ബന്ധപ്പെടുത്തി പ്രവർത്തിക്കുന്നതിന് ഇദ്ദേഹം യത്നിച്ചു. ഫെനിയൻ പ്രവർത്തനങ്ങളുമായി ബന്ധപ്പെട്ട് 1878-ൽ യു. എസ്സിലേക്കു പോയ ഡാവിറ്റ് 1879-ൽ അയർലണ്ടിൽ മടങ്ങിയെത്തി. പാർനലുമായി സഹകരിച്ച്, ഭൂപരിഷ്കരണം സാധ്യമാക്കുന്നതിനു വേണ്ടി സമരം നയിച്ച നാഷണൽ ലാൻഡ് ലീഗ് എന്ന സംഘടന സ്ഥാപിക്കുന്നതിനു നേതൃത്വം നൽകി. 1881-ലെ ഭൂനിയമ നിർമ്മാണത്തിന് ഇതിന്റെ പ്രവർത്തനം പ്രേരകമായിഭവിച്ചു.

വീണ്ടും ജയിൽ തിരുത്തുക

ഇദ്ദേഹം പിൽക്കാലത്ത് പാർനലുമായി അഭിപ്രായ വ്യത്യാസത്തിലായി. സ്വാതന്ത്ര്യലബ്ധിക്കു വേണ്ടിയുള്ള പ്രവർത്തനങ്ങളുടെ പേരിൽ 1881-82 കാലയളവിലും 83-ലും ഇദ്ദേഹം ജയിലിൽ അടയ്ക്കപ്പെടുകയുണ്ടായി. 1882-ൽ പാർലമെന്റംഗമായി തെരഞ്ഞെടുക്കപ്പെട്ടുവെങ്കിലും കുറ്റവാളിയാണെന്ന കാരണത്താൽ അംഗത്വം നിഷേധിക്കപ്പെട്ടു. 1892-ലും 93-ലും പാർലമെന്റിലേക്ക് തെരഞ്ഞെടുക്കപ്പെട്ടപ്പോഴും സഭയിലിരിക്കാൻ കഴിഞ്ഞില്ല. 1895-ൽ വീണ്ടും തെരഞ്ഞെടുക്കപ്പെട്ട് പാർലമെന്റംഗമായി പ്രവർത്തിക്കാൻ കഴിഞ്ഞുവെങ്കിലും ഗ്രേറ്റ് ബ്രിട്ടന്റെ സൗത്ത് ആഫ്രിക്കൻ യുദ്ധത്തിൽ (ബൊയർ യുദ്ധം) പ്രതിഷേധിച്ച് 1899-ൽ ഈ സ്ഥാനം രാജിവച്ചു.

രചിച്ച ഗ്രന്ഥങ്ങൾ തിരുത്തുക

  • ലീവ്സ് ഫ്രം എ പ്രിസൺ ഡയറി (1884)
  • ദ് ബൊയർ ഫൈറ്റ് ഫോർ ഫ്രീഡം (1902)
  • ദ് ഫോൾ ഒഫ് ഫ്യൂഡലിസം ഇൻ അയർലണ്ട് (1904)

തുടങ്ങിയ ഗ്രന്ഥങ്ങൾ ഇദ്ദേഹം രചിച്ചിട്ടുണ്ട്. 1906 മേയ് 31-ന് ഡബ്ലിനിൽ ഇദ്ദേഹം നിര്യാതനായി.

പുറത്തേക്കുള്ള കണ്ണികൾ തിരുത്തുക

 കടപ്പാട്: കേരള സർക്കാർ ഗ്നൂ സ്വതന്ത്ര പ്രസിദ്ധീകരണാനുമതി പ്രകാരം ഓൺലൈനിൽ പ്രസിദ്ധീകരിച്ച മലയാളം സർ‌വ്വവിജ്ഞാനകോശത്തിലെ ഡാവിറ്റ്, മൈക്കേൽ (1846-1906) എന്ന ലേഖനത്തിന്റെ ഉള്ളടക്കം ഈ ലേഖനത്തിൽ ഉപയോഗിക്കുന്നുണ്ട്. വിക്കിപീഡിയയിലേക്ക് പകർത്തിയതിന് ശേഷം പ്രസ്തുത ഉള്ളടക്കത്തിന് സാരമായ മാറ്റങ്ങൾ വന്നിട്ടുണ്ടാകാം.
"https://ml.wikipedia.org/w/index.php?title=മൈക്കേൽ_ഡാവിറ്റ്&oldid=2285258" എന്ന താളിൽനിന്ന് ശേഖരിച്ചത്